1 Yuhanna 2 - Fulfulde Bible

Almasiihu woni balloowo meeɗen

¹ Ɓikkoy am, mi ɗon winndana on ɗu'um ngam taa on mbaɗa hakke. Ammaa to goɗɗo waɗi hakke, en ngoodi ceettoowo haa kommbi Baabiraawo, ɗum Yeesu Almasiihu, kaŋko o adiliijo.

² Ngam Almasiihu bee hoore mum hokki yoŋki muuɗum ngam yaafuye hakkeeji meeɗen, naa ɗi meeɗen tan, ammaa ɗi duniyaaru fuu boo.

³ To en ɗowtanake umrooje Allah, nden kam en paami en anndi mo fakat.

⁴ To goɗɗo wi'i: Mi anndi Allah, ammaa o ɗowtantaako umrooje maako, nden kam o pewoowo, gooŋga walaa nder maako.

⁵ Ammaa ɗowtantooɗo wolde Allah, fakat yiide Allah timmunde ɗon nder muuɗum. Bana nii anndirten en ɗon nder kawtal bee Allah.

⁶ Bi'ɗo o ɗon nder kawtal bee Allah, sey o yeeɗa bana no Yeesu Almasiihu yeeɗiri.

Umroore hesre

⁷ Yiɗaaɓe am, ko mi winndanta on, naa ɗum umroore hesre, ammaa ɗum umroore ɓooymaare nde on keɓi diga fuɗɗam. Umroore ɓooymaare nde'e, ɗum wolde nde on nani.

⁸ Koo non boo, umroore nde mbinndanmi on nde hesre, ɗum laaɓani Almasiihu e ɗum laaɓani on boo. Ngam nyiɓre ɗon saalo, annoora gooŋgaha fuɗɗi yaynugo.

⁹ To goɗɗo wi'i o ɗon nder annoora, ammaa o ɗon wanya deerɗiiko, nden kam haa jonta o ɗon nder nyiɓre.

¹⁰ Giɗɗo deerɗum ɗon jooɗi nder annoora, walaa daliila fergere nder maako.

¹¹ Ammaa ganyɗo deerɗum, ɗon nder nyiɓre, o ɗon yaha nder nyiɓre, o anndaa toy o yahata ngam nyiɓre wumni mo.

¹² Mi ɗon winndana on, onon ɓikkoy. Ngam daliila innde Yeesu Almasiihu hakkeeji mooɗon njaafaama.

¹³ Mi ɗon winndana on, onon baabiraaɓe, ngam on anndi mo ɗon diga fuɗɗam. Mi ɗon winndana on, onon derke'en, ngam on njaalake Kalluɗo.

¹⁴ Mi winndani on, onon ɓikkoy, ngam on anndi Baabiraawo. Mi winndani on, onon baabiraaɓe, ngam on anndi mo ɗon diga fuɗɗam. Mi winndani on, onon derke'en, ngam on semmbiɗɓe, wolde Allah ɗon tabiti nder mooɗon, on njaalake Kalluɗo.

¹⁵ Taa ngiɗe duniyaaru ndu'u e kuuje maaru fuu. To goɗɗo yiɗi duniyaaru, o walaa yiide ngam Baabiraawo nder maako.

¹⁶ Ngam ko woni nder duniyaaru fuu, ɗum suuno ɓanndu, suunaago ko gite ngi'ata e mawnitaago bee risku mum, ɗum fuu ɗum iwaay haa Baabiraawo, ammaa haa duniyaaru ɗum iwi.

¹⁷ Duniyaaru bee ko suunete nder maaru fuu caaloto. Ammaa ɗowtantooɗo muuyo Allah yeeɗan haa foroy.

Konneejo Almasiihu

¹⁸ Ɓikkoy am, saa'iire ragareere yottake! On nanino konneejo Almasiihu waran. Jonta ndaa konne'en Almasiihu ɗuuɗɓe ngari, ngam maajum en anndi saa'iire ragareere yottake.

¹⁹ Caka meeɗen yimɓe ɓe'e ngurti, ammaa ɓe laataakino ɓe meeɗen. Ngam to ɓe laatino ɓe meeɗen bee gooŋga, ɓe tokkotono jooɗodaago bee meeɗen. Ammaa ɓe acci en ngam haa ɗum waŋga laaɓɗum no fuu maɓɓe ɓe laataakino ɓe meeɗen.

²⁰ Ammaa onon, on fuu on ngoodi anndal, ngam on keɓi Ruuhu diga Ceniiɗo.

²¹ Mi winndani on, naa ngam on anndaa gooŋga, ammaa ngam on anndi ka e on anndi boo fewre iwataa diga gooŋga.

²² Moy woni pewoowo, to naa mo yeddi Yeesu woni Almasiihu? Mo yeddi Baabiraawo e Ɓiɗɗo, kaŋko woni konneejo Almasiihu.

²³ Koo moy yeddi Ɓiɗɗo, yeddi Baabiraawo boo. Mo seedi o anndi Ɓiɗɗo, anndi Baabiraawo boo.

²⁴ Ngam man, onon kam, sey on njogo ko on nani diga fuɗɗam. To ko on nani diga fuɗɗam tabiti nder ɓerɗe mooɗon, onon boo on tabitan nder kawtal bee Ɓiɗɗo e Baabiraawo.

²⁵ Ndaa iinawol ngol o iinani en: Ɗum ngeendam nduumiiɗam.

²⁶ Mi winndani on ɗu'um dow ɗaɓɓanɓe selnugo on.

²⁷ Ammaa onon, Ruuhu mo keɓɗon diga Almasiihu ɗon jooɗi nder mooɗon, on ngalaa haaje goɗɗo ekkitina on, ngam Ruuhu go ɗon ekkitina on koo ɗume fuu, ɗon ekkitina gooŋga, naa fewre. Ngam maajum mbaɗe ko o ekkitini on, tabite nder kawtal bee Almasiihu.

²⁸ Jonta, ɓikkoy am, tabite nder kawtal bee Almasiihu ngam haa en mara hoolɗinaare to o waŋgi, taa en cemta yeeso maako nyannde loraaki maako.

²⁹ Nde on anndi Almasiihu o adiliijo, anndite boo, koo moy huuwi kuuɗe adiliije, laatake ɓiŋngel Allah.