1 Samuyila 18 - Fulfulde Bible

Daawuda e Yonatan coobiri

¹ Nde bolidal Sawulu bee Daawuda timmi, ɓernde Yonatan ɓii Sawulu fuɗɗi yiɗugo Daawuda masin. O yiɗi mo bana yoŋki maako.

² Nyalaade maajum Sawulu accaay Daawuda hoota saare baaba mum, ammaa o jogiti mo.

³ Yonatan e Daawuda kaɓɓi alkawal soobiraaku, ngam Yonatan yiɗi mo bana o yiɗiri yoŋki maako.

⁴ Yonatan ɓorti ngapaleewol mum, hokki ngol Daawuda. O hokki mo limce maako e kaafahi maako e lagaawal maako e taadorgol maako fuu.

⁵ Koo toy Sawulu neli Daawuda fuu, o yehi, o heɓi jaalorgal. Ngam maajum Sawulu darni mo dow jama'aare konu muuɗum. Saraaki'en Sawulu e yimɓe fuu ngerdi mo.

Sawulu haaji Daawuda

⁶ Ɓaawo Daawuda jaali Filistiijo go, nde jama'aare konu ɗonno hoota, rewɓe ngurti berniiji e gure Isra'iila fuu ngam fottugo bee laamiiɗo Sawulu. Ɓe ɗon piya moolooji e bawɗi, ɓe ɗon ngama, ɓe ɗon ngimnda mo.

⁷ Nder gimol maɓɓe ɓe ɗon mbi'a: “Sawulu mbari ujineere, ammaa Daawuda ujine sappo.”

⁸ Sawulu seyoraaki gimol man, o tikki masin. O numi: “Sey ujineere tan ɓe ndokki yam, ammaa kaŋko ɓe ndokki mo ujine sappo. Walaa ko luttani mo heɓugo, sey laamu.”

⁹ Nyalaade maajum Sawulu fuɗɗi laarugo Daawuda bee gite kalluɗe e kaajal.

¹⁰ Jaŋngo maajum ruuhuwol kalluŋgol iwŋgol haa Allah jippi dow Sawulu, o wolwi nder saare maako bana ginnaaɗo. Daawuda fuɗɗi fiyugo moolooru bana nyalɗe goɗɗe. Sawulu ɗonno jogi labbo mum.

¹¹ Nden o ɓaŋgti labbo ngo, o wi'i: “Sey mi tigga Daawuda haa mahol”, sakkini ngo boo. Ammaa Daawuda ruuɗi ngo nde ɗiɗi.

¹² Sawulu fuɗɗi hulugo Daawuda, ngam Jawmiraawo ɗon wondi bee maako, acci Sawulu.

¹³ Ngam maajum Sawulu daayni Daawuda, waɗi mo hooreejo dow honooɓe ujineere. Daawuda ardi yimɓe mum nder haɓre,

¹⁴ heɓi jaalorgal nder kuuɗe mum fuu, ngam Jawmiraawo ɗon wondi bee maako.

¹⁵ Nde Sawulu yi'i ɗum, o tokki hulugo Daawuda.

¹⁶ Ammaa koo moy nder Isra'iila e nder Yahuuda yiɗi Daawuda ngam o ardiiɗo booɗɗo.

Daawuda ɓaŋgi ɓii Sawulu debbo

¹⁷ Sawulu wi'i Daawuda: “Mi hokkete Meerab, ɓiyam debbo mawniraajo, a ɓaŋga mo. Ammaa sey a huuwanammi, a haɓa bee konne'en Jawmiraawo.” Sawulu numi: “Walaa haaje juŋngo am meema mo, ndikka Filisti'en mbara mo.”

¹⁸ Daawuda jaabi mo: “Min kam mi moy? Ɓeye ngoni banndiraaɓe am e asŋgol amin nder Isra'iila? Mi fotaay mi laato esiraawo laamiiɗo.”

¹⁹ Nde nyalaade ɓaŋgal waɗi, Daawuda ɓaŋgaay Meerab ngam Sawulu te'ni mo haa Adiriyel, goɗɗo iwɗo Mehola.

²⁰ Ammaa Mikal ɓii Sawulu debbo minyiraajo, yiɗi Daawuda. Nde Sawulu nani haala maajum, o seyi.

²¹ O numi: “Mi accan Daawuda ɓaŋga mo, haa o laatano mo tuuforgol, Filisti'en boo mbara mo.” Ngam maajum o wi'i Daawuda ɗiɗawre: “Hannde a laatoto esam.”

²² Sawulu umri saraaki'en mum: “Mbolwane Daawuda bee sirri, mbi'e mo: A anndi laamiiɗo ɗon yerdi ma, yimɓe maako fuu boo ngiɗi ma, esir bee maako kadi.”

²³ Saraaki'en mbolwani Daawuda bana nii. Daawuda jaabi ɓe: “On tammi esirgo bee laamiiɗo ɗum koyɗum na? Naa mi leesɗo, talakaajo na?”

²⁴ Kamɓe ɓe anndini ɗum Sawulu.

²⁵ O umri ɓe ɓe mbi'a Daawuda: “Laamiiɗo ɗaɓɓataa sadaaki haa maaɗa, sey lare saadooniiku Filisti'en teemerre, ngam waataago konne'en muuɗum.” Ammaa o nufi halkugo Daawuda bee juuɗe Filisti'en.

²⁶ Saraaki'en ngecci Daawuda haala man fuu. Ɗum fottani mo o laato esiraawo laamiiɗo. Diga nyalaade ɓaŋgal siwaa,

²⁷ Daawuda yehi bee worɓe mum, ɓe mbari Filisti'en teemeɗɗe ɗiɗo. O yahrani laamiiɗo lare saadooniiku maɓɓe, o limani mo ɗe gootal gootal. Nden Sawulu hokki mo ɓiɗɗo mum Mikal, o laato debbo maako.

²⁸ Sawulu faami bee laaɓɗum Jawmiraawo ɗon wondi bee Daawuda. O faami boo ɓiyiiko debbo yiɗi Daawuda.

²⁹ Ngam maajum o tokki hulugo mo, o laati ganyo maako haa foroy.

³⁰ Ardiiɓe Filisti'en tokki haɓugo bee Isra'iila'en. Nde haɓre waɗi fuu, Daawuda ɓura saraaki'en woɗɓe jaalaago. Ngam daliila man innde maako laati teddunde.