1 Piyer 2 - Fulfulde Bible

Hayre yeere, yimɓe senaaɓe

¹ Ngam man ngudine halleende fuu: Fewre, tufle, suuno bee nyoore fuu!

² Bana no ɓikkoy keccoy ngiɗiri kosam tum, onon boo ngiɗe wolde Allah gooŋgaare bana non, haa on mawna bee maare, on keɓa kisndam.

³ Ngam bana Deftere wi'i: “On metti mbooɗeeŋga Jawmiraawo.”

⁴ Ɓadite mo. O laati hayre yeere nde yimɓe meeriɗini, ammaa nde Allah suɓi ngam nde mari saman.

⁵ Onon boo bana kaa'e geete, laate mahruɗe haykaliiru Ruuhu Ceniiɗo. Laate liman'en senaaɓe haa lii'anon Allah kirseteeɗi pottananɗi mo barka Yeesu Almasiihu.

⁶ Ngam Deftere wi'i: “Mi jo'ini haa Siyona hayre talkumoore suɓaande, marnde saman, koo moy nuɗɗini mo semtintaake.”

⁷ Hayre nde'e laatanake nuɗɗinɓe mo saman ɗuuɗɗo. Ammaa haa sooyɓe nuɗɗinki: “Hayre nde mahooɓe ngudini, laati hayre talkumoore ɓurnde saman.”

⁸ Fahin Deftere wi'i: “Nde laatanake yimɓe hayre fergoore, tapaare do'oore ɓe.” Ɓe pergi dow maare ngam ɓe cali ɗowtanaago wolde Allah, kanjum Allah muuyani ɓe.

⁹ Ammaa onon ngoni asŋgol cuɓaaŋgol, liman'en laamiiɗo, yimɓe ummaatoore seniinde. Allah wurtini on nyiɓre, yahri on haa annoora maako kayɗiniika. O suɓi on haa on ngaazina kuuɗe maako booɗɗe.

¹⁰ Naane on laataaki yimɓe ummaatoore Allah, ammaa jonta on laatake yimɓe ummaatoore maako. Naane on anndaa enɗam Allah, ammaa jonta on keɓi enɗam maako.

Laate maccuɓe Allah

¹¹ Soobiraaɓe am, on laati bana hoɗɓe e jananɓe haa duniyaaru ndu'u. Ngam maajum mi ɗon waso on taa on accana suunooji ɓanndu laawol, ngam tum ɗi ɗon kona yoŋkiiji mooɗon.

¹² Sey joonde mooɗon caka heefeerɓe wooɗa ngam koo to ɓe ngulli on bee wi'go on halluɓe, ɓe ndaara kuuɗe mooɗon booɗɗe, nden ɓe teddina Allah nyannde loraaki maako.

¹³ Ngam daliila Jawmiraawo, leestane marɓe laamu nder duniyaaru. Ɗowtane laamiiɗo ngam o ɓuri luttuɓe maŋngu.

¹⁴ Ɗowtane ngomna'en, ngam ɓe nelaaɓe laamiiɗo haa ɓe kiito halluɓe, ɓe teddina wooɗɓe.

¹⁵ Ngam ndaa ko woni muuyo Allah: Bee kuuɗe booɗɗe ɗe on kuuwata, on nje'ina faataaɓe wolwanɓe bolle meereeje.

¹⁶ Jonta on rimɓe, ammaa taa cudde halleende koo ndeye bee ndimu ngu'u, laate maccuɓe Allah.

¹⁷ Teddine yimɓe fuu, ngiɗe deerɗiraaɓe nuɗɗinɓe, kule Allah, teddine laamiiɗo.

Almasiihu holli en no en njardata bone

¹⁸ Onon huuwanooɓe yimɓe, leestane jaagorɓe mooɗon, teddine ɓe koo ndeye. Taa mbaɗe ɗum haa wooɗɓe e ɗelma-gikku'en tan, ammaa koo haa saatuɓe boo.

¹⁹ Ɗum booɗɗum to on munyi naawɗum bone ko ɓe ukkanto on meere ngam daliila Allah.

²⁰ Ɗume munyal mooɗon nafata to on munyi piyɗe ɗe ɓe piyi on daliila aybeeji mooɗon? Ammaa to on munyi boneeji ɗi on njari ngam on mbaɗi ko wooɗi, ɗum fottanan Allah.

²¹ Ngam irin man Allah ewni on. Ngam Almasiihu bee hoore mum yari bone ngam mooɗon, o holli on misaalu ngam haa on tokko ngu.

²² O meeɗaay waɗugo hakke, fewre woodaa haa hunnduko maako.

²³ Nde ɓe kuɗi mo o huɗtaaki, nde o yari bone, o wi'aay o waatoto, ammaa o hokkiti hoore maako haa juŋngo Allah, kiitoowo adiliijo.

²⁴ Almasiihu bee hoore muuɗum roondi hakkeeji meeɗen haa ɓanndu muuɗum dow leggal, ngam haa en laato maayɓe heedi hakke, ammaa yeeɗɓe heedi adilaaku. Daliila kuuduuje maako en kurgaama.

²⁵ On laatakeno bana baali majjuɗi, ammaa on lorake haa gaynaako aynoowo yoŋkiiji mooɗon.