1 Laamiiɓe 5 - Fulfulde Bible

Hikma e jeynitaare Suleymaanu

¹ Suleymaanu laamani laamuuji fuu diga maayo Efratis haa yotti lesdi Filisti'en e keerol Misra. Laamiiɓe ɓe'e ɗon ngaddana Suleymaanu jomorgol, ɓe ɗon kuuwana mo balɗe ngeendam maako fuu.

² Ndaa ko woni haaje nyaamdu saare Suleymaanu ngam nyalaade woore: Kuroori ɗiggundi buhuuje cappanɗe joweego e kuroori buhuuje teemerre e noogas,

³ ga'i payɗi sappo e na'i durdude noogas e baali teemerre e koobi e lelji e irin padali e colli payɗi.

⁴ Suleymaanu laamani lesdi hiirnaaŋge Efratis fuu, diga Tifsa haa Gaaza, o mari baawɗe dow laamiiɓe lesdi hiirnaaŋge Efratis fuu. O jooɗodi jam bee heeddiɗɗiraaɓe maako fuu.

⁵ Wakkati laamu Suleymaanu fuu, yimɓe Yahuuda e Isra'iila njooɗi jam nder lesɗe maɓɓe fuu. Koo moy mari inabooje e ibbi muuɗum, diga Dan haa yotti Beersaba.

Suleymaanu ɓurdi yimɓe fuu hikma

⁶ Suleymaanu woodi cuuɗi ujine cappanɗe nayi ngam pucci mootaaji maako, o woodi boo wa'otooɓe pucci ujine sappo e ɗiɗo.

⁷ Wakiili'en ɓeya go ɗon kakkilana nyaamdu laamiiɗo Suleymaanu e nyaamdanɓe bee muuɗum fuu, koo moy nde lewru mum yaalti, ɓe kakkilani mo ngam taa o sooya koo ɗume.

⁸ Non boo sa'iiruuri e huɗo ngam pucci ba'eteeɗi e pucci mootaaji, ɓe ɗon ngadda ɗum haa nokkuure nde koo moy maɓɓe halfina.

⁹ Allah hokki Suleymaanu hikma ɗuuɗka e faamu ɗuuɗŋgu e kuuje ɗe o yiɗi faamugo ɗuuɗi bana njaareendi haa maayo.

¹⁰ Hikma Suleymaanu ɓuri hikma yimɓe iwɓe haa laɗɗe fuunaaŋge e hikma Misra'en fuu mawnugo.

¹¹ O ɓurduɗo koo moy neɗɗo hikma, o ɓuri Etan Esrahiijo, o ɓuri boo Heman e Kalkol e Darda, ɓiɓɓe Maahol. Innde maako saŋkiti nder ummaatooje taariiɗe fuu.

¹² O waɗi balndi ujine tati, limgal gimi maako ujineere e jowi.

¹³ O wolwi haala leɗɗe, diga lekki cemmbiɗki haa Libanon haa haako isop ko wurtoto haa mahi. O wolwi boo haala dabbaaji e colli e ladooji e kuukon piiroohon e liɗɗi.

¹⁴ Diga ummaatooje fuu ɓe ngari ngam nanugo hikma Suleymaanu. Ɓe ngari diga laamiiɓe duniyaaru, meeɗɓe nanugo habaru hikma maako fuu.

Taaskara Suleymaanu ngam mahugo haykaliiru

¹⁵ Hiram, laamiiɗo Tirus neli sukaaɓe muuɗum haa Suleymaanu, ngam o nani ɓe moyti mo, ɓe mbaɗi mo laamiiɗo haa pellel baaba maako Daawuda. Hiram wonno soobaajo Daawuda wakkati ngeendam muuɗum fuu.

¹⁶ Suleymaanu boo neldi habaru haa Hiram, wi'i mo:

¹⁷ “A anndi baaba am Daawuda heɓaay mahango Jawmiraawo Allah maako suudu, ngam konne'en maako ɗonno ukkano mo koo gal toy fuu. Ammaa Jawmiraawo walli mo, o jaali ɓe.

