1 Samuyila 24 - Fulfulde Bible

Daawuda semtini Sawulu

¹ Daawuda wa'i, nyukki haa En-Gedi nder gasi.

² Nde Sawulu warti diga haɓre bee Filisti'en, o nani Daawuda ɗon nder ladde haa En-Gedi.

³ Sawulu hoo'i honooɓe ujine tato (3.000), suɓaaɓe nder Isra'iila fuu, nden o yehi haa o ɗaɓɓita Daawuda e worɓe mum haa Tapaare-Be'i kooseeje.

⁴ O wari haa baalɗe dammooji kommbi laawol. Lowol ɗon ton. O nasti ngol ngam waɗugo haaje maako. Daawuda e worɓe mum ɗonno njooɗi ton.

⁵ Worɓe Daawuda mbi'i: “Hannde woni nyalaade nde Jawmiraawo wi'i ma: Ndaa, mi hokkete konneejo ma haa juŋngo ma. Waɗ mo ko fottani ma.” Daawuda ɓaditi Sawulu bee sirri, ta'i gawargal limce maako seɗɗa.

⁶ Ammaa ɓaawoɗon ɓernde maako de'itaay ngam ko o waɗino.

⁷ O wi'i worɓe maako: “Jawmiraawo haɗam ɗum, taa mi meema jaagorɗo am. Ngam kaŋko woni laamiiɗo mo Jawmiraawo suɓi.”

⁸ Bee bolle ɗe'e o haɗiri yimɓe maako ngam taa ɓe ukkano Sawulu. Nde Sawulu wurti lowol man,

⁹ Daawuda boo wurti, ewni Sawulu. O wi'i: “Laamiiɗo am, barkaama.” Sawulu yeesiti. Daawuda tuggi koppi, turi yeeso maako,

¹⁰ wi'i: “Ngam ɗume a nananta yimɓe wi'anɓe ma mi yiɗi halkugo ma?

¹¹ Hanndeere nde'e ngi'ɗa bee gite ma no Jawmiraawo hokki ma nder juŋngo am, haa ton nder lowol. Yimɓe am mbi'i yam mi mbare, ammaa mi acci ma. Mi sali naawnugo jaagorɗo am, ngam an woni laamiiɗo mo Jawmiraawo suɓi.

¹² Baaba am, laar gawargal limce ma haa juŋngo am. Koyɗum mi mbaranno ma, ammaa mi ta'i gawargal limce ma tan. Faamu mi tuurtanaay ma, mi ɗaɓɓataa waɗugo ma halleende. Mi waɗaay ma aybe, ammaa an a ɗon looho yam haa mbara mi.

¹³ Jawmiraawo hiito hakkunde am bee maaɗa. Kaŋko o waato halleende nde mbaɗɗa mi, ammaa min mi ɓaŋgtataa juŋngo am dow maaɗa.

¹⁴ A anndi geccawol kaakiraaɓe men: Halleende kam, haa halluɓe iwata. Kadi min mi meemataa ma.

¹⁵ Anndu ko mbaɗata. Moy a taasnata? Laamiiɗo Isra'iila ɗon taasna rawaandu waatndu, asee, pilpilyel o taasnata!

¹⁶ Mi accan kiita haa juŋngo Jawmiraawo, haa o hiito hakkunde am bee maaɗa. Kaŋko o gooŋɗinammi, o hisnammi juŋngo ma.”

¹⁷ Nde Daawuda timmini wolwugo, Sawulu ƴami mo: “Fakat ɗum an na, Daawuda, ɓiŋngel am?” Sawulu ɓaŋgti sawtu, fuɗɗi woyugo.

¹⁸ Nden o wi'i Daawuda: “A semtini yam. A waɗani yam mbooɗeeŋga, ammaa min mi waɗi ma halleende.

¹⁹ Hannde mbooɗeeŋga ma waŋgi, ngam Jawmiraawo nastinno yam juŋngo ma, ammaa a acci yam, a mbaraay yam.

²⁰ Nde noy ɗum laatoto haa goɗɗo tawa konneejo mum, acca mo o dilla jam? Jawmiraawo warjo ma mbooɗeeŋga ma dow am hannde.

²¹ Jonta anndumi a laatoto laamiiɗo fakat, laamu Isra'iila tabitan haa juŋngo ma.

²² Ammaa hunoranam bee Jawmiraawo, a halkataa danygol am, ngam taa innde am majja nder saare baaba am.”

²³ Daawuda huni dow maajum. Nden Sawulu hooti saare mum, Daawuda e yimɓe mum boo lori haa gasol muuɗum'en nder kooseeje.