1 Laamiiɓe 9 - Fulfulde Bible

Jawmiraawo waŋgani Suleymaanu ɗiɗawre

¹ Nde Suleymaanu timmini mahugo haykaliiru Jawmiraawo e saare laamu e ko o waɗino anniya waɗugo fuu,

² Jawmiraawo waŋgani mo ɗiɗawre, bana o waŋgiranino mo haa Gibiyon.

³ Jawmiraawo wi'i mo: “Mi nani do'aare e tornde ma nde a tori yam. Mi seni haykaliiru ndu a mahani yam ngam tabitingo innde am ton foroy, mi hakkilanan ndu, mi woonanan on koo ndey.”

⁴ An boo, to a ɗowtanake yam bana baaba ma Daawuda bee ɓernde woore, darnunde, to a waɗi ko mi umri ma fuu, to a ɗowtanake farillaaji e kiitaaji am,

⁵ nden kam mi tabitinan leeso laamu maaɗa dow Isra'iila haa foroy, bana mi iinani baaba ma Daawuda. Mi wi'i mo: “Foroy goɗɗo danygol ma laamanto Isra'iila ɓaawo maaɗa.”

⁶ Ammaa an e ummaatoore ma e le'i mooɗon, to on ngaylitake, on acci yam, to on ɗowtanaaki umrooje e farillaaji am ɗi umrumi on, to on njehi, on ndewi ɗowanteeɓe woɗɓe, to on turi yeeso maɓɓe ngam sujidango ɓe,

⁷ mi halkan on, onon Isra'iila'en haa lesdi ndi mi hokki on e mi wudinan boo haykaliiru ndu mi seni ngam tedduŋgal innde am. Nden ummaatooje duniyaaru fuu njalan, njancan Isra'iila'en.

⁸ Haykaliiru woondu ndu'u laatoto winnde, koo moy caalotooɗo haa kommbi maaru, wemmboto, jancan. O wi'an: Ngam ɗume Jawmiraawo waɗi lesdi ndi'i e haykaliiru ndu'u bana nii?

⁹ Nden ɓe njaaboto mo: “Ngam ɓe ngudini Jawmiraawo, Allah maɓɓe mo wurtini baabiraaɓe maɓɓe lesdi Misra, ɓe tokki ɗowanteeɓe woɗɓe, ɓe cujidani ɓe, ɓe ndewi ɓe. Ngam maajum Jawmiraawo ukkani ɓe sarru ngu'u fuu.”

Kuuɗe Suleymaanu goɗɗe

¹⁰ Nder duuɓi noogas Suleymaanu timmini kuuɗe nyiɓaalo, saare mum e haykaliiru Jawmiraawo.

¹¹ Hiram, laamiiɗo Tirus, walliri Suleymaanu bee leɗɗe cemmbiɗɗe e leɗɗe booɗɗe, bee kaŋŋeeri boo fodde ko o ɗaɓɓi fuu. Nde duuɓi maajum timmi, laamiiɗo Suleymaanu hokki Hiram berniiji noogas nder lesdi Galiili.

¹² Hiram wari diga Tirus haa o laara berniiji ɗi Suleymaanu hokkuno mo. Ammaa ɗi pottanaay mo.

¹³ O wi'i: “Ɗume berniiji ɗi ndokkuɗa mi ɗi'i deerɗam?” Ngam maajum ɓe mbi'i ɗi lesdi Kabul haa wargo hannde.

¹⁴ Alhaali boo, Hiram neldanino laamiiɗo Suleymaanu kaŋŋeeri baakin kilo ujine tati e teemeɗɗe joweego (3.600).

¹⁵ Ndaa nii haala huuwooɓe kuuɗe dooleeje wa'i: Laamiiɗo Suleymaanu huuwtiniri ɓe ngam mahugo haykaliiru Jawmiraawo e saare laamu e Millo e mahol taariiŋgol Urusaliima e Hacoor e Megiddo e Gezer

¹⁶ Firawna, laamiiɗo Misra, warino nyaami Gezer, o wuli ngol bee yiite, o mbari Kanaani'en jooɗiiɓe nder berniwol ngo'ol. Nden o hokki ngol ɓiyiiko, debbo Suleymaanu bana dokkal ɓaŋgal.

¹⁷ Ngam maajum, Suleymaanu mahi Gezer e Baytihurun-les

¹⁸ e Ba'alat e Tamar haa nokkuure hamaadaare,

¹⁹ non boo berniiji Suleymaanu cigorɗi fuu e berniiji ngam mootaaji pucci e berniiji ngam wa'otooɓe pucci e ɗum ko Suleymaanu yiɗno nyiɓugo haa Urusaliima, dow hooseere Libanon e lesdi nder laamu muuɗum fuu.

²⁰ Yimɓe luttuɓe nder Amoori'en e Heti'en e Perezzi'en e Hewi'en e Yebusi'en, ɓe iwaay haa Isra'iila'en,

²¹ waato danygol maɓɓe ngol lutti nder lesdi ngam Isra'iila'en mbaawaay nattingo ɓe, ɗum kamɓe Suleymaanu huuwni ɓe kuuɗe dooleeje, non ɓe ngoni haa wargo hannde.

²² Ammaa Isra'iila'en kam, Suleymaanu waɗaay ɓe maccuɓe. Kamɓe ɓe laati honooɓe e saraaki'en maako e ardiiɓe e umrooɓe maako e hoore'en dow mootaaji pucci maako e wa'otooɓe ɗi.

²³ Worɓe teemeɗɗe njowo e cappanɗe njowo (550) ngoni ardiiɓe wakiili'en dow kuuɗe Suleymaanu, kamɓe ɓe kakkilani huuwooɓe.

²⁴ Ɓaawo ɓii Firawna debbo wurti Berniwol Daawuda, nasti suudu muuɗum ndu Suleymaanu mahani mo, ɓaawo maajum Suleymaanu mahi Millo.

²⁵ Hitaande fuu nde tati Suleymaanu ɗon lii'o guleteeɗi e kirseteeɗi ngam kawtal yimɓe bee Allah dow hirsirde nde o nyiɓani Jawmiraawo. O ɗon waɗa boo uureteeɗum yeeso Jawmiraawo. Non o timminiri mahugo haykaliiru.

²⁶ Laamiiɗo Suleymaanu waɗi boo koommbooje haa Esiyon-Geber baŋnge Elat haa fomoonde Maayo Maaliya nder lesdi Edoom.

²⁷ Laamiiɗo Hiram neldi laamiiɗo Suleymaanu huuwooɓe, waawɓe laanyugo koommbooje dow mbeela, ngam ɗoftugo huuwooɓe Suleymaanu.

²⁸ Ɓe njotti Ofir, ton ɓe ɗaɓɓiti kaŋŋeeri, ɓe ngaddani ndi laamiiɗo Suleymaanu, baakin kilo ujine sappo e ɗiɗi e teemeɗɗe joweego (12.600).