1 Laamiiɓe 18 - Fulfulde Bible

Eliya lori haa Akab

¹ Ɓaawo nyalɗe ɗuuɗɗe nder nduuɓu hokkere tataɓu, Jawmiraawo wolwani Eliya, wi'i: “Yah, hollu hoore ma haa Akab, mi toɓnan iyeende dow lesdi.”

² Eliya yehi ngam yi'nugo hoore mum haa Akab. Ammaa weelo saati nder Samariya.

³ Akab ewni Obadiya, kaliifaajo laamorde. Obadiya o kulɗo Jawmiraawo masin.

⁴ Naane, nde Izabel nattinino annabi'en Jawmiraawo, saa'i maajum Obadiya nyukkinino annabi'en teemerre, cappanɗe njowo cappanɗe njowo nder lowol, o wuurni ɓe bee nyaamdu e ndiyam.

⁵ Jonta Akab wi'i Obadiya: “Njehen laaroygo ceeɓooje e maahoy fuu nder lesdi, teema en keɓan huɗo ngam wuurnugo pucci e alfadariije, ngam taa en mbarda dabbaaji.”

⁶ Ɓe cenndi lesdi hakkunde maɓɓe ngam haa ɓe ndaara ndi. Akab yehi gal laawol ngo'ol, Obadiya boo yehi gal laawol ngola.

⁷ Nde Obadiya ɗon haa laawol, ndaa Eliya wari fotti bee maako. O annditi Eliya, o do'i dow yeeso maako, o wi'i: “Ɗum an na jaagorɗo am Eliya?”

⁸ Eliya wi'i mo: “Ɗum min! Yah, yeccu jaagorɗo ma: Eliya ɗon ɗo.”

⁹ Obadiya wi'i: “Hakke ɗume mbaɗmi, haa ndokka suka ma haa juŋngo Akab, o mbarammi?

¹⁰ Fakat bana Allah Jawmiraawo maaɗa o geeto, walaa ummaatoore koo laamu haa jaagorɗo am nelaay ngam ɗaɓɓitoygo ma. Nde ɓe mbi'i: O walaa ɗo, o hunni laamu maajum e ummaatoore maajum no ɓe ngi'aay ma.

¹¹ Jonta mbi'ɗa: Yah, yeccu jaagorɗo ma: Eliya ɗon ɗo.

¹² Ammaa to mi acci ma, Ruuhu Jawmiraawo eftete, yahrete haa mi anndaa. Min mi yottoto Akab, mi anndinan mo, o tawataa ma, nden kam o mbaratam. Min boo mi kulɗo Jawmiraawo diga mi derkeejo.

¹³ Malla ɓe anndinaay jaagorɗo am ko mi waɗi nde Izabel mbari annabi'en Jawmiraawo na? No mi nyukkiniri teemerre nder annabi'en Jawmiraawo, cappanɗe njowo cappanɗe njowo nder lowol? No mi wuurniri ɓe bee nyaamdu e ndiyam?

¹⁴ Ammaa an a ɗon wi'a: Yah, yeccu jaagorɗo ma, Eliya ɗon ɗo. O mbaratam!”

¹⁵ Ammaa Eliya wi'i: “Fakat bana Jawmiraawo honooɓe mo mi jagganto o geeto, hannde mi yi'nan hoore am haa Akab.”

¹⁶ Nden Obadiya dilli fotti bee Akab, o anndini mo ɗum. Akab boo yehi ngam fotta bee Eliya.

¹⁷ Nde o yi'i Eliya, o wi'i mo: “An mo fooɗani Isra'iila sarru, a wari na?”

¹⁸ Eliya jaabi: “Naa min fooɗani Isra'iila sarru, ɗum an e saare baaba ma! Ngam on acci umrooje Jawmiraawo, an boo a tokki Ba'alji.

¹⁹ Ammaa jonta neldu kubaruuji, mooɓtu Isra'iila fuu haa yeeso am dow hooseere Karmel. Mooɓtu boo annabi'en Ba'al teemeɗɗe nayo e cappanɗe njowo (450) e annabi'en Asera teemeɗɗe nayo (400), nyaamanɓe haa saare Izabel.”

²⁰ Nden Akab neli haa Isra'iila'en fuu, o mooɓti annabi'en go haa hooseere Karmel.

Jarribeeki dow hooseere Karmel

²¹ Eliya ɓaditi yimɓe ummaatoore, wi'i: “Haa ndey accoton tokkaago laabi ɗiɗi? To Jawmiraawo woni Allah, tokke mo! Ammaa to Ba'al boo, tokke ɗum!” Ammaa ummaatoore jaabaaki mo sam.

²² Fahin Eliya wi'i yimɓe: “Min feere am mi lutti mi annabiijo Jawmiraawo, ammaa annabi'en Ba'al, ɓe ɗon teemeɗɗe nayo e cappanɗe njowo (450).

²³ Ngadde kalhali ɗiɗi. Kamɓe ɓe cuɓa ngoori, ɓe kirsa ndi, ɓe ta'a kusel maari, ɓe mballina ta'e maari dow leɗɗe, ammaa taa ɓe kuɓɓa yiite. Min boo mi taaskitinan kalhaldi ngoɗndi, mi wallina ndi dow leɗɗe, ammaa mi huɓɓataa yiite.

²⁴ Nden ewne innde ɗowanteeɗo mooɗon, min boo mi ewnoto innde Jawmiraawo. Jaaboriiɗo bee yiite, kaŋko woni Allah gooŋga.” Yimɓe fuu mbi'i: “Koŋngol ngo'ol fotti.”

