1 Laamiiɓe 6 - Fulfulde Bible

Suleymaanu mahani Jawmiraawo haykaliiru

¹ Nder nduuɓu teemeɗɗe nayi e cappanɗe joweetataɓu ɓaawo gurtaaki Isra'iila'en diga lesdi Misra, nder nduuɓu laamu Suleymaanu dow Isra'iila nayaɓu, lewru ɗiɗaɓru wi'eteendu Ziw, laamiiɗo Suleymaanu fuɗɗi mahango Jawmiraawo haykaliiru.

² Haykaliiru ndu laamiiɗo Suleymaanu mahani Jawmiraawo, ndaa nii ndu wa'i: Njuutirka maaru meetir cappanɗe tati, njaajirka maaru meetir sappo, towirka maaru meetir 15.

³ Ɓe mbaɗi zawleeru haa yeeso suudu seniindu, njaajirka maaru meetir sappo bana haykaliiru man e njuutirka maaru boo meetir jowi.

⁴ Ɓe mbaɗi burɗe haa haykaliiru man, ɓe taarni ɗe bee leɗɗe, ɓe maɓɓi ɗe bee cabbi gaafaaɗi.

⁵ Suudu seniindu e suudu ɓurndu senaago, o taarni ɗum bee cuuɗi taytaaɗi. Cuuɗi maajum ɗakkotiri bee haykaliiru.

⁶ Towirka cuuɗi man senndaama geɓe tati. Yeɓre les, njaajirka maare meetir ɗiɗi bee reeta. Yeɓre caka, njaajirka maare meetir tati. Yeɓre dow boo, njaajirka maare meetir tati bee reeta. Ngam tekkeeŋga mahol haykaliiru tokki ustaago diga les haa dow, ngam taa tiitol yeɓre fuu nasta nder mahol haykaliiru.

⁷ Ɓe mahi haykaliiru man fuu bee kaa'e cehaaɗe haa nokkuure nde ɓe ceeki ɗe. Walaa mo nani hoolo tappirɗum malla cehirɗum malla hoolo baɗirɗum njamndi goɗɗum wakkati ɓe ɗon maha haykaliiru.

⁸ Nastirde cuuɗi taytaaɗi haa les ɗon heedi wakeere nyaamo haykaliiru. Ɓe mbaɗi ba'orɗe ngam wa'aago haa cuuɗi cakaaji e diga cuuɗi cakaaji boo haa cuuɗi dowji.

⁹ Suleymaanu mahi haykaliiru man fuu, ɓaawo lamsal, o waɗi soorowol maaru bee looci e kaataakooje leɗɗe cemmbiɗɗe.

¹⁰ O taarni haykaliiru man fuu bee taytaaji go, towirka yeɓre koo ndeye waɗi meetir ɗiɗi bee reeta. Geɓe maajum naŋngi suudu bee leɗɗe cemmbiɗɗe.

¹¹ Jawmiraawo wolwani Suleymaanu, o wi'i:

¹² “A ɗon mahanammi haykaliiru ndu'u. E to a tokkake farillaaji am e kiitaaji am e to a ɗowtanake umrooje am fuu, nden kam mi hebbitinan iinawol ngol mi iinani baaba ma Daawuda dow maaɗa.

¹³ Mi waran mi jooɗo caka mooɗon nder haykaliiru ndu e mi wudintaa Isra'iila ummaatoore am sam.”

¹⁴ Nde mahooɓe timmini mahugo haykaliiru, fodde umrooje Suleymaanu,

¹⁵ ɓe ɓasi mahdi nder bee leɗɗe cemmbiɗɗe, diga les haa dow. Ɓe cuddi taŋkol boo bee kaataakooje leɗɗe booɗɗe.

¹⁶ Ɓe ɓasi boo mahdi suudu sakkitiindu, waato suudu ɓurndu senaago, marndu meetir sappo bee leɗɗe cemmbiɗɗe, diga les haa dow. Ɓe mbo'itini nder haykaliiru bee kaataakooje leɗɗe cemmbiɗɗe, diga les haa dow.

¹⁷ Luttuɗum suudu, waato haykaliiru yeeso suudu ɓurndu senaago, waɗi meetir noogas.

