1 Laamiiɓe 8 - Fulfulde Bible

Suleymaanu yahri sundukru alkawal nder haykaliiru

¹ Nden laamiiɗo Suleymaanu mooɓti ndotti'en Isra'iila, ardiiɓe le'i e baaba-ci'e'en Isra'iila fuu haa Urusaliima, ngam haa o hoo'oya sundukru alkawal Jawmiraawo diga Berniwol Daawuda, bi'eteeŋgol Siyona.

² Worɓe Isra'iila fuu mooɓti haa laamiiɗo Suleymaanu nder lewru Etaniim, waato lewru joweeɗiɗaɓru, ɗum saa'i juulde.

³ Ndotti'en Isra'iila fuu ngari, nden liman'en efti sundukru.

⁴ Liman'en e Lewi'en njahri sundukru alkawal Jawmiraawo, non boo laymaaru fottirde e kuuje cenaaɗe gonɗe nder laymaaru man fuu.

⁵ Laamiiɗo Suleymaanu e jama'aare Isra'iila mooɓtiinde haa maako fuu, ɓe ɗon yeeso sundukru. Ɓe lii'ani Jawmiraawo baali e ga'i kirseteeɗi ɗuuɗɗi masin, goɗɗo waawataa limugo ɗi.

⁶ Ɓaawoɗon liman'en nastini sundukru alkawal Jawmiraawo haa nokkuure taaskitinaande ngam maaru nder suudu sakkitiindu, waato suudu ɓurndu senaago, les bileeji Keruba'en.

⁷ Ngam Keruba'en ɗon mbeeɗi bileeji muuɗum'en dow nokkuure taaskitinaande ngam sundukru, ngam ɗuwaago sundukru e cabbi maaru.

⁸ Cabbi man njuuti masin. To goɗɗo darake nder suudu seniindu yeeso suudu sundukru, o yi'an ko'e maaji. Ammaa haa yaasi ɗi ngi'ataake. Sundukru ndu'u ɗon ton haa wargo hannde.

⁹ Walaa koo ɗume nder maaru, sey alluhaaje kaa'e ɗiɗi ɗe Muusa wallinno nder maaru, ɗum alluhaaje ɗe o jaɓno haa hooseere Horeb, nde Jawmiraawo haɓɓi alkawal bee Isra'iila'en ɓaawo gurtaaki maɓɓe diga Misra.

¹⁰ Nde liman'en ngurti suudu seniindu ndu'u, ruulde hebbini haykaliiru Jawmiraawo.

¹¹ Liman'en mbaawaay daraago ngam huuwugo kuugal maɓɓe daliila ruulde, ngam tedduŋgal Jawmiraawo hebbini haykaliiru.

Cenki haykaliiru

¹² Nden Suleymaanu wi'i: “Yaa Jawmiraawo, a wi'i a jooɗoto nder nyiɓre ɓaleere.

¹³ Jonta mi nyiɓani ma suudu woondu masin, ndu laato jooɗorde maaɗa haa foroy.”

¹⁴ Nden laamiiɗo yeesiti, barkiɗini yimɓe jama'aare Isra'iila fuu, saa'i ɓe ɗon ndari.

¹⁵ Nden o wi'i: “Mi yetti Jawmiraawo Allah Isra'iila! Bee baawɗe maako o hebbitini ko o iinani baaba am Daawuda. Ndaa ko o wi'i mo:

¹⁶ Diga nyalaade nde mi wurtini yimɓe ummaatoore am Isra'iila nder lesdi Misra, mi meeɗaay suɓugo berniwol koo gootol caka berniiji le'i Isra'iila, ngam haa ɓe mahanammi haykaliiru ngam haa innde am wona ton. Ammaa mi suɓi ma an Daawuda ngam laamanaago ummaatoore am Isra'iila.”

¹⁷ Suleymaanu tokki wi'ugo: Baaba am Daawuda waɗno anniya mahugo haykaliiru, o sena ndu ngam Jawmiraawo Allah Isra'iila.

¹⁸ Ammaa Jawmiraawo wi'i mo: A waɗi anniya mbooɗka ngam mahango yam haykaliiru.

