1 Laamiiɓe 16 - Fulfulde Bible

¹ Jawmiraawo wolwani Yeehu ɓii Hanani dow Ba'asa, o wi'i:

² “Mi ɓaŋgti ma nder mbulwuldi, mi darni ma a ardiiɗo yimɓe am Isra'iila'en. Ammaa an a tokki laawol Yerobo'am, a nastini yimɓe am Isra'iila'en nder hakke, haa ɓe tikkini yam bee hakkeeji maɓɓe.

³ Ngam maajum, ndaa mi halkete an e saare ma, mi wartiran saare maaɗa bana saare Yerobo'am ɓii Nebat.

⁴ Goɗɗo saare ma to maayi nder berniwol, dawaaɗi nyaaman mo. To o maayi haa ladde boo, colli nyaaman mo.”

⁵ Luttuɗum haala Ba'asa, kuuɗe maako e baawɗe maako, ɗum winndaama nder Deftere Habaruuji Nyalaaɗe nde Laamiiɓe Isra'iila.

⁶ Ba'asa maayi, ɓe uwi mo haa Tirsa. Ɓiyiiko Ela laami haa pellel maako.

⁷ Bee hunnduko annabi Yeehu ɓii Hanani, wolde Jawmiraawo yahno dow Ba'asa e saare maako, ngam daliila halleende nde o waɗi yeeso Jawmiraawo, ngam o tikkini Jawmiraawo bee kuuɗe maako, bana saare Yerobo'am. Non boo ngam o mbari yimɓe saare Yerobo'am.

Laamu Ela

⁸ Nder nduuɓu laamu Asa noogas e joweego'oowu haa Yahuuda, Ela ɓii Ba'asa laami nder Isra'iila haa Tirsa. O laami duuɓi ɗiɗi.

⁹ Suka maako Zimiri, hooreejo dow reeta mootaaji pucci maako, ummini tuurtol dow maako. Saa'i Ba'asa ɗonno yara, wuyka nder suudu Arsa, kaliifaajo laamorde haa Tirsa.

¹⁰ Zimiri nasti, mbari mo. Ɗum waɗi nder nduuɓu laamu Asa noogas e joweeɗiɗaɓu haa Yahuuda. Zimiri laami haa pellel maako.

¹¹ Nde o laami, o jooɗi dow leeso laamu, law o mbari yimɓe saare Ba'asa fuu. O accaay gorko nder maare, koo banndiraaɓe maako koo sooba'en maako.

¹² Bana non Zimiri halkiri saare Ba'asa, bana wolde nde Jawmiraawo wi'no dow Ba'asa bee hunnduko annabi Yeehu.

¹³ Ngam Ba'asa e ɓiyum Ela tikkinino Jawmiraawo Allah Isra'iila bee hakkeeji muuɗum'en e hakkeeji ɗi ɓe nastini Isra'iila'en nder maaji e ngam ɓe tokki kuuje meereeje.

¹⁴ Luttuɗum haala Ela e kuuɗe mum, ɗum winndaama nder Deftere Habaruuji Nyalaaɗe nde Laamiiɓe Isra'iila.

Laamu Zimiri

¹⁵ Nder nduuɓu laamu Asa noogas e joweeɗiɗaɓu haa Yahuuda, Zimiri laami nyalɗe joweeɗiɗi haa Tirsa. Saa'i maajum Isra'iila'en honooɓe ɗonno caŋngini dow Gibbeton nder maral Filisti'en.

¹⁶ Nde honooɓe nder saŋngeere nani Zimiri ummini tuurtol, mbari laamiiɗo, nden Isra'iila'en fuu narri, ɓe laamini Omiri, mawɗo ardiiɓe honooɓe dow ummaatoore Isra'iila. Ɓe ndokki mo laamu nyalaade maajum diga saŋngeere ton.

¹⁷ Nden Omiri e honooɓe muuɗum fuu ummi, ɓe acci Gibbeton, ɓe ngari, ɓe taari Tirsa.

¹⁸ Nde Zimiri yi'i ɓe kooci berniwol, o nasti suudu semmbiɗndu haa laamorde, o jamni saare laamu dow maako, o maayi.

¹⁹ Kanjum ngam daliila hakkeeji maako ɗi o waɗi, ngam o waɗi kalluɗum yeeso Jawmiraawo, o tokki laawol Yerobo'am e hakke maako, no o nastiniri Isra'iila'en nder hakke boo.

²⁰ Luttuɗum haala Zimiri e tuurtol mum, ɗum winndaama nder Deftere Habaruuji Nyalaaɗe nde Laamiiɓe Isra'iila.

Laamu Omiri

²¹ Ɓaawo maayde Zimiri, yimɓe ummaatoore Isra'iila cenndi geɓe ɗiɗi. Reeta tokki Tibni ɓii Ginat haa ɓe laamina mo. Reeta feere boo tokki Omiri.

²² Ammaa yimɓe tokkiiɓe Omiri njaali tokkiiɓe Tibni ɓii Ginat. Tibni maayi, Omiri heɓi laamu.

²³ Nder nduuɓu Asa laamiiɗo Yahuuda, cappanɗe tati e go'oowu, Omiri heɓi laamu nder Isra'iila, o laami duuɓi sappo e ɗiɗi. Haa Tirsa o laami duuɓi joweego.

²⁴ Nden o soodi hooseere Samariya haa goɗɗo bi'eteeɗo Semer, baakin cardi kilo cappanɗe joweego. O nyiɓi berniwol dow hooseere, o inndi ngol Samariya fodde innde Semer, jawmu hooseere.

²⁵ Omiri waɗi kalluɗum yeeso Jawmiraawo, o tulli aartuɓe mo fuu.

²⁶ O tokki boo laawol Yerobo'am ɓii Nebat kal-kal, mo nastini Isra'iila'en nder hakke, haa ɓe tikkini Jawmiraawo Allah Isra'iila, bee labbi maɓɓe.

²⁷ Luttuɗum haala Omiri e kuuɗe mum e baawɗe mum, ɗum winndaama nder Deftere Habaruuji Nyalaaɗe nde Laamiiɓe Isra'iila.

²⁸ Omiri maayi. Ɓe uwi mo haa Samariya. Ɓiyiiko Akab laami haa pellel maako.

²⁹ Nder nduuɓu laamu Asa cappanɗe tati e njoweetataɓu haa Yahuuda, Akab ɓii Omiri laami nder Isra'iila. O laami haa Samariya duuɓi noogas e ɗiɗi.

³⁰ Akab ɓii Omiri waɗi kalluɗum yeeso Jawmiraawo ko ɓuri aartuɓe mo fuu.

³¹ O tokki hakkeeji Yerobo'am ɓii Nebat. O ɓaŋgi Izabel ɓii Etba'al, laamiiɗo Sidoni'en boo ngam ɓesdugo hakkeeji maako fahin. O yehi, o rewi Ba'al, o sujidani ɗum.

³² O mahani Ba'al hirsirde nder suudu Ba'al ndu o nyiɓno haa Samariya.

³³ Akab waɗi boo suura Asera. Bee kuuɗe maako o tikkini Jawmiraawo Allah Isra'iila, ko ɓuri laamiiɓe Isra'iila aartuɓe mo fuu.

³⁴ Nder zamanu Akab, Hiyel mo Baytila mahiti Yeriko. Nde Hiyel wallini caɓɓaaje berniwol man, afo muuɗum Abiram maayi. Nde o darni dammuɗe maagol, Seguba gaajiijo maako boo maayi. Ɗum waɗi fodde wolde nde Jawmiraawo wi'no bee hunnduko Yosuwa ɓii Nuuna.