1 Samuyila 27 - Fulfulde Bible

Daawuda jooɗi caka Filisti'en

¹ Daawuda numi: “Nyannde feere Sawulu mbaratam. Ndikka mi daɗa, mi heɓa hisrude haa lesdi Filisti'en. Nden kam Sawulu accan tefugo yam koo toy nder Isra'iila.”

² Daawuda ummi, kaŋko e worɓe teemeɗɗe njoweego (600) wonduɓe bee maako, ɓe njehi haa Akis ɓii Ma'ok, laamiiɗo Gaat.

³ Ɓe njooɗi ton, koo moy bee saare mum. Rewɓe Daawuda ɗiɗo boo ɗon ton, Ahino'am mo Yisre'el e Abigayel mo Karmel, laatinooɗo debbo Nabal.

⁴ Nde Sawulu nani Daawuda ɗon haa Gaat, o acci tefugo mo.

⁵ Daawuda wi'i Akis: “To a yerdake yam, accu mi yaha berniwol ma gootol, mi jooɗo ton. Walaa haaje mi jooɗodo bee maaɗa nder berniwol laamiiɗo, barkaama.”

⁶ Nyalaade maajum Akis hokki mo Cikilak. Ngam maajum laamiiɓe Yahuuda mari Cikilak haa wargo hannde.

⁷ Daawuda faɓɓi nder lesdi Filisti'en nduuɓu e lebbi nayi.

⁸ Wakkati maajum Daawuda e worɓe mum ɗon njaha, ɗon ukkano Gesuri'en e Gijiri'en e Amaleki'en, jooɗiiɓe haa lesdi man diga ɓooyma, haa yotti Sura e lesdi Misra.

⁹ Haa Daawuda yahata fuu, o halka worɓe e rewɓe, o hooca dammooji e na'i e bamɗe e geelooɗi e limce. Nden o lora haa Akis.

¹⁰ Akis ƴama mo: “Toy njahɗon hippugo jonta?” Nden Daawuda jaaba: “Haa Lesdi Fombina, lesdi Yahuuda” malla “Haa Lesdi Fombina, lesdi Yerahameeli'en”, maaboo “Haa Lesdi Fombina, lesdi Keni'en.”

¹¹ Daawuda accaay koo moy, o waddaay worɓe e rewɓe naŋngaaɓe haa Gaat boo, ngam taa goɗɗo yecca Filisti'en ko Daawuda e worɓe mum mbaɗi. Saa'i o ɗon jooɗi haa lesdi Filisti'en, nii non o waarata.

¹² Akis nuɗɗini Daawuda ngam o numi: “Daawuda wartiri hoore mum o ganyaaɗo haa yimɓe maako Isra'iila'en, doole o huuwanammi haa foroy.”