1 Laamiiɓe 11 - Fulfulde Bible

Keefeeraaku Suleymaanu e wanyɓe mo

¹ Koo nde laamiiɗo Suleymaanu te'ino ɓii Firawna laamiiɗo Misra, o yiɗi boo rewɓe ɗuuɗɓe nder le'i jananni, bana ɓiɓɓe rewɓe nder Mo'abi'en e Ammooni'en e Edoomi'en e Sidoni'en e Heti'en.

² Alhaali boo, Jawmiraawo reentinino Isra'iila'en dow kawtal bee heefeerɓe. O wi'no ɓe: “Taa kawte bee maɓɓe, taa acce ɓe kawta bee mooɗon, ngam ɓe estan on haa on cujidana labbi maɓɓe.” Ammaa Suleymaanu yiɗi rewɓe ɓe'e, ɗakkotiri bee maɓɓe.

³ O te'i maryam'en teemeɗɗe joweeɗiɗo (700) e o woodi sulaaɓe teemeɗɗe tato (300). Rewɓe maako ɓe'e ndaayni ɓernde maako bee Jawmiraawo.

⁴ Nde Suleymaanu naywi, rewɓe maako esti mo rewugo labbi heefeerɓe, o yiɗaa Jawmiraawo Allah bee ɓernde woore. O waɗaay ko baaba maako Daawuda waɗno.

⁵ Suleymaanu rewi Astarte, lawru Sidoni'en rewru e Milkom, lawru Ammooni'en nyiddundu.

⁶ Suleymaanu waɗi kalluɗum yeeso Jawmiraawo, o tokkaaki Jawmiraawo bee ɓernde woore bana baaba maako Daawuda tokkori.

⁷ Saa'i maajum Suleymaanu nyiɓani Kemos, lawru Mo'abi'en nyiddundu, nokkuure townde dow hooseere tiitotirnde bee Urusaliima. Non boo ngam Molek, lawru Ammooni'en nyiddundu.

⁸ Bana non o huuwrani rewɓe maako jananɓe fuu, ɓe nguli uurle ngam ɗowanteeɓe maɓɓe, ɓe kirsani ɓe.

⁹ Jawmiraawo tikkani Suleymaanu, ngam o wayliti ɓernde maako, o acci Jawmiraawo Allah Isra'iila, baŋgannooɗo mo nde ɗiɗi,

¹⁰ umrunooɗo mo bee laaɓɗum, taa o rewa ɗowanteeɓe woɗɓe. Ammaa Suleymaanu ɗowtanaaki ko Jawmiraawo umruno mo.

¹¹ Jawmiraawo wi'i Suleymaanu: “Nde a waɗi bana nii, a ɗowtanaaki alkawal am e umrooje am ɗe mi umri ma, mi jaɓtete laamu, mi hokkan ngu goɗɗo caka jaggiiɓe ma.

¹² Ammaa mi huuwataa ɗum nder balɗe ma, daliila baaba ma Daawuda, mi hoocan ngu haa ɓiɗɗo ma.

¹³ Mi ittantaa mo laamu fuu, mi hokkan ɓiɗɗo ma lenyol gootol, ngam daliila jaggiiɗo am Daawuda e ngam berniwol Urusaliima ngol mi suɓi.”

¹⁴ Jawmiraawo umminani Suleymaanu ganyo, Hadat Edoomiijo, goɗɗo danygol laamiiɗo Edoom.

¹⁵ Naane nde Daawuda jaali Edoom, nde Yo'ab, mawɗo honooɓe yehi ngam uwugo mbaraaɓe, o mbari worɓe Edoom fuu.

¹⁶ Yo'ab e Isra'iila'en paɓɓi ton lebbi joweego, haa ɓe nattini worɓe Edoom fuu.

¹⁷ Saa'i Hadat o derkeejo pamaro tawon, o doggi haa Misra, kaŋko e worɓe Edoomi'en woɗɓe, sukaaɓe baaba maako.

¹⁸ Ɓe ummi Mediyan, ɓe ngari Paran, ɓe ndillidi bee worɓe Paran woɗɓe, ɓe ngari Misra, haa Firawna, laamiiɗo Misra. Kaŋko o hokki Hadat suudu, o umri nyaamnugo mo, o hokki mo lesdi boo.

¹⁹ Hadat heɓi mo'ere ɗuuɗnde diga Firawna, Firawna te'ani mo deerɗu Takpenes daada saare mum.

²⁰ Deerɗu Takpenes danyani mo Genubat, ɓiɗɗo gorko. Takpenes enti ɓiŋngel nder saare Firawna, o mawnini ngel. Bana non Genubat ɗonno haa nder saare Firawna, caka ɓiɓɓe Firawna.

²¹ Nde Hadat, gonnooɗo haa Misra nani Daawuda maayi, Yo'ab mawɗo honooɓe boo maayi, o wi'i Firawna: “Accam mi hoota haa lesdi am.”

²² Firawna ƴami mo: “Woodi ko ŋakkani ma haa am ɗo na? Ngam ɗume a yiɗi hootugo lesdi ma?” O jaabi: “Walaa ko ŋakkani yam, ammaa accam mi hoota!”

