1 Korintu'en 2 - Fulfulde Bible

Pol waazini haa Korintu

¹ Deerɗiraaɓe am, saa'i mi warino waazingo on gooŋga Allah sirriiha, mi waɗaay ɗum bee bolle mawɗe e hikma lugguka.

² Mi tefaay anndugo koo ɗume caka mooɗon, sonaa Yeesu Almasiihu, waato Yeesu Almasiihu ɓilaaɗo dow leggal gaafaaŋgal.

³ Mi wari haa mooɗon nder tampere, nder kulol e nder diwŋgol ɗuuɗŋgol.

⁴ Wolde am e waazu am laataaki bee baawal bolle fodde hikma yimɓe, ammaa ɗum baŋginki Ruuhu Allah e baawɗe mum,

⁵ ngam taa nuɗɗinki mooɗon daro dow hikma yimɓe, ammaa ki daro dow baawɗe Allah.

Ruuhu anndi sirriiji Allah

⁶ Bee non fuu min ɗon ngaazina hikma haa nuɗɗinɓe timmuɓe. Hikma ka'a laataaki ka zamanuuru ndu'u malla ka mawɓe zamanuuru ndu'u, ngam baawɗe maɓɓe tammi nattineego.

⁷ Min ɗon ngaazina hikma Allah sirriiha, ka o suuɗino, ammaa o annini hokkugo en diga zamanuuji ciwaa ngam tedduŋgal meeɗen.

⁸ Walaa koo gooto nder mawɓe duniyaaru ndu'u annduno ngal. To naa non, ɓe ɓilataano Jawmiraawo marɗo tedduŋgal haa leggal gaafaaŋgal.

⁹ Ammaa bana ko winnda: “Ko goɗɗo meeɗaay yi'ugo malla nanugo, ko goɗɗo meeɗaay numugo boo, kanjum Allah taaskitinani yiɗɓe mo.”

¹⁰ Haa meeɗen kam, Allah waŋginiri ɗum bee Ruuhu. Ngam Ruuhu ɗon linya koo ɗume fuu, koo nufayeeje Allah lugguɗe boo.

¹¹ Moy anndi ko woni nder goɗɗo? Sey ruuhu goɗɗo man. Bana non boo walaa annduɗo numooji Allah, sey Ruuhu Allah tan.

¹² Ngam enen kam, en keɓaay ruuhu iwŋgu haa duniyaaru ndu'u, ammaa Ruuhu iwɗo haa Allah keɓɗen, ngam anndugo ko Allah mo'ani en.

¹³ Min mbolwiraay haala man bee bolle iwɗe haa hikma yimɓe, ammaa bee ko Ruuhu Allah ekkitinta, haa min paamtina heɓɓe Ruuhu ko Ruuhu anndinta.

¹⁴ Koo moy tokki hakkiilo mum jaɓataa ko iwi haa Ruuhu Allah, ngam ɗum faataare haa maako. O faamataa ɗum sam, ngam sey bee ballal Ruuhu ɗum faamorto.

¹⁵ Keɓɗo Ruuhu Allah ɗon faama koo ɗume fuu, ammaa kaŋko bee hoore maako, walaa paamanɗo mo.

¹⁶ Ngam deftere ɗon wi'a: “Moy anndi numo Jawmiraawo? Moy waawata hokkugo mo sawari?” Ammaa enen en ngoodi numo Almasiihu.