1 Samuyila 17 - Fulfulde Bible

Goliyat janci Isra'iila'en

¹ Filisti'en mooɓti jama'aare konu muuɗum'en haa Soko nder lesdi Yahuuda. Ɓe caŋngini haa Efes-Damiima, hakkunde Soko bee Azeka.

² Sawulu e Isra'iila'en boo mooɓi, ɓe caŋngini nder waadiwol leɗɗe mawɗe. Ɓe mbaɗi caffuuji ngam haɓugo bee Filisti'en.

³ Filisti'en ndari dow hooseere to, Isra'iila'en boo dow hooseere ɗo, waadiwol ɗon hakkunde maɓɓe.

⁴ Soojeejo manaaɗo wurti saŋngeere Filisti'en. Innde maako Goliyat, o iwɗo Gaat. Darnde maako baakin meetir tati.

⁵ Hufneere maako e sulkewol maako fuu ɗum njamndi mboɗeeri. Teddeeŋga sulke man, baakin kilo cappanɗe joweego.

⁶ O woodi jamɗe boɗeeje haa korle maako. Dow balawal maako boo, o wakki jaaral njamndi mboɗeeri.

⁷ Kalasal labbo maako nanndi bee leggal cannyirgal. Ceeɓndi labbo maako ɗum njamndi ɓaleeri, teddeeŋga maari baakin kilo joweeɗiɗi. Goɗɗo feere ardi mo, ɗon roondi wawarde mawnde.

⁸ Goliyat dari, telɓani caffuuji Isra'iila'en, wi'i: “Ngam ɗume mbaɗɗon caffuuji konu? Min mi Filistiijo, onon boo on maccuɓe Sawulu. Cuɓe gooto nder mooɗon, o wara, o haɓa bee am.

⁹ To o waawti yam, o mbari yam, min laatoto maccuɓe mon. Ammaa to min mi jaalake mo, mi mbari mo, nden kam onon on laatoto maccuɓe amin, on kuuwana min.”

¹⁰ Nden o fuɗɗi jancugo caffuuji konu Isra'iila'en, o wi'i: “On nani ko mbi'mi na? Ngadde goɗɗo gooto haa min kaɓa.”

¹¹ Nde Sawulu e Isra'iila'en nani bolle ɗe'e, ɓe ndiwtori, ɓe kuli masin.

Daawuda nder saŋngeere Isra'iila'en

^12-14 Daawuda go, o gaajiijo Yessa mo asŋgol Efrata haa Baytilaama nder lesdi Yahuuda. Yessa, o ndottiijo saa'i man. O woodi ɓiɓɓe njoweetato. Mawniraaɓe maɓɓe tato, Eliyabu e Abinadabu e Samma tokkino Sawulu haa konu.

¹⁵ Saa'i feere feere Daawuda ɗon ummo haa saare Sawulu, ɗon hoota, ngam durugo dammooji baaba mum haa Baytilaama.

¹⁶ Ammaa Filistiijo go ɗon wara fajiri e kiikiiɗe fuu, ɗon tiitotira bee Isra'iila'en, nyalɗe cappanɗe nayi.

¹⁷ Nyannde feere Yessa wi'i Daawuda: “Yah haa deerɗiraaɓe ma haa saŋngeere konu. Yahran ɓe buhuuyel gabbe ca'aaɗe e tamseeje sappo.

¹⁸ Hoo'u boo leeɓi sappo ngam mawɗo honooɓe ujineere. Laar no deerɗiraaɓe ma mba'i, ƴam njamu maɓɓe. Jaɓ huunde koo ndeye haa maɓɓe, waddanam nde ngam seedaago fakat a yi'i ɓe, a tawi ɓe ɓe yamɓe.

¹⁹ Ɓe ɗon ngondi bee Sawulu e worɓe Isra'iila fuu ngam haɓre nder waadiwol Leɗɗe-mawɗe.”

