1 Samuyila 6 - Fulfulde Bible

Filisti'en lorni sundukru alkawal

¹ Sundukru alkawal Jawmiraawo faɓɓi nder lesdi Filisti'en lebbi joweeɗiɗi.

² Filisti'en mooɓti liman'en e hiila'en fuu, ƴami ɓe: “Ko mbaɗeten bee sundukru Jawmiraawo? E noy lornirten ndu?”

³ Ɓe njaabi: “Fakat, to on ɗon lorna sundukru ɗowanteeɗo Isra'iila'en, taa lorne ndu sookru. Nelde dokkal bee maaru ngam ittuki hakkeeji mon haa on njamɗita. Bana non anndirton daliila ka o accaay hiitaago on.”

⁴ Yimɓe ƴami: “Ɗume haani en njoɓa?” Ɓe njaabi: “Suuraaji ɓuule kaŋŋeeri jowi e doombi kaŋŋeeri jowi, gootel gootel ngam berniwol fuu. Ngam masiibo gooto ukkani berniiji Filisti'en jowi bee laamiiɓe muuɗum'en fuu.

⁵ Mbaɗe suuraaji ɓuule mon e suuraaji doombi bonnanɗi lesdi mon, nelde ɗi haa ɗowanteeɗo Isra'iila'en ngam haa teddinon mo. Teema o hoynanan on e ɗowanteeɓe mon e lesdi mon tikkere maako.

⁶ Taa caatine ko'e mon bana Misra'en e Firawna ɓooyma. Allah saatani ɓe haa ɓe njoofi Isra'iila'en.

⁷ Kadi, mbaɗe moota kesa nga ga'i, koo'e na'i musininooji ɗiɗi ɗi meeɗaay kaɓɓirgal tawon, kaɓɓe ɗi haa moota man. Kooce nyalbi maaji, lorne ɗi haa saare.

⁸ Nden koo'e sundukru Jawmiraawo, njo'ine ndu dow moota man, non boo akootiyel bee dokkal kuuje kaŋŋeeri go ngam ittuki hakkeeji mon. Ɓaawo maajum acce sundukru, ndu dilla.

⁹ Ndaare ndu booɗɗum. To ndu yehi gal Bayti-Semes, laawol lesdi maaru, nden kam ɗum Jawmiraawo neldi en sarru maŋngu ngu'u. To ndu yehi laawol feere, en anndan naa kaŋko hiiti en, ammaa ɗum hoddiroore non.”

¹⁰ Filisti'en mbaɗi bana nii. Ɓe koo'i na'i musininooji ɗiɗi, ɓe kaɓɓi ɗi yeeso moota, ammaa nyalbi maaji ɓe maɓɓi ɗi haa saare.

¹¹ Nden ɓe njo'ini sundukru Jawmiraawo dow moota man, non boo akootiyel bee doombi kaŋŋeeri e suuraaji ɓuule maɓɓe.

¹² Na'i tokki laawol yahugo Bayti-Semes, ɗi ɗon mboya, ɗi celaay haa juŋngo nyaamo malla nano sam. Laamiiɓe Filisti'en tokki ɗi haa njotti keerol Bayti-Semes.

¹³ Yimɓe berniwol maajum ɗonno coda alkamaari nder waadiwol. Nde ɓe ɓaŋgti gite maɓɓe, ɓe ngi'i sundukru alkawal, ɓe ceyi.

¹⁴ Moota na'i yotti ngesa Yosuwa, goɗɗo Bayti-Semes, dari ton, woodino hayre mawnde wonnde ton. Yimɓe Bayti-Semes ta'i leɗɗe moota, lii'ani Jawmiraawo na'i ɗiɗi fuu guleteeɗi goɗɗi.

¹⁵ Lewi'en njippini sundukru Jawmiraawo e akootiyel bee kuuje kaŋŋeeri go. Ɓe njo'ini ɗum dow hayre mawnde man. Nyannde man yimɓe Bayti-Semes lii'ani Jawmiraawo guleteeɗi e kirseteeɗi.

¹⁶ Laamiiɓe Filisti'en njowo ndaari ɗum fuu, nden ɓe kooti nyalaade maajum haa Ekuruun.

¹⁷ Filisti'en nelduno Jawmiraawo suuraaji ɓuule kaŋŋeeri jowi ngam ittuki hakkeeji muuɗum'en, gootel gootel ngam berniiji muuɗum'en Asdod e Gaaza e Askalon e Gaat e Ekuruun.

¹⁸ Doombi kaŋŋeeri ɓuri ɗuuɗugo, wooru wooru ngam berniiji nder maral laamiiɓe Filisti'en njowo fuu, diga berniwol cemmbiɗŋgol haa gure haa yotti hayre mawnde kommbi Bayti-Semes nder ngesa Yosuwa. Dow hayre man ɓe njo'inno sundukru alkawal. Nde ɗon ton haa wargo hannde.

¹⁹ Jawmiraawo mbari worɓe cappanɗe njoweeɗiɗo nder yimɓe Bayti-Semes ujine cappanɗe njowo (50.000), ngam ɓe njurni sundukru maako. Yimɓe fuu cuni ngam kiita Jawmiraawo ka'a.

²⁰ Ɓe mbi'i: “Moy foti daraago yeeso Jawmiraawo, yeeso Allah Ceniiɗo oo? Ndikka sundukru maako yaha nokkuure feere. Ammaa haa toy?”

²¹ Ɓe neli nelaaɓe haa Kiriyat-Ye'arim, ɓe mbi'a yimɓe ton: “Filisti'en ngartiri sundukru Jawmiraawo. Ngare, njahre ndu haa mooɗon.”