1 Tessaloniiki'en 2 - Fulfulde Bible

Kuugal Pol haa Tessaloniiki

¹ Deerɗiraaɓe, onon bee ko'e mooɗon on anndi garki amin haa mooɗon laataaki meere.

² On anndi hiddeko min ngara haa mooɗon, ɓe njarni min bone, ɓe kuɗi min haa Filippi. Ammaa Allah meeɗen semmbiɗini min, haa min anndina on Linjiila maako koo nder haɓre saatunde boo.

³ Waazu amin daraaki dow numooji pewe malla dow anniyaaji kalluɗi, min ɗaɓɓataa ƴoyrugo yimɓe boo.

⁴ Allah linyi min, yerdi min, halfini min Linjiila mum. Jonta to min ɗon mbolwa, naa ngam haa min pottana yimɓe, ammaa ngam min pottana Allah, linyoowo ɓerɗe amin.

⁵ Ngam man on anndi min meeɗaay wolwango goɗɗo bee bolle belɗe, walaa suuno saawi nder bolle amin boo. Allah woni ceedoowo min!

⁶ Min ɗaɓɓaay tedduŋgal haa yimɓe, koo haa mooɗon koo haa woɗɓe.

⁷ Fakat, min mbaawanno hollugo on maŋngu amin, ngam min nelaaɓe Almasiihu. Ammaa min keewi yaŋkinaare caka mooɗon, bana daada kakkilananɗo ɓiyum'en.

⁸ Daliila enɗam amin ngam mooɗon, min ɗonno taaski hokkugo on naa Linjiila tan, ammaa koo yoŋkiiji amin boo. Bana nii yiide amin ɗuuɗiri ngam mooɗon.

⁹ Onon deerɗiraaɓe, on ɗon ciftora torra amin e comri amin. Saa'i min ɗonno ngaazina on Linjiila, min kuuwi jemma e naaŋge fuu ngam nguure amin, ngam taa min teddana koo gooto mooɗon.

¹⁰ Min njooɗi caka mooɗon min laaɓɓe, min adili'en, min ngalaa feloore. Onon ngoni seedooɓe min, Allah boo seedanto min.

¹¹ On anndi boo min laatani koo moy mooɗon bana baaba e ɓiyum'en.

¹² Min cemmbiɗini on, min tiɗɗini on, min umri on ngam haa on ngeeɗa fodde ngeendam ɗam fottanta Allah, mo ewni on haa on nasta laamu muuɗum e tedduŋgal muuɗum.

¹³ Min ɗon ngetta Allah tum fahin dow huunde woore: Ngam saa'i min ngaazini on wolde maako, on njaɓaay nde bana wolde neɗɗo, ammaa fakat bana nde Allah. Kayre nden huuwata nder mooɗon, onon nuɗɗinɓe.

¹⁴ Onon deerɗiraaɓe, on laati bana jama'aaje nuɗɗinɓe nder Yahudiya, wonɓe nder Yeesu Almasiihu, ngam on njari bone haa juuɗe yimɓe asŋgol mooɗon bana kamɓe boo ɓe njariri bone haa juuɗe Yahuudu'en.

¹⁵ Yahuudu'en ɓe'e mbari Jawmiraawo meeɗen Yeesu e annabi'en, ɓe toonyi min boo. Ɓe pottantaa Allah, ɓe laati konne'en yimɓe fuu,

¹⁶ ngam ɓe ɗon kaɗa min anndingo yimɓe ummaatooje goɗɗe habaru kisndam maɓɓe. Bana nii ɓe ɗon tokko hebbitingo hakkeeji maɓɓe wakkati fuu. Ammaa haa ragare man, tikkere Allah ukkani ɓe.

Saklere Pol

¹⁷ Onon deerɗiraaɓe, neeɓi en ngiidaay, ammaa min accaay numugo dow mooɗon. Min ngeli ɗuuɗɗum haa min keɓa yi'ugo on fahin.

¹⁸ Min ngiɗno lortaago haa mooɗon. Min Pol, mi yiɗno waɗgo ɗum naa nde woore tan, ammaa Sayɗaanu haɗi min.

¹⁹ Fakat, onon on laatake daliila tammunde amin e seyo amin. Saa'i Jawmiraawo meeɗen Yeesu loroto, on laatanto min meetaleewol jaalorgal, ngol min mantorto yeeso maako.

²⁰ Fakat, onon ngoni daliila tedduŋgal amin e seyo amin.