1 Samuyila 8 - Fulfulde Bible

Isra'iila'en ɗaɓɓi laamiiɗo

¹ Nde Samuyila ndottidi, o waɗi ɓiɓɓe maako alkaali'en dow Isra'iila.

² Innde afo maako Yo'el, innde ɗiɗaɓo boo Abiya. Kamɓe ɓe alkaali'en haa Biirsaba.

³ Ammaa ɓe tokkaaki misaalu baaba maɓɓe. Ɓe ɗaɓɓi riba, ɓe njaɓi ngeenaari zammba, ɓe cottini gooŋga wakkati kiita boo.

⁴ Ngam maajum ndotti'en Isra'iila fuu mooɓti, ngari haa Samuyila haa Rama.

⁵ Ɓe mbi'i mo: “Ndaa, a ndottidi, ɓiɓɓe ma tokkataako misaalu ma. Kadi, waɗan min laamiiɗo fodde al'aada ummaatooje fuu. Kaŋko o waɗana min kiita.”

⁶ Haala ka seynaay Samuyila. O ƴami Jawmiraawo,

⁷ ammaa kaŋko o jaabi Samuyila: “Waɗ ko ɓe mbi'i ma fuu. Naa an ɓe ngudini, ammaa ɓe ngudini yam min, ngam taa mi laamano ɓe.

⁸ Diga ngurtinmi ɓe lesdi Misra haa wargo hannde ɓe acci yam haa ɓe ndewa ɗowanteeɓe woɗɓe. Ko ɓe mbaɗi yam foroy, kanjum ɓe mbaɗete an boo.

⁹ Kadi nanan ɓe, ammaa faamtin ɓe booɗɗum no goɗɗo laamiiɗo laamoranto ɓe.”

¹⁰ Bolle Jawmiraawo ɗe'e fuu, Samuyila yecci ɗe ummaatoore nde ƴamno mo laamiiɗo.

¹¹ O wi'i ɓe: “Annde ko laamiiɗo ɗaɓɓata haa mooɗon: O hoo'an ɓiɓɓe mon worɓe, o jo'ina woɗɓe maɓɓe dow moota pucci maako, woɗɓe laato wa'iiɓe pucci maako, woɗɓe boo njaha yeeso moota pucci maako bee kosɗe.

¹² O waɗan woɗɓe hoore'en dow honooɓe ujineere malla dow cappanɗe njowo, woɗɓe boo ndema gese maako, mooɓta ƴaamle maako malla ɓe mbaɗana mo balmi e ko mootaaji pucci e pucci mari haaje.

¹³ O hoo'an ɓiɓɓe mon rewɓe boo, ɓe laato jillooɓe uurle malla defooɓe malla tamsooɓe haa saare maako.

¹⁴ O hoo'an gese mon ɓurɗe wooɗugo, demetirle mon e gese inabooje e gese jaytunje, o hokka ɗe saraaki'en maako.

¹⁵ O hoo'an zakka haa ɓenndalooje gese mon fuu ngam haa o yoɓa saraaki'en maako e huuwooɓe maako.

¹⁶ O hoo'an huuwooɓe mon worɓe e rewɓe e suka'en mon suɓaaɓe e bamɗe mon, ngam humtugo haajeeji maako.

¹⁷ O hoo'an zakka haa dammooji mon, onon boo on fuu on laatoto maccuɓe maako.

¹⁸ To ɗum laatake bana nii, on mboyan ngam daliila laamiiɗo mo ɗaɓɓoton hannde. On mboyanan Jawmiraawo, ammaa kaŋko o nanantaa on nyalaade maajum.”

¹⁹ Ammaa yimɓe cali nanango Samuyila. Ɓe mbi'i: “Naa non! Sey min keɓa laamiiɗo

²⁰ haa nannden bee ummaatooje goɗɗe fuu. Kaŋko o waɗana min kiita, o ardo min nder konuuji.”

²¹ Samuyila nani ko ɓe mbi'i fuu, yecci ɗum Jawmiraawo.

²² Jawmiraawo wi'i mo: “Waɗ ko ɓe ngiɗi, waɗan ɓe laamiiɗo.” Nden Samuyila wi'i ɓe ɓe koota, koo moy haa wuro mum.