1 Korintu'en 14 - Fulfulde Bible

Kuuwtinirki dokke Ruuhu

¹ Tiine heɓugo yiide. Ngele boo dokke Ruuhu, sakkomaa baawal waɗugo annabaaku.

² Bolwanɗo bee ɗemɗe ɗe anndaaka wolwantaa yimɓe, o ɗon wolwana Allah. Walaa paamanɗo mo. Bee baawɗe Ruuhu Allah o ɗon wolwa kuuje sirriije.

³ Ammaa gaazotooɗo kubaruuji Allah ɗon wolwana yimɓe ngam semmbiɗingo ɓe, ngam suusɗingo ɓe, ngam de'itingo ɓe.

⁴ Bolwanɗo bee ɗemɗe ɗe anndaaka ɗon semmbiɗina hoore mum tan. Ammaa baɗanɗo annabaaku ɗon semmbiɗina jama'aare fuu.

⁵ Mi yiɗi on fuu on keɓa wolwugo bee ɗemɗe ɗe anndaaka, ammaa mi ɓuran yiɗugo on keɓa waɗugo annabaaku. Baɗanɗo annabaaku ɓuri nafugo dow mo ɗon wolwa ɗemɗe ɗe anndaaka, sonaa teema to woodi goɗɗo ngam fassitirgo ɗe haa jama'aare fuu semmbiɗine.

⁶ Deerɗiraaɓe am, teema mi wari haa mooɗon, mi wolwani on bee ɗemɗe ɗe anndaaka. Nafuuda kaye mi waddanta on? Walaa sam! Sonaa to mi waŋginani on sirriijum goɗɗum malla to mi waddani on anndal malla to mi waɗi annabaaku malla boo to mi ekkitini on.

⁷ Ɗum nanndi bee haala kuuje gimruɗe, bana ciidal malla moolooru. To sawtu man waɗaay feere feere, noy anndirten ko ciidal fijata bee ko moolooru fijata?

⁸ To luwal konu fuufaaka bee laaɓɗum, moy taaskanto haɓre?

⁹ Bana non haa mooɗon boo: To on mbolwi bee ɗemɗe ɗe anndaaka, noy goɗɗo faamata ko mbi'oton? Nden kam on mbolwi meere!

¹⁰ Woodi ɗemɗe ɗuuɗɗe feere feereeje nder duniyaaru, ammaa walaa ɗemŋgal ngal ŋakkiri maana.

¹¹ To mi anndaa ɗemŋgal ngal goɗɗo ɗon wolwanammi, goɗɗo oo laatanto yam jananno, min boo mi jananno haa maako.

¹² Onon boo nde nii on ngiɗi dokke Ruuhu masin, tiine heɓugo ɗe. Ammaa ɗum laato ngam semmbiɗingo jama'aare.

¹³ Ngam maajum bolwanɗo bee ɗemɗe ɗe anndaaka, sey o toro Allah haa o waawa fassitirgo ɗe boo.

¹⁴ Ngam to mi ɗon waɗa do'a bee ɗemŋgal ngal anndaaka, ruuhu am boo ɗon waɗa do'a, ammaa hakkiilo am huuwataa.

¹⁵ To non kam, ko mbaɗanmi? Mi waɗan do'a bee ruuhu am, non boo mi waɗan do'a bee hakkiilo am boo. Mi yiman maŋgtoore bee ruuhu am, non boo mi yiman bee hakkiilo am.

¹⁶ To a ɗon yetta Allah bee ruuhu ma tan, noy goɗɗo nder mooɓtorde mo faamaay haala man wi'rata “Aamiina” haa do'a maaɗa? Ngam o faamataa ko mbi'ata.

¹⁷ Koo to do'a maaɗa wooɗi masin, ɗum semmbiɗintaa oya sam.

¹⁸ Mi ɗon yetta Allah ngam mi ɓuri on fuu wolwugo bee ɗemɗe ɗe anndaaka.

¹⁹ Ammaa nder mooɓtorde nuɗɗinɓe mi ɓuran yiɗugo mi wolwa bolle jowi paameteeɗe ngam ekkitingo woɗɓe, dow bolle ujine sappo bee ɗemŋgal ngal anndaaka.

²⁰ Deerɗiraaɓe am, taa nume bana ɓikkoy. Nder halleende, laate on laaɓɓe bana ɓikkoy. Ammaa nder numooji mooɗon laate on mawɓe.

²¹ Ndaa ko winnda nder Tawreeta: “Mi wolwanan ummaatoore nde'e bee yimɓe wolwanɓe bolle ɗe anndaaka, bee kunnduɗe jananɓe. Koo non fuu ɓe nanantaa yam.”

²² Ngam maajum wolwugo bee ɗemɗe ɗe anndaaka laati alaama ngam sooyɓe nuɗɗinki, naa ngam nuɗɗinɓe. Ammaa waɗgo annabaaku laati alaama ngam nuɗɗinɓe, naa ngam sooyɓe nuɗɗinki.

²³ Bana to jama'aare mooɗon fuu mooɓtake e koo moy mooɗon boo fuɗɗi wolwugo bee ɗemɗe ɗe anndaaka. Nden yimɓe ɓe anndaa haala man malla heefeerɓe ngari, nasti. Ɓe mbi'ataa on yinnaaɓe na?

²⁴ Ammaa to koo moy ɗon waɗa annabaaku, cooyɗo nuɗɗinki malla goɗɗo mo anndaa haala man boo nasti, bolle ɗe o nanata fuu paamtinan mo aybeeji maako e ɗe kiitoto mo,

²⁵ ɗe mbaŋginan numooji ɓernde maako. Nden o sujidanan Allah, o seedoto: “Fakat, Allah ɗon caka mooɗon!”

Ko haani nder mooɓtorde

²⁶ Deerɗiraaɓe am, to non kam, noy mbaɗoton? Yaake mooɓtotooɗon fuu, goɗɗo maran yimre, oya maran ekkitinol, goɗɗo boo wahayu, goɗɗo feere boo wolwan bee ɗemŋgal ngal anndaaka, goɗɗo feere fahin fassitiran ngal. Sey ɗum fuu ɗum laato ngam semmbiɗingo jama'aare.

²⁷ To ɗum haala wolwugo bee ɗemŋgal ngal anndaaka kam, acce yimɓe ɗiɗo mbolwa, taa ɓura tato. Sey ɓe mbolwa bee tokkindirki. Sey goɗɗo boo fassitira ko ɓe mbi'ata.

²⁸ Ammaa to passitiroowo woodaa, sey wolwanɓe bee ɗemɗe go njeeɗo nder mooɓtorde. Koo moy maɓɓe wolwana hoore muuɗum e o wolwana Allah.

²⁹ Sey waɗooɓe annabaaku ɗiɗo malla tato mbolwa, luttuɓe boo linya ko ɓe mbi'ata.

³⁰ Ammaa to goɗɗo feere heɓi wahayu, sey bolwanɗo saa'i maajum jeeɗo.

³¹ On fuu on mbaawan waɗugo annabaaku, ammaa sey ɗum laato bee tokkindirki, ngam haa yimɓe fuu paama, ɓe keɓa cuusɗinki.

³² Ngam ruuhu annabi'en ɗon ɗowtano annabi'en.

³³ Ngam Allah naa o Allah njiiɓru, ammaa o Allah salaaman. Bana ko ɗon laato nder jama'aaje nuɗɗinɓe fuu,

Taa debbo wolwa nder mooɓtorde

³⁴ sey rewɓe njeeɗo nder mooɓtorde. Ɓe nduŋanaaka wolwugo. Sey ɓe cirwo, ɓe laato ɗowtiiɓe bana ko tawreeta umri.

³⁵ To woodi ko ɓe ngiɗi faamugo, sey ɓe ƴama worɓe maɓɓe haa saare. Ngam ɗum cemtuɗum haa debbo wolwa nder mooɓtorde.

³⁶ Malla haa mooɗon