²⁵ Nden Eliya wi'i annabi'en Ba'al: “Cuɓe kalhaldi ndi ngiɗɗon, aarton, kirson onon, ngam on ɗuuɗɓe. Ewne innde ɗowanteeɗo mooɗon, ammaa taa kuɓɓe yiite.”

²⁶ Kamɓe ɓe koo'i kalhaldi maɓɓe, ɓe taaskitini ndi. Nden ɓe ewni innde Ba'al diga fajiri haa caka nyalawma, ɓe ɗon mbi'a: “Yaa Ba'al, jaaban min!” Ammaa jaawaabu walaa sam. Ɓe ɗon ngama, taaro hirsirde nde ɓe mbaɗno.

²⁷ Nde naaŋge waɗi caka, Eliya janci ɓe, wi'i: “Ewne ɗowanteeɗo mooɗon bee sawtu! Ngam ɗum ɗowanteeɗo, teema o ɗon numa malla o yehi ɓaawo suudu malla o dilli jahaaŋgal, teema o ɗon ɗaani, nden o finan.”

²⁸ Ɓe ewni bee sawtu, ɓe ƴari ɓalli maɓɓe bee kaafaaje e labbe fodde al'aada maɓɓe, haa ƴiiƴam ili.

²⁹ Nde naaŋge saalake caka, hakkiilooji maɓɓe njiiɓi, ɓe mbolwi bana yinnaaɓe wakkati lii'aaki dokkal nyaamdu. Ammaa walaa jaawaabu sam, walaa mo nanani ɓe.

³⁰ Nden Eliya wi'i yimɓe fuu: “Ɓaditeeɗam!” Yimɓe ɓaditi mo. O wo'itini hirsirde Jawmiraawo yibbinaande.

³¹ O hoo'i kaa'e sappo e ɗiɗi fodde limgal ɓiɓɓe Yaakubu mo Jawmiraawo wolwani, wi'i: “Innde ma laatoto Isra'iila.”

³² Bee kaa'e man o mahi hirsirde senaande ngam Jawmiraawo. O taarni nde gasol ngol hoosata baakin liitir sappo e jowi.

³³ Nden o yowi leɗɗe, o hirsi kalhaldi maako, o ta'i kusel maari, o wallini ta'e kusel man dow leɗɗe.

³⁴ O wi'i: “Kebbine looɗe nayi bee ndiyam, ndufe ɗam dow kusel guleteeŋgel e leɗɗe.” O wi'i: “Mbaɗe ɗum fahin.” Ɓe mbaɗi ɗum. O wi'i: “Mbaɗe ɗum fahin.” Ɓe mbaɗi ɗum, haa ɗum waɗi nde tati.

³⁵ Ndiyam ili, taari hirsirde, ɗam heewi gasol boo.

³⁶ Wakkati lii'aaki dokkal nyaamdu haa Allah, annabi Eliya ɓaditi hirsirde, wi'i: “Yaa Allah Jawmiraawo mo Ibrahiima e Isiyaaku e Isra'iila, sey ɓe annda hannde an woni Allah nder Isra'iila, min boo mi jaggiiɗo ma, mi waɗi ɗum fuu fodde wolde maaɗa.

³⁷ Jaabam, yaa Jawmiraawo, jaabam, haa yimɓe ɓe'e paama an, yaa Jawmiraawo, woni Allah gooŋga, an woni gartiranɗo ɓerɗe maɓɓe haa maaɗa.”

³⁸ Nden Jawmiraawo jippini yiite, nge wuli kusel bee leɗɗe e kaa'e e collaaje, nge yoorni ndiyam nder gasol.

³⁹ Nde yimɓe ummaatoore fuu ngi'i ɗum, ɓe cujidi, ɓe mbi'i: “Jawmiraawo woni Allah gooŋgaajo! Jawmiraawo woni Allah gooŋgaajo!”

⁴⁰ Nden Eliya wi'i ɓe: “Naŋnge annabi'en Ba'al. Koo gooto maɓɓe taa daɗa!” Ɓe naŋngi ɓe, Eliya yahri ɓe haa maayel Kison, o hirsi ɓe ton.

Tornde Eliya ngam iyeende

⁴¹ Nden Eliya wi'i Akab: “Yah, nyaam e yar, ngam mi ɗon nana hoolo bana toɓo iyeende.”

⁴² Akab dilli haa o nyaama, o yara, ammaa Eliya wa'i haa hooseere Karmel. O turi haa lesdi, o fali hoore maako caka koppi maako.

⁴³ Nden o wi'i suka maako: “Yah, laar gal mbeela.” O yehi, o laari, nden o wi'i: “Walaa koo ɗume.” Eliya wi'i: “Yah fahin.” O umri mo bana nii nde joweeɗiɗi.

⁴⁴ Joweeɗiɗawre man, sukaajo oo wi'i mo: “Ndaa, duulel bana newre juŋngo goɗɗo ɗon wurto nder mbeela.” Eliya wi'i: “Yah, yeccu Akab: Waɗ pucci haa moota ma, hootu ngam taa iyeende haɗe.”

⁴⁵ Saa'i maajum asama ɗon ɓalwira duule e henndu, iyeende saatunde waɗi. Akab wa'i dow moota puccu muuɗum, yehi Yisre'el.

⁴⁶ Ammaa Jawmiraawo semmbiɗini Eliya. O taadi, o doggi yeeso Akab haa o yotti Yisre'el.