¹⁸ Leɗɗe cemmbiɗɗe nder haykaliiru fuu ɓe mbaɗi suuraaji paali e suuraaji pinndi dow maaje. Ɗum fuu ɓe mbaɗi ɗum bee leɗɗe, haa suddi kaa'e fuu.

¹⁹ Ɓe mbo'itini suudu ɓurndu senaago ngam jo'ingo sundukru alkawal Jawmiraawo nder maaru.

²⁰ Njuutirka maaru meetir sappo, njaajirka maaru boo meetir sappo, towirka maaru boo meetir sappo. Ɓe ɓasi ndu bee kaŋŋeeri laaɓndi. Ɓe mbaɗi boo gulduɗum uurle bee leɗɗe cemmbiɗɗe.

²¹ Ɓe ɓasi nder suudu fuu bee kaŋŋeeri laaɓndi fodde umroore Suleymaanu. Yeeso suudu ɓurndu senaago boo, ɓe mbaɗi callalluuji kaŋŋeeri, nden ɓe ɓasi ndu bee kaŋŋeeri.

²² Ɓe ɓasi haykaliiru man fuu bee kaŋŋeeri. Non boo gulduɗum uurle yeeso suudu ɓurndu senaago, ɓe cuddi ɗum fuu bee kaŋŋeeri.

²³ Ɓe mbaɗi suuraaji Keruba'en ɗiɗo bee leɗɗe jaytunhi, ngam jo'ingo nder suudu ɓurndu senaago. Towirka maɓɓe meetir jowi.

²⁴ Njuutirka wileewo Keruba fuu, meetir ɗiɗi bee reeta. Diga seɓatto wileewo ngo haa ngoya, waɗi meetir jowi.

²⁵ Keruba'en man ɗiɗo fuu poti kal-kal. Darɗe maɓɓe e jaati maɓɓe fuu poti.

²⁶ Towirka Keruba fuu, meetir jowi. Keruba'en man ɗiɗo fuu poti kal-kal.

²⁷ Ɓe ndarni Keruba'en caka suudu ɓurndu senaago. Ɓe mbeeɗi bileeji keruba'en. Wileewo gooto meemi mahol ngo'ol, wileewo Keruba feere boo meemi mahol ngola, haa caka suudu boo bileeji maɓɓe meemindiri.

²⁸ Nden ɓe cuddi Keruba'en man bee kaŋŋeeri.

²⁹ Haa mahdi haykaliiru, waato haa mahdi cuuɗi man ɗiɗi fuu, ɓe mbaɗi suuraaji Keruba'en e dibinooje e pinndi dow maaji.

³⁰ Ɓe cuddi taŋkol suudu seniindu man bee kaŋŋeeri, non boo suudu ɓurndu senaago.

³¹ Ɓe mbaɗi dammugal suudu ɓurndu senaago bee pareeje ɗiɗi ɗe leggal jaytunhi. Darduɗe dammugal e tiinde maagal mbaɗi tolɗi jowi.

³² Ɓe mbaɗi suuraaji Keruba'en ɗiɗo e dibinooje e pinndi dow pareeje leɗɗe jaytunhi go, ɓe cuddi ɗum bee kaŋŋeeri, ɓe takki kaŋŋeeri dow keruba'en e dibinooje.

³³ Bana non boo ɓe mbaɗi darduɗe dammugal haykaliiru bee leɗɗe jaytunhi, bee tolɗi nayi.

³⁴ Ɓe mbaɗi pareeje maagal ɗiɗi bee leɗɗe booɗɗe, parewal fuu woodi ɗakke ɗiɗi ngam nyobbeego.

³⁵ Ɓe mbaɗi suuraaji keruba'en e dibinooje e pinndi nder maaje, ɓe cuddi ɗe bee kaŋŋeeri.

³⁶ Nden ɓe taarni daldal saare man bee kaa'e cehaaɗe ɓale tati e leɗɗe cemmbiɗɗe ɓalal gootal.

³⁷ Nder nduuɓu nayaɓu, nder lewru Ziw, ɓe mballini caɓɓawal ngam haykaliiru Jawmiraawo.

³⁸ Nder nduuɓu sappo e go'oowu, nder lewru Buul, waato lewru joweetataɓru, haykaliiru timmi bee geɓe maaru fuu, fodde taaskara maajum. Duuɓi joweeɗiɗi Suleymaanu mahri ndu.