²³ Jawmiraawo Allah umminani Suleymaanu ganyo feere: Rezon ɓii Eliyada, doggunooɗo jaagorɗo muuɗum Hadad'ezer, laamiiɗo Soba.

²⁴ Nder zamanu Daawuda jaali Hadad'ezer, mbari honooɓe Hadad'ezer, Rezon mooɓti hippooɓe haa muuɗum, o ardi ɓe, nden ɓe ndilli Damas, ɓe njooɗi ton, ɓaawo man o laami haa Damas.

²⁵ Rezon laati ganyo ummaatoore Isra'iila, yaake laamu Suleymaanu fuu. O waɗi sarru bana Hadat, o wanyi Isra'iila masin, nde o laamani lesdi Siriya.

Tuurtol Yerobo'am

²⁶ Woodi Efrayimiijo iwɗo wuro Sereda bi'eteeɗo Yerobo'am ɓii Nebat, innde daada maako Seruwa, o debbo jurumɗo. O laatakeno kuuwanoowo Suleymaanu, ammaa o tuurtani laamiiɗo.

²⁷ Ndaa daliila tuurtol Yerobo'am: Suleymaanu ɗon nyiɓa Millo, o ɗon maɓɓa ceekgol haa berniwol baaba maako Daawuda.

²⁸ Yerobo'am, derkeejo oo, o cuusɗo. Nde Suleymaanu yi'i no derkeejo oo waawri kuugal, o waɗi mo aynoowo kuugal ngal yimɓe le'i Efrayim bee Manassa kuuwata fuu.

²⁹ Nyannde feere Yerobo'am wurti Urusaliima, Ahiya, annabiijo iwɗo Silo fotti bee maako haa laawol. Ɓe ɗiɗo tan haa ladde man. Ahiya ɗon ɓorni ngapaleewol kesol,

³⁰ Ahiya naŋngi ngapaleewol kesol ngol o ɓorni, o seeki ngol geɓe sappo e ɗiɗi.

³¹ Nden o wi'i Yerobo'am: “Hoo'u geɓe sappo ngam ma. Ndaa nii Jawmiraawo, Allah Isra'iila wi'i: Mi jaɓtan laamu diga juŋngo Suleymaanu, mi hokkete le'i sappo.

³² Ammaa lenyol gootol luttanan mo, ngam jaggiiɗo am Daawuda e daliila Urusaliima, berniwol ngol mi suɓi nder lesdi Isra'iila fuu.

³³ Mi waɗan ɗum ngam ɓe acci yam, ɓe ɗon ndewa Astarte, lawru Sidoni'en rewru e Kemos, lawru Mo'abi'en e Milkom, lawru Ammooni'en. Ɓe tokkaaki laawol ngol mi holli ɓe. Ɓe mbaɗaay ko fottani yam, ɓe ɗowtanaaki farillaaji e kiitaaji ɗi mi umri ɓe. Bana nii ɓe mbaɗaay ko Daawuda baaba Suleymaanu waɗno.

³⁴ Ammaa mi hoocataa laamu haa juŋngo maako tawon, mi darni mo o ardiiɗo balɗe maako fuu, ngam daliila jaggiiɗo am Daawuda mo cuɓmi, mo hakkilani farillaaji am e kiitaaji am.

³⁵ Diga juŋngo ɓii Suleymaanu mi ittata laamu, mi hokka ma ngu, an Yerobo'am a laamoto dow le'i sappo.

³⁶ Ammaa mi accanan ɓiyiiko lenyol gootol, ngam haa goɗɗo danygol jaggiiɗo am Daawuda laamo foroy haa Urusaliima berniwol ngol mi suɓi ngam tabitingo innde am ton.

³⁷ Ammaa an, Yerobo'am, mi hokkete laamu bana a yiɗi fuu, a laamoto dow le'i Isra'iila.

³⁸ To a nani ko mi umri ma fuu, to a tokkake laabi ɗi mi hollata ma fuu, to a waɗi ko fottani yam, to a ɗowtanake farillaaji am e umrooje am, bana jaggiiɗo am Daawuda waɗi, nden kam mi wondan bee ma e mi iinante no yimɓe danygol ma laamoto foroy, bana yimɓe danygol Daawuda. Mi hokkete le'i Isra'iila.

³⁹ Bee maajum leesniranmi danygol Daawuda, ammaa naa haa foroy.”

⁴⁰ Suleymaanu ɗaɓɓi mbarugo Yerobo'am. Ammaa Yerobo'am ummi, doggi haa Misra, haa Sisak, laamiiɗo Misra. O jooɗi Misra haa wakkati maayugo Suleymaanu.

Maayde Suleymaanu

⁴¹ Luttuɗum haala Suleymaanu e kuuɗe muuɗum e hikma muuɗum, winndaama nder deftere habaru Suleymaanu.

⁴² Suleymaanu laamani Isra'iila fuu haa Urusaliima duuɓi cappanɗe nayi.

⁴³ Nden o maayi, ɓe uwi mo nder Berniwol Daawuda, baaba maako. Ɓiyiiko Robo'am laami haa pellel maako.