¹⁸ Jonta Jawmiraawo Allah am siwtini yam, salaaman ɗon koo toy nder maral am, walaa konneejo lutti, walaa boo sarru.

¹⁹ Kadi, mi waɗi anniya nyiɓango Jawmiraawo Allah am haykaliiru. Ngam ndaa ko Jawmiraawo wi'i baaba am Daawuda: Ɓiɗɗo ma mo njo'inanmi dow leeso laamu maaɗa, kaŋko nyiɓantammi haykaliiru ngam innde am.

²⁰ Jonta kam, umru huuwooɓe ma ɓe pe'anammi leɗɗe cemmbiɗɗe haa Libanon. Huuwooɓe am ngaran ngam wallugo ɓe. Mi yoɓete ngeenaari huuwooɓe ma fodde ko a wi'ata yam fuu. Ngam a anndi walaa koo gooto caka amin waawi fe'ugo leɗɗe bana Sidoni'en.”

²¹ Nde Hiram nani bolle Suleymaanu, o seyi masin. O wi'i: “Yettoore laatano Jawmiraawo mo hokki Daawuda ɓiɗɗo marɗo hikma hannde ngam laamanaago ummaatoore mawnde nde'e.”

²² Nden Hiram neldi Suleymaanu jaawaabu ngu'u: “Mi jaɓi ko a ƴami yam. Mi hokkete leɗɗe cemmbiɗɗe e leɗɗe booɗɗe ɗe a ƴami yam fuu.

²³ Huuwooɓe am adoyan leɗɗe diga Libanon haa Mbeela. Ɓe kaɓɓan ɗe ngam ilnugo ɗe haa yotto nokkuure nde a anndinta yam. Ton, ɓe piistata ɗe, huuwooɓe ma ngara koocane ɗe. Ndaa ko ƴammaami, hokku yimɓe saare am nyaamdu.”

²⁴ Bana non Hiram neldi Suleymaanu leɗɗe cemmbiɗɗe e leɗɗe booɗɗe fodde ko o yiɗi.

²⁵ Suleymaanu boo hokki Hiram buhuuje alkamaari ujine cappanɗe nayi e nebbam ɗuuɗa samanjam liitir ujine nayi e teemeɗɗe nayi, ngam nyaamnugo saare muuɗum hitaande fuu.

²⁶ Jawmiraawo hokki Suleymaanu hikma, bana o wi'no mo. Suleymaanu jooɗodi bee Hiram nder narral e ɓe kaɓɓi boo alkawal hakkunde maɓɓe.

Suleymaanu taaski kuuɗe dooleeje

²⁷ Laamiiɗo Suleymaanu hoo'i huuwooɓe ujine cappanɗe tato nder Isra'iila fuu, ngam huuwugo kuuɗe dooleeje.

²⁸ Kala lewru fuu o ɗon nela nder yimɓe ɓe'e ujine sappo haa Libanon e ɓe kuuwa ton lewru les ardaaŋgal Adoram. Nden ɓe ngarta, ɓe ciwto lebbi ɗiɗi.

²⁹ Suleymaanu woodi boo roondooɓe ujine cappanɗe njoweeɗiɗo e sehooɓe kaa'e dow kooseeje boo, ujine cappanɗe njoweetato.

³⁰ Wakiili'en Suleymaanu cuɓi ardiiɓe ujine tato e teemeɗɗe tato, kamɓe ɓe kakkilani huuwooɓe kuugal.

³¹ Laamiiɗo umri ɓe ta'a kaa'e mawɗe, marɗe saman, ngam wallingo caɓɓaaje suudu bee kaa'e cehaaɗe.

³² Huuwooɓe Suleymaanu e ɓe Hiram e Gibili'en cehi ɗe, ɓe taaskitini leɗɗe e kaa'e ngam mahugo haykaliiru.