1 Korintu'en 6 - Fulfulde Bible

Yahrugo kiita yeeso sooyɓe adilaaku

¹ To goɗɗo mooɗon woodi wullaandu dow deerɗiraawo feere, koni o yiɗi wullaago mo yeeso sooya-adilaaku'en, naa yeeso senaaɓe?

² On anndaa senaaɓe kiitoto duniyaaru na? To onon kiitoto duniyaaru kam, on mbaawataa hiitaago kuuje famɗa samanje na?

³ On anndaa enen kiitoto malaa'ika'en na? To non kam, en mbaawan hiitaago haala duniyaaru ndu'u!

⁴ To on ngoodi luural dow kuuje duniyaaru, on ɗon ɗaɓɓa kiita haa yimɓe ɓe ngalaa tedduŋgal nder jama'aare nuɗɗinɓe!

⁵ Mi ɗon wi'a ɗum haa cemton. Kadi, walaa hikmaajo koo gooto caka mooɗon baawanɗo ta'ugo haala hakkunde deerɗiraaɓe na?

⁶ Koni deerɗiraawo yahrata wullaandu dow deerɗum yeeso hiitooɓe, sakkomaa yeeso hiitooɓe ɓe ngalaa nuɗɗinki?

⁷ On ɗon ngullotira, fakat kanjum aybini on fuu. Ngam ɗume on munyantaa aybe? Ngam ɗume on munyantaa jaɓteego?

⁸ Ammaa ɗum onon ngaɗata sooynde-adilaaku man, onon njaɓtata woɗɓe boo! Asee boo ɓe deerɗiraaɓe mooɗon!

⁹ On anndaa sooya-adilaaku'en kam ndonataa laamu Allah na? Taa este ko'e mooɗon! Daakaare'en e rewooɓe labbi e jeenooɓe e luuɗu'en,

¹⁰ non boo wuyɓe e suunaaɓe riba e wuykooɓe e waɗooɓe tufle e jaɓtooɓe, ɓe fuu ɓe ndonataa laamu Allah.

¹¹ Bana non woɗɓe mooɗon laatino naane. Ammaa jonta hakkeeji mooɗon lootaama, on cenaama, on adilinaama bee innde Jawmiraawo meeɗen Yeesu Almasiihu e Ruuhu Allah meeɗen.

Teddingo Allah bee ɓanndu mum

¹² Teema goɗɗo wi'an: “Koo ɗume fuu daganake yam.” Ooho, ammaa naa kuuje fuu nafata on. “Koo ɗume fuu daganake yam”. Ammaa mi accata huunde koo ndeyeere macciɗinammi.

¹³ Woɗɓe ɗon mbi'a: “Nyaamdu ɗon ngam reedu, reedu boo ɗon ngam nyaamdu”. Ammaa Allah halkan ɗum ɗiɗi fuu. Ɓanndu neɗɗo laataaki ngam waɗugo daakaareeku, ndu ɗon ngam jagganaago Jawmiraawo e Jawmiraawo boo ɗon hakkila ndu.

¹⁴ Allah mo ummitini Jawmiraawo meeɗen diga maayde, ummitinan en boo bee baawɗe mum.

¹⁵ On anndaa ɓalli mooɗon ngoni terɗe haa ɓanndu Almasiihu na? Kadi mi hoo'a terɗe Almasiihu ngam waɗugo ɗe terɗe daakaareejo na? Waɗataako sam!

¹⁶ On anndaa ɗakkotirɗo bee daakaareejo laatake ɓanndu wooru bee maako na? Deftere wi'i: “Ɗiɗo ɓe'e laatoto ɓanndu wooru.”

¹⁷ Ammaa ɗakkotirɗo bee Jawmiraawo, ruuhu mum laatake gootum bee maako.

¹⁸ Ndaaye haala daakaareeku. Hakkewol goɗŋgol koo ngole ko neɗɗo waɗata, haaɗan haa yaasi ɓanndu maako. Ammaa baɗanɗo daakaareeku ɗon waɗa hakke dow ɓanndu muuɗum.

¹⁹ Malla on anndaa ɓanndu koo moy mooɗon woni haykaliiru Ruuhu Ceniiɗo, mo ɗon nder mooɗon, mo Allah hokki on na? Ngam maajum on maraay ko'e mooɗon.

²⁰ On coottaama bee saman. Ngam maajum teddine Allah bee ɓalli mooɗon.