¹⁹ Ammaa naa an mahantammi ndu, ɗum ɓiɗɗo ma tammi mahango yam ndu.

²⁰ Bana nii Suleymaanu tokki wi'ugo: “Jawmiraawo hebbitini iinawol muuɗum. Mi jooɗake dow leeso laamu baaba am Daawuda, mi laamanake Isra'iila bana Jawmiraawo wi'no. Mi mahi haykaliiru ndu'u, mi seni ndu ngam Jawmiraawo Allah Isra'iila.

²¹ Mi taaskitini nokkuure nder maaru ngam sundukru marndu kuuje alkawal. Ɗum alkawal ngal Jawmiraawo haɓɓuno bee baabiraaɓe meeɗen, nde o wurtini ɓe lesdi Misra.”

²² Nden Suleymaanu dari yeeso hirsirde Jawmiraawo, jama'aare Isra'iila fuu ɗon laara. O weeɗi juuɗe maako gal asama,

²³ o wi'i: “Yaa Jawmiraawo Allah Isra'iila, walaa mo nanndi bee ma, koo haa asama, koo haa lesdi. An a ɗon hakkilani alkawal ma bee hoolaare ngam maccuɓe ma, ɗowtantooɓe ma bee ɓernde woore.

²⁴ A waɗani baaba am Daawuda, maccuɗo ma ko a iinani mo. Ko a wolwani mo, an bee hoore ma a hebbitini ɗum hannde.

²⁵ Jonta boo, yaa Jawmiraawo Allah Isra'iila, hebbitinan maccuɗo ma, baaba am Daawuda, ko a iinani mo. A wi'i: To yimɓe danygol ma ɗowtani yam bana an a ɗowtani yam, foroy gooto caka maɓɓe jooɗoto yeeso am, dow leeso laamu ɓaawo maaɗa, o laamanto ummaatoore Isra'iila.

²⁶ Ngam maajum, yaa Allah Isra'iila, mi tori ma hebbitin jonta iinawol ngol a iinani maccuɗo ma, baaba am Daawuda.

²⁷ Ammaa yaa Allah, gooŋga a jooɗoto haa lesdi na? Ndaa, asamanji fuu, koo asamanji ɓurɗi towugo ke'ataa ma jooɗaago, sakko suudu ndu mi mahani ma!

²⁸ Ammaa, yaa Jawmiraawo Allah am, waylita gal am, nan tornde e do'aare am, heɗita wookaandu e do'aare maccuɗo ma hannde.

²⁹ Aynu haykaliiru ndu'u jemma e naaŋge, ngam ɗum nokkuure nde a wi'i: Innde am wonan ton. Nan tornde nde mi ɗon tore diga ɗo.

³⁰ Nan tornde am e nde Isra'iila'en, ummaatoore ma toroto ma haa nokkuure nde'e. Yaa Jawmiraawo gonɗo haa asama, nan tornde amin haa ngonɗa ton e yaafa min.

³¹ To goɗɗo waɗani keeddiɗɗum hakke, to ɓe mbi'i sey o huno hunayeere bee naaloore, to o wari hunaago yeeso hirsirde nder haykaliiru ma,

³² an, yaa Jawmiraawo gonɗo haa asama, nan tornde amin, waɗan maccuɓe ma kiita, ngam haa aybuɗo hiite, aybe man loro dow maako e gooŋgaajo waŋga o laaɓɗo.

³³ To konne'en njaalake yimɓe ma Isra'iila'en ngam ɓe mbaɗi hakke dow ma, to ɓe torake ma yaafuye, to ɓe maŋgti ma, to ɓe torake ma nder haykaliiru ndu'u,

³⁴ an, yaa Jawmiraawo gonɗo haa asama, nanan ɓe, yaafa hakkeeji maɓɓe, hokkitit ɓe lesdi ndi a hokkuno kaakiraaɓe maɓɓe ɓooyma.

