1 Korintu'en 16 - Fulfulde Bible

Walliinde ngam nuɗɗinɓe haa Urusaliima

¹ Ko laarani ceede mooɓteteeɗe ngam wallugo senaaɓe haa Urusaliima, mbaɗe onon boo bana no umrumi jama'aaje nuɗɗinɓe nder Galaatiya.

² Nyalaade Alat fuu sey koo moy mooɗon resa ceede seɗɗa haa muuɗum baakin no o waawi. Taa ndeene nii haa to mi wari nden puɗɗon mooɓtugo dokke maajum.

³ To mi yottake, mi nelan suɓaaɓe mooɗon bee bataakeeji haa Urusaliima, haa ɓe njahra dokkal mooɗon ton.

⁴ To kaanduɗum min boo mi yaha, nden kam ɓe njahdan bee am.

Anniyaaji Pol

⁵ Mi tammi wargo haa mooɗon, mi tokkorto Makedoniya, ngam mi saaloto ton.

⁶ Mi faɓɓan haa mooɗon, teema to heɓoto maa mi saalina wakkati jaaŋgol haa mooɗon. Nden on mballatam nder haaje jahaaŋgal am koo toy ngiɗmi yahugo.

⁷ Mi yiɗaa mi yaala tan mi saalo, to mi wari laarugo on. Mi yiɗi faɓɓugo haa mooɗon seɗɗa, to Jawmiraawo duŋanake yam.

⁸ Ammaa mi jooɗoto haa Efesus haa yotto juulde Pantekosta.

⁹ Ngam mi heɓi laawol huuwugo kuugal maŋngal nafoowal haa ɗo, koo nde konne'en ɗuuɗani yam boo.

¹⁰ To Timote wari haa mooɗon, njaɓɓe mo booɗɗum haa o jooɗo caka mooɗon bilaa kulol. Ngam kaŋko boo o ɗon huuwana Jawmiraawo bana am.

¹¹ Taa goɗɗo yawo mo. Mballe mo haa o timmina jahaaŋgal maako bee jam, ngam haa o warta haa am. Min e deerɗiraaɓe, min ɗon ndeeni mo.

¹² Ngam deerɗiraawo meeɗen Apollos kam, mi tiɗɗini mo ɗuuɗɗum haa o yaha haa mooɗon bee deerɗiraaɓe woɗɓe. Ammaa o sali yahugo jonta. O yahan to o heɓi laawol.

Wasuyeeji ragareeji e koofli

¹³ Ayne! Tabite nder nuɗɗinki! Tiɗɗine ɓerɗe mooɗon! Laate on semmbiɗɓe!

¹⁴ Mbaɗe koo ɗume fuu bee yiide.

^15-16 Deerɗiraaɓe am, on anndi Estefanas e saare muuɗum. Kamɓe ngoni nuɗɗinɓe aartuɓe caka Akaya'en. Ɓe ndokki ko'e maɓɓe boo ngam huuwango senaaɓe. Mi ɗon toro on on ɗowtano irin maɓɓe, kamɓe e huuwdooɓe bee maɓɓe fuu nder torra.

¹⁷ Mi ɗon seyoro garki Estefanas e Fortunatus e Aka'ikus. Ɓe ndokki yam ko ŋakkani yam nde on daayiiɓe.

¹⁸ Ɓe nde'itini yam bana ɓe nde'itinno on boo. Camɗine irin maɓɓe.

¹⁹ Jama'aaje nuɗɗinɓe nder lesdi Asiya fuu koofni on. Akilas e Piriskilla e nuɗɗinɓe mooɓtotooɓe nder saare maɓɓe fuu koofni on booɗɗum bee innde Jawmiraawo.

²⁰ Deerɗiraaɓe wonɓe haa ɗo fuu koofni on. Koofnindire, karlotire bana no ɗum haandani senaaɓe.

²¹ Ndaa ko mbinndumi bee juŋngo am: Min Pol mi hoofni on.

²² To goɗɗo yiɗaa Jawmiraawo bee ɓernde woore, o laato naalaaɗo! “Maranata” waato war, yaa Jawmiraawo amin!

²³ Mo'ere Jawmiraawo meeɗen Yeesu wondu bee mooɗon.

²⁴ Yiide am ɗon tabitani on fuu nder Yeesu Almasiihu.