1 Samuyila 11 - Fulfulde Bible

Sawulu jaali Ammooni'en

¹ Nahas, laamiiɗo Ammooni'en wari, taari berniwol Yaabes nder lesdi Gile'at, kaŋko e jama'aare konu maako. Yimɓe Yaabes fuu mbi'i Nahas: “Haɓɓu alkawal bee amin, nden kam min laatoto maccuɓe ma.”

² Laamiiɗo Ammooni'en jaabi ɓe: “To on ngerdake mi itta koo moy mooɗon yiitere mum nyaamre, haa mi toska Isra'iila fuu, nden kam mi haɓɓan alkawal man bee mooɗon.”

³ Ndotti'en Yaabes mbi'i mo: “Accu min nyalɗe joweeɗiɗi, haa min nelda habaru koo toy nder Isra'iila. To kisnanɗo min walaa, nden kam min laatoto maccuɓe ma.”

⁴ Nelaaɓe ngari haa Gibiya, wuro Sawulu. Ɓe ngecci yimɓe haala man fuu. Yimɓe mboyi bee sawtu.

⁵ Saa'i maajum Sawulu warti diga ladde, o ɗon ɓaawo na'i maako. O ƴami: “Ngam ɗume yimɓe mboyata?” Ɓe ngecci mo bolle nelaaɓe Yaabes.

⁶ Nde Sawulu nani ɗum, Ruuhu Jawmiraawo wari dow maako, tikkere maako saati masin.

⁷ O hoo'i ga'i ɗiɗi, o ta'i ɗi geɓe geɓe, o neldi geɓe man koo toy nder Isra'iila. O umri nelaaɓe ɓe mbi'a: “Koo moy mo yahdaay bee Sawulu e Samuyila ngam haɓre, nii ga'i maako laatoto.” Jawmiraawo hulni Isra'iila'en fuu, haa ɓe fuu ɓe ngari bana goɗɗo gooto.

⁸ Sawulu laari ɓe haa Bezek, limi ɓe. Woodi yimɓe Isra'iila ujine teemeɗɗe tato (300.000) e yimɓe Yahuuda ujine cappanɗe tato (30.000).

⁹ Ɓe umri nelaaɓe Yaabes: “Mbi'e yimɓe berniwol mon: Jaŋngo, caka nyalawma, on kisan.” Ɓe njehi, ɓe ngecci ɗum yimɓe Yaabes. Kamɓe ɓe ceyi.

¹⁰ Ɓe mbi'i Nahas: “Jaŋngo min ngurtoto haa on mbaɗa min ko fottani on.”

¹¹ Jaŋngo maajum Sawulu senndi yimɓe mum mooɓe tati. Subaha ɓe ukkani saŋngeere Ammooni'en. Ɓe mbari Ammooni'en haa yotti caka nyalawma. Luttuɓe ndoggi, caŋkiti gooto gooto.

¹² Nde haɓre timmi, Isra'iila'en mbi'i Samuyila: “Toy saliiɓe Sawulu laamano en? Accide min bee maɓɓe haa min mbara ɓe.”

¹³ Ammaa Sawulu wi'i: “Walaa mbareteeɗo hannde! Ngam hannde Jawmiraawo hisni Isra'iila.”

¹⁴ Samuyila wi'i yimɓe: “Ngare, njahden haa Gilgal, en tabitina laamu ton.”

¹⁵ Yimɓe fuu njehi haa Gilgal. Yeeso Jawmiraawo ɓe mbaɗi Sawulu laamiiɗo. Kaŋko e Isra'iila'en fuu ɓe ceyi masin. Ɓe lii'ani Jawmiraawo kirseteeɗi ngam kawtal maɓɓe bee maako.