²⁰ Jaŋngo maajum Daawuda dawi cub, acci dammooji haa juŋngo aynoowo. O hoo'i kuuje go, o yehi bana baaba maako umruno mo. Nde o yotti saŋngeere, Isra'iila'en ɗon ngurto, ɗon ndarna caffuuji, ɗon mbaɗa gookaali konu.

²¹ Caffuuji Isra'iila'en e ɗi Filisti'en ɗon tiitotiri.

²² Daawuda acci kuuje mum haa juŋngo aynoowo doŋgle, doggi haa deerɗiraaɓe mum wonɓe nokkuure haɓre, ƴami ɓe njamu maɓɓe.

²³ Saa'i o ɗon wolida bee maɓɓe, Goliyat Filistiijo go wari fahin, dari yeeso caffuuji Filisti'en, lorniti ko o wolwuno go. Daawuda nani ɗum.

²⁴ Worɓe Isra'iila, nde ngi'i Goliyat, ɓe fuu ɓe kultori masin, ɓe ndoggi.

²⁵ Ɓe mbi'mbi'tiri: “A yi'i mo na? Ndaa mo ɗon wara! Kayya no o jancirta Isra'iila! Koo moy mbari Goliyat, laamiiɗo riskinan mo, te'nan mo ɓiyiiko debbo. Saare baaba maako boo rimɗan e jomorli fuu.”

²⁶ Daawuda ƴami worɓe dariiɓe kommbi muuɗum: “Mbarjaari ndiye mbaranɗo Filistiijo oo, ittanɗo mbustu dow Isra'iila heɓata? Moy saadooniijo oo haa o janca caffuuji konu Allah geeto?”

²⁷ Yimɓe mbolwani mo haala mbarjaari go fahin.

²⁸ Eliyabu, mawniiko nani mo o ɗon wolida bee yimɓe. O tikki, o wi'i Daawuda: “Ko mbaɗata ɗo? A acci dammooji men pamari nder ladde. Moy aynata ɗi jonta? Mi anndi ma, a elewɗo, bonɗo. A wari laarugo haɓre non.”

²⁹ Daawuda jaabi: “Ko mbaɗmi kadi? Walaa koo ɗume, sey ƴamugo ƴamɗe.”

³⁰ Nden o wayliti, o ƴami goɗɗo feere. Kaŋko o jaabi mo bana naane.

Daawuda haɓi bee Goliyat

³¹ Worɓe woɗɓe nani bolle Daawuda, anndini ɗum Sawulu. Kaŋko o neli ɗaɓɓugo mo.

³² Daawuda wari, wi'i Sawulu: “Taa goɗɗo hula Filistiijo oo, barkaama. Min mi yahan haɓugo bee maako.”

³³ Sawulu wi'i: “A fotaay ngam haɓre man, ngam a derkeejo tawon. Ammaa kaŋko o cemmbiɗɗo, annduɗo haɓre diga sukaaku maako.”

³⁴ Daawuda wi'i: “Barkaama, saa'i mi ɗon dura dammooji baaba am, koo ndeye mbarooga malla ɓoodu feere wari, naŋngi jawgel haa tokkere,

³⁵ mi taasna ɗum, mi mbara ɗum, mi hisna jawgel man diga hunnduko mum. To nga ummani yam, mi naŋnga nga wakkude, mi mbara nga.

³⁶ Mi waawti barooɗe e ɓoodi goɗɗi fuu. Filistiijo saadooniijo oo laatoto bana maaje, ngam o janci caffuuji konu Allah geeto.

³⁷ Jawmiraawo hisni yam jagge barooɗe e ɓoodi goɗɗi, o hisnatam juŋngo Filistiijo oo boo.” Sawulu wi'i Daawuda: “Booɗɗum, yah, Jawmiraawo wondu bee ma.”

³⁸ Nden o hoo'i sulkewol maako e hufneere njamndi, o ɓorni ɗum Daawuda.

³⁹ Daawuda wakki kaafahi Sawulu, nden o foondi yahugo ngam o woowaay kuuje ɗe'e. O wi'i Sawulu: “Mi meeɗaay kuuje konu tawon, mi waawaay yahugo bee maaje.” O ɓorti ɗe,

⁴⁰ o hoo'i sawru maako haa juŋngo, o suɓti kaa'e ɓorwuɗe jowi nder maayel, o waati ɗe nder booro maako. Nden o naŋngi piwlol maako, o yehi ngam fottugo bee Filistiijo go.

Daawuda jaali Goliyat

⁴¹ Goliyat ɓaditi Daawuda, jogiiɗo wawarde maako ardi mo.

⁴² Nde o waawi yi'ugo Daawuda laaɓɗum, o yawi mo ngam Daawuda o suka mo he'aay yahugo konu tawon, o boɗeejo, o ŋarniiɗo.

⁴³ Goliyat telɓani mo: “Koni ngarɗa haa am bee sawru? Mi rawaandu na?” O naalori Daawuda bee labbi maako fuu.

⁴⁴ Nden o janci mo: “War, haa mi nyaamna colli e kuuje ladde kusel ma.”

⁴⁵ Daawuda jaabi mo: “An a wari dow am bee kaafahi e labbo e jaaral. Min kam mi wari bee innde Jawmiraawo honooɓe asama, Allah caffuuji Isra'iila. Kaŋko njancuɗa.

⁴⁶ Ngam maajum o nastinte hannde haa juŋngo am. Mi mbarete, mi ta'an hoore ma. Ɓalli honooɓe Filisti'en, mi hokkan ɗi colli e kuuje ladde. Nden kam duniyaaru fuu anndan Allah ɗon haa Isra'iila.

⁴⁷ Mooɓtiiɓe haa ɗo fuu anndan Jawmiraawo walaa haaje kaafahi malla labbo ngam hisnugo yimɓe mum. Haɓre nde'e ɗum haɓre Jawmiraawo, o hokkan min on haa juuɗe amin.”

⁴⁸ Nden Filistiijo ɓaditi ngam fottugo bee Daawuda. Daawuda boo yaawɗi, doggi ngam fottugo bee maako,

⁴⁹ hoo'i hayre haa booro mum, waɗi nde haa piwlol, fiɗi Goliyat haa tiinde. Hayre nasti tiinde maako, o do'i dow yeeso maako haa lesdi.

⁵⁰ Bana nii Daawuda jaalori Filistiijo bee piwlol e hayre, mbari mo. O walaa kaafahi.

⁵¹ Nden Daawuda yaawɗi, dari dow maako, losi kaafahi maako, ta'i hoore maako. Nde Filisti'en ngi'i cemmbiɗɗo muuɗum'en maayi, ɓe ndoggi.

⁵² Yimɓe Isra'iila e Yahuuda ummi, mbaɗi gookaali haɓre, taasni ɓe haa njotti haa waadiwol, koo haa dammuɗe Ekuruun boo. Filisti'en mbaraaɓe ɗon mbaali haa laawol jahranŋgol haa Saarayim haa Gaat e Ekuruun.

⁵³ Nde Isra'iila'en timmini taasnugo Filisti'en, ɓe lori, ɓe nyaami saŋngeere maɓɓe.

⁵⁴ Daawuda hoo'i hoore Goliyat, ɓaawoɗon o yahri nde haa Urusaliima. Ammaa o resi balmi Filistiijo nder laymaaru maako.

⁵⁵ Nde Sawulu yi'i Daawuda ɗonno yaha ngam fottugo bee Filistiijo go, o ƴami Abineer, mawɗo honooɓe maako: “Suka oo o ɓii moy?” Abineer jaabi: “Fakat bana a geeto, barkaama, mi anndaa.”

⁵⁶ Laamiiɗo wi'i mo: “Heɓtu ɗum.”

⁵⁷ Nde Daawuda mbari Filistiijo, lorti nder saŋngeere, Abineer yahri mo yeeso Sawulu, hoore Goliyat ɗon haa juŋngo Daawuda.

⁵⁸ Sawulu ƴami mo: “An suka, moy woni baaba ma?” Daawuda jaabi: “Mi ɓii Yessa, maccuɗo ma haa Baytilaama.”