³⁵ To asama maɓɓake, iyeende walaa ngam ɓe mbaɗi hakke dow ma, to ɓe ngari ɓe tori ma haa nokkuure nde'e, ɓe maŋgti ma e to ɓe leesni ko'e maɓɓe, ɓe tuubi, ɓe acci waɗugo hakke,

³⁶ an, yaa Jawmiraawo gonɗo haa asama, nanan ɓe, yaafa hakkeeji maɓɓe, ngam ɓe maccuɓe ma e ɗum ummaatoore ma, fahin ekkitin ɓe haa ɓe tokko laawol darnuŋgol, nden a toɓnana ɓe iyeende dow lesdi ndi a marni ɓe.

³⁷ To weelo waɗi nder lesdi malla nyawu kalluŋgu ndaaɓoowu saŋkitake nder lesdi, to alkamaari yoori malla nyoli, to baɓɓatti malla ndo'uuji ɗuuɗɗi ngari, to konne'en kippake Isra'iila'en haa berniiji muuɗum'en, to masiibo waɗi malla nyawu koo nguye,

³⁸ to koo moy nder Isra'iila'en, ummaatoore ma nasti nder saklere, o toroto ma, to o weeɗi juuɗe maako gal haykaliiru ndu'u ngam toraago ma,

³⁹ an, yaa Jawmiraawo jooɗiiɗo haa asama, nanan mo, yaafa mo, wallu mo, waɗan koo moy fodde kuuɗe mum, nde a anndi ɓernde maako. Ngam an feere ma anndi ɓerɗe ɓiɓɓe Aadama fuu.

⁴⁰ Waɗ ɗum ngam haa Isra'iila'en kule tum saa'i ɓe ngeeɗata nder lesdi ndi a hokki baabiraaɓe amin fuu.

⁴¹ Nde ɓe mbolwata dow innde ma teddunde e baawɗe mawɗe ɗe a ɗon huuwra,

⁴² koo ummaatooje jananne nanan ɗum, nden to jananno mo laataaki goɗɗo caka Isra'iila'en ummaatoore ma, wari diga lesdi ndaayiindi ngam toraago ma nder haykaliiru ndu'u,

⁴³ an, yaa Jawmiraawo jooɗiiɗo haa asama, nanan mo, hokku mo ko o tori, haa ummaatooje duniyaaru fuu annde ɓe ekkito ɗowtanaago ma bana Isra'iila ummaatoore ma ɗowtorante, ɓe annda boo haykaliiru ndu mi mahi, fakat mi lii'anake ma ndu.

⁴⁴ To yimɓe ummaatoore ma ndilli haɓoygo bee konne'en muuɗum'en, dow laawol ngol nelata ɓe, to ɓe ngaylitake gal berniwol ngol a suɓi e haykaliiru ndu mi mahani ma, to ɓe torake ma,

⁴⁵ an jooɗiiɗo haa asama, nan do'aare maɓɓe e tornde maɓɓe, wallu ɓe.

⁴⁶ To Isra'iila'en mbaɗi sooynde ɗowtaare haa yeeso ma, ngam walaa goɗɗo mo waɗataa sooynde ɗowtaare sam, teema a tikkanan ɓe, a hokkan ɓe haa konne'en e a accan ɓe haa ɓe ndaha ɓe haa lesdi ɓadiindi malla daayiindi,

⁴⁷ nden, to haa lesdi ndi ɓe laatake maccuɓe, ɓe numti, ɓe puɗɗi toraago ma bee wi'go: Min mbaɗi sooynde ɗowtaare, min mbaɗi hakke, min aybuɓe!

⁴⁸ To ɓe tori ma yaafuye bee ɓerɗe maɓɓe fuu e bee yoŋkiiji maɓɓe fuu caka konne'en maɓɓe haa lesdi ndi ɓe laatake maccuɓe, to ɓe ngaylitake gal lesdi ndi a hokki baabiraaɓe maɓɓe, gal berniwol ngol a suɓi e gal haykaliiru ndu mi mahani ma, to ɓe torake ma,

⁴⁹ nden, an jooɗiiɗo haa asama, nan do'aare maɓɓe e tornde maɓɓe, war wallu ɓe,

⁵⁰ yaafana yimɓe ma hakkeeji ɗi ɓe mbaɗi dow ma e sooynde ɗowtaare maɓɓe yeeso ma, hokku konne'en maɓɓe laawol enɗugo ɓe.

