1 Yuhanna 3 - Fulfulde Bible

Ɓikkoy Allah

¹ Ndaare no Baabiraawo yiɗiri en, haa en mbi'aama ɓikkoy Allah! Gooŋga en ɓikkoy maako. Ngam man duniyaaru anndaa en ngam ndu anndaa Allah.

² Yiɗaaɓe am, jonta en laatake ɓikkoy Allah. Ko en tammi laataago waŋgaay tawon. Ammaa en anndi to Almasiihu waŋgi, en nanndan bee maako, ngam en ngi'an mo bana no o wa'i.

³ Koo moy tammake ɗum, laɓɓinan hoore mum bana Yeesu Almasiihu o laaɓɗo.

⁴ Baɗɗo hakke fuu tuurtani umroore Allah, ngam hakke ɗum tuurtango umroore Allah.

⁵ Ammaa on anndi Almasiihu wari ngam ittugo hakkeeji. Kaŋko, walaa hakke nder maako sam.

⁶ Mo ɗon tabiti nder kawtal bee Almasiihu fuu waɗataa hakke, ammaa baɗoowo hakke meeɗaay yi'ugo mo, meeɗaay anndugo mo boo.

⁷ Ɓikkoy am, taa goɗɗo selna on. Baɗoowo adilaaku, o adiliijo bana Almasiihu o adiliijo.

⁸ Baɗoowo hakke fuu laatake mo Iblisa, ngam diga fuɗɗam, Iblisa ɗon waɗa hakke. Ngam man Ɓiɗɗo Allah wari ngam nattingo kuuɗe Iblisa.

⁹ Laatiiɗo ɓiŋngel Allah fuu waɗataa hakke, ngam ko Allah aawi ɗon jooɗi nder maako. O waawataa waɗugo hakke, ngam o laati ɓiŋngel Allah.

¹⁰ Ammaa mo huuwataa kuuɗe adiliije, mo ɗon wanya deerɗiraawo mum fuu, o danyaakaa e Allah. Bana nii goɗɗo senndindirta ɓikkoy Allah bee koy Iblisa.

Ɓikkoy Allah ɗon ngiɗindira

¹¹ Ndaa kubaruwol ngol on nani diga fuɗɗam: “Ngiɗindiren!”

¹² Taa en mbaɗa bana Kayinu mo mbari deerɗum ngam o laati mo Kalluɗo. Koni o mbari mo? Ngam kuuɗe maako ɗe kalluɗe, ammaa kuuɗe deerɗiiko ɗe adiliije.

¹³ Deerɗam'en, taa kayɗine to duniyaaru ɗon wanya on.

¹⁴ En anndi en ngurtake diga maayde, en nasti ngeendam, ngam en ngiɗi deerɗiraaɓe men. Ammaa mo walaa yiide, o ɗon jooɗi nder maayde tawon.

¹⁵ Ganyɗo deerɗum fuu o mbaroowo ko'e. On anndi ngeendam nduumiiɗam wonataa nder mbaroowo ko'e.

¹⁶ Almasiihu hokki yoŋki muuɗum ngam meeɗen. Bee maajum en paami ko woni yiide. Enen boo, sey en ndokka yoŋkiiji meeɗen ngam deerɗiraaɓe meeɗen.

¹⁷ To marɗo yi'i haaje deerɗum, ammaa o sali enɗugo ɗum, bana noy yiide Allah tabitirta nder maako?

¹⁸ Ɓikkoy am, taa yiide meeɗen laato bee bolle tan. Ammaa nde laato yiide gooŋgaare, waŋgannde nder kuuɗe.

Ɓikkoy Allah kulataa daraago yeeso Allah

¹⁹ Bee maajum anndirten en ɗon tokki gooŋga. Kanjum waɗi ɓerɗe meeɗen nde'ititto yeeso Allah.

²⁰ Ngam to ɓerɗe meeɗen aybini en, en anndi Allah ɓuri ɓerɗe meeɗen, ngam o anndi koo ɗume fuu.

²¹ Yiɗaaɓe am, to ɓerɗe meeɗen aybinaay en, en maran hoolɗinaare yeeso Allah,

²² en keɓan haa maako ko en toroto mo fuu, ngam en ɗon ɗowtano umrooje maako, en ɗon mbaɗa ko fottani mo.

²³ Ndaa ko o umri: En nuɗɗina innde Yeesu Almasiihu, Ɓiɗɗo maako, en ngiɗindira fodde umroore nde Almasiihu umri en.

²⁴ Ɗowtaniiɗo umrooje ɗe'e ɗon tabiti nder kawtal bee Allah, Allah boo ɗon tabiti nder kawtal bee maako. Bana nii anndirten Allah ɗon tabiti nder kawtal bee meeɗen, en anndi ɗum bee Ruuhu maako mo o hokki en.