1 Korintu'en 15 - Fulfulde Bible

Ummitineeki Almasiihu

¹ Deerɗiraaɓe am, mi yeli siftinorgo on Linjiila ka ngaazumi on, ka njaɓɗon, ka tabititɗon nder muuɗum.

² Linjiila ka'a hisnan on to on njogitake ka bana ngaazirmi on ka. To naa non nuɗɗinki mooɗon laati meere.

³ Mi anndini on kubaruwol ɓurŋgol marugo saman, ngol njaɓmi bee hoore am, waato: Almasiihu maayi ngam daliila hakkeeji meeɗen, bana ko winnda nder defte.

⁴ Ɓe uwi mo. O ummiti diga maayde nyalaade tataɓre, bana ko winnda nder defte.

⁵ O waŋgani Piyer, nden pukara'en sappo e ɗiɗo.

⁶ Ɓaawoɗon o waŋgani deerɗiraaɓe ko ɓuri teemeɗɗe njowo hawtuɓe haa nokkuure woore. Ɓurna maɓɓe ɗon haa jonta, ammaa woɗɓe maayi.

⁷ Ɓaawo maajum o waŋgani Yaakuba, nden nelaaɓe fuu.

⁸ Haa ragare man, ɓaawo maɓɓe fuu, o waŋgani yam min boo, min laatiiɗo bana ɓiŋngel danyaaŋgel ngel lebbi mum cikaay,

⁹ ngam mi ɓurdi nelaaɓe fuu leesugo, mi he'aay maa wi'eego nelaaɗo, ngam mi toonyino jama'aare yimɓe Allah.

¹⁰ Ammaa ngam mo'ere Allah laatiimi nelaaɗo bana no mi wa'i hannde e mo'ere maako nde o waɗani yam laataaki meere. Mi huuwi ko ɓuri nelaaɓe fuu. Naa min bee hoore am huuwi ɗum, ammaa mo'ere Allah huuwi nder am.

¹¹ Koo min, koo kamɓe, ndaa Linjiila ka min ngaazi on, ndaa ko nuɗɗinɗon.

Ummitineeki maayɓe

¹² Min ɗon ngaazina Almasiihu ummitake diga maayde. Noy woɗɓe mooɗon mbi'rata maayɓe ummitittaako?

¹³ To ummitineeki maayɓe woodaa, nden kam Almasiihu boo ummitaaki.

¹⁴ To Almasiihu ummitaaki boo, nden kam waazu amin laatake meere, nuɗɗinki mooɗon boo laati meere.

¹⁵ To fakat maayɓe ummitittaako, nden kam ɗum yiɗi wi'go Allah boo ummitinaay Almasiihu diga maayde. To non kam min laati seedanooɓe Allah fewooɓe, ngam min ceedi o ummitini Almasiihu diga maayde.

¹⁶ To maayɓe ummitittaako, nden kam Almasiihu boo ummitaaki.

¹⁷ To Almasiihu ummitaaki, nuɗɗinki mooɗon nafataa, nden boo on ɗon nder hakkeeji mooɗon haa jonta.

¹⁸ Non boo nuɗɗinɓe Almasiihu maayɓe boo kalki.

¹⁹ To nii en tammorake Almasiihu ngam ngeendam jontaajam tan, nden kam en ɓurdan yimɓe fuu yurmaago.

²⁰ Ammaa, fakat kam, Almasiihu ummitake diga maayde. Kaŋko woni aartuɗo ummitaago caka maayɓe fuu ngam haa woɗɓe boo ummito.

²¹ Bana no maayde wardi daliila neɗɗo gooto, bana non ummitineeki maayɓe boo wardi bee neɗɗo gooto.

²² Bana no yimɓe fuu maayrata ngam daliila kawtal muuɗum'en bee Aadamu, bana non ɓe ummititto ngam kawtal maɓɓe bee Almasiihu.

²³ Ammaa koo moy dow tokkindirki mum: Almasiihu woni aartuɗo, ɓaawoɗon tokkiiɓe mo ummititto to o lorake.

²⁴ Nden timmoode waran. Yaake man Almasiihu halkan mawɓe asama e marɓe laamu e marɓe baawɗe fuu, nden o hokkitan laamu haa juŋngo Allah Baabiraawo.

²⁵ Ngam doole Almasiihu laamo haa to o wallini konne'en maako fuu les kosɗe maako.

²⁶ Konneejo ragareejo kalketeeɗo, ɗum waade.

²⁷ Ngam deftere wi'i: “Allah wallini koo ɗume fuu les kosɗe maako.” To Almasiihu wi'i: “Koo ɗume fuu wallinaama les kosɗe mum”, ɗum yiɗi wi'go Allah ballinɗo kuuje fuu les maako limaaka.

²⁸ To yottake haa kuuje fuu mballinaama les Ɓiɗɗo, nden Ɓiɗɗo sappanan Allah, baɗɗo mo Jawmiraawo dow koo ɗume fuu, ngam haa Allah laamo koo toy fuu e nder koo ɗume fuu.

²⁹ To gooŋga maayɓe ummitittaako, nafuuda kaye yimɓe jaɓanɓe baptisma mbattudi maayɓe tammoto waɗugo?

³⁰ Koo minin boo, ngam ɗume min ɗon tum yeeso joote?

³¹ Deerɗam'en, fakat bana mi mantorto on yeeso Jawmiraawo men Yeesu Almasiihu, nyalɗe fuu mi ɗon nder joote maayde.

³² To mi waɗi haɓre saatunde haa Efesus bee dabbaaji kalluɗi bana yimɓe fuu mbaɗata, ɗume ɗum nafi yam? To maayɓe ummitittaako kam, ndikka en tokko koŋngol mbi'anŋgol: “Nyaamen, njaren, ngam jaŋngo en maayan.”

³³ Taa este ko'e mooɗon! “Tokkotirgo bee kalluɗo wonnan gikku mbooɗŋgu.”

³⁴ Njo'itine hakkiilo mooɗon bana no haani, taa mbaɗe hakke. Ngam woɗɓe mooɗon anndaa Allah. Mi wi'i ɗum ngam haa on cemta.

Ɓanndu ummitinteeɓe

³⁵ Teema goɗɗo ƴaman: “Bana noy maayɓe ummitorto? Irin ɓanndu nduye ɓe marata?”

³⁶ Kayya! An paataaɗo! To a aawi aawdi, ndi fuɗataa sonaa to ndi waati.

³⁷ Ko aawata ɗum gawel meere. Ɗum gawel alkamaari malla koo ngele, naa ɗum fuɗŋgo marŋgo haakooji.

³⁸ Ɓaawoɗon Allah ɗon hokka gawel fuu irin ɓanndu maagel bana o muuyi. Aawdi koo ndiye laatoto fuɗŋgo fodde no ndi wa'i.

³⁹ Ɓalli kuuje geete fuu nanndaay. Ɓalli yimɓe cenndiri bee ɓalli dabbaaji, ɓalli colli cenndiri bee ɓalli liɗɗi.

⁴⁰ Non woodi boo kuuje asamaaje e kuuje lesdiije. Tedduŋgal kuuje asamaaje nanndaay bee tedduŋgal kuuje lesdiije.

⁴¹ Naaŋge woodi ɗelko mum, lewru woodi ɗelko feere, koode boo ngoodi ɗelko feere. Koo caka koode boo, ɗelko horre ɗon feerotira bee ɗelko horre woɗnde.

⁴² Bana non ɗum laatorto boo saa'i ummitineeki maayɓe. Ɓanndu uwaandu nyolan. Ammaa to ndu ummitake, ndu nyolataa.

⁴³ Ɓanndu uwaandu, ndu tampundu, ndu nyiddundu. Ammaa yaake ndu ummititto, ndu marndu tedduŋgal, semmbiɗndu.

⁴⁴ Ɓanndu uwaandu bana gawel, ɗum ɓanndu ndu neɗɗo. Ammaa yaake ndu ummititto, Ruuhu ɗon yeeɗitina ndu. Ngam maajum woodi ɓanndu ndu kusel, non boo woodi ɓanndu ndu Ruuhu.

⁴⁵ Bana non deftere wi'i: “Aadamu, neɗɗo arano laati goɗɗo geeto.” Ammaa Aadamu ragareejo, waato Almasiihu, laati Ruuhu dokkoowo ngeendam.

⁴⁶ Naa mo Ruuhu aartata, ammaa mo neɗɗo, ɓaawoɗon mo Ruuhu.

⁴⁷ Arano tagraama bee mbulwuldi lesdi. Ammaa ɗiɗaɓo iwi haa asama.

⁴⁸ Yimɓe ɓe lesdi nanndi bee tagraaɗo mbulwuldi. Yimɓe ɓe asama boo nanndi bee iwɗo haa asama.

⁴⁹ Bana no nanndirɗen bee mbulwuldiijo, non boo en nanndan bee iwɗo haa asama.

⁵⁰ Deerɗiraaɓe am, ndaa ko ngiɗmi faamtingo on: Marɗo kusel e ƴiiƴam nastataa laamu Allah. Ko nyolata boo ronataa ko duumoto.

⁵¹ Haa mi waŋginana on sirriijum feere: Naa en fuu en maayan, ammaa en fuu en ngaylititto.

⁵² Ɗum waɗoto law, bana ma'annde yiitere, saa'i fuufannde luwal ragareere. Luwal fuufete. Nden maayɓe ummititto ngam ngeendam nduumiiɗam. Enen, en ngaylititto.

⁵³ Non kadi ɓalli meeɗen nyolanɗi ɓornoto ko duumoto, maayanɗi boo ɓornoto ko maayataa.

⁵⁴ To ɓanndu nyolanndu ɓornake ko nyolataa, to maayanndu ɓornake ko maayataa, nden kam wolde annabaaku nde'e gooŋɗan: “Waade nattinaama nder jaalorgal timmidiiŋgal.

⁵⁵ An waade, toy jaalorgal ma? An waade, toy baawɗe ma ngam mbarugo?”

⁵⁶ Waade ɗon heɓa baawɗe muuɗum ngam mbarugo diga hakke, hakke boo ɗon heɓa baawɗe muuɗum diga tawreeta.

⁵⁷ Ammaa yettoore laatano Allah, dokkanɗo en jaalorgal bee Jawmiraawo meeɗen Yeesu Almasiihu!

⁵⁸ Ngam maajum, onon deerɗiraaɓe am yiɗaaɓe, laate on tabititɓe ɓe ndimmbataako. Tiine foroy nder kuugal Jawmiraawo, ngam on anndi torra mooɗon ngam Jawmiraawo laatataako meere.