⁵¹ Ngam ɓe ummaatoore ma e maral ma. A wurtini ɓe Misra diga boneeji naawɗi.

⁵² Yaa Jawmiraawo Allah, hakkilan min, nan tornde nde min e Isra'iila ummaatoore ma toroto ma, nde min mboyata haa yeeso ma fuu.

⁵³ Ngam an suɓi min caka ummaatooje duniyaaru fuu ngam haa min ngona ummaatoore ma, bana a wi'no bee hunnduko jaggiiɗo ma Muusa, nde a wurtini baabiraaɓe amin lesdi Misra.”

⁵⁴ Nde Suleymaanu timmini waɗugo do'aare e tornde mum fuu haa Jawmiraawo, o ummi yeeso hirsirde Jawmiraawo, o acci tuggugo koppi e weeɗugo juuɗe maako gal asama.

⁵⁵ O dari, o barkiɗini jama'aare Isra'iila fuu bee sawtu, o wi'i:

⁵⁶ “Yettoore laatano Jawmiraawo dokkuɗo yimɓe muuɗum Isra'iila'en siwtaare fodde ko o wolwino fuu. O hebbitini barkaaji ɗi o iinino bee hunnduko jaggiiɗo maako Muusa, walaa ko lutti.

⁵⁷ Jonta mi ɗon toro Jawmiraawo, Allah meeɗen, o wonda bee meeɗen bana o wonduno bee baabiraaɓe meeɗen, taa o wudina en, taa o acca wallugo en.

⁵⁸ Ammaa o huucitina ɓerɗe meeɗen haa maako ngam haa en tokko laabi maako, en kakkilana umrooje maako e farillaaji maako e kiitaaji maako ɗi o umri baabiraaɓe meeɗen.

⁵⁹ Jemma e nyalawma fuu Jawmiraawo siftoran bolle am ɗe mi tori yeeso maako, ngam haa o walla en nde weeti fuu, o walla on onon ummaatoore maako e o wallammi, min maccuɗo maako.

⁶⁰ Bana nii ummaatooje duniyaaru fuu anndan Jawmiraawo feere muuɗum woni Allah, walaa Allah feere sam.

⁶¹ Bee ɓernde woore, tokke farillaaji Jawmiraawo Allah meeɗen, kakkilane umrooje maako, bana ko waɗi hannde.”

⁶² Nden laamiiɗo e Isra'iila'en wonduɓe bee muuɗum fuu lii'ani Jawmiraawo kirseteeɗi.

⁶³ Suleymaanu lii'ani Jawmiraawo kirseteeɗi ga'i ujine noogas e ɗiɗi (22.000) e dammooji ujine teemerre e noogas (120.000) ngam kawtal yimɓe bee Allah. Bana non laamiiɗo e Isra'iila'en fuu ceniri haykaliiru Jawmiraawo.

⁶⁴ Nyalaade maajum laamiiɗo seni nokkuure caka babal yeeso haykaliiru Jawmiraawo, ngam ton o lii'i guleteeɗi e dokke nyaamdu e ɓellere kirsaaɗi ngam kawtal yimɓe bee Allah, ammaa hirsirde njamndi mboɗeeri famɗi, waawaay jogaago guleteeɗi e dokke nyaamdu e ɓellere kirsaaɗi ngam kawtal yimɓe.

⁶⁵ Saa'i maajum Suleymaanu waɗi juulde haykaliiru, kaŋko e Isra'iila'en fuu, ɓe ɗuuɗɓe, ɓe ngari diga nastirde Hamat haa yotti maayel Misra. Ɓe mbaɗi juulde yeeso Jawmiraawo Allah nyalɗe joweeɗiɗi. Ɓaawo maajum ɓe mbaɗi juulde feere, nyalɗe joweeɗiɗi goɗɗe.

⁶⁶ Nyannde joweetataɓre laamiiɗo wi'i yimɓe koota. Ɓe torani mo barka, ɓe kooti, ɓerɗe maɓɓe keewi seyo ngam Jawmiraawo woonani jaggiiɗo muuɗum Daawuda e yimɓe muuɗum Isra'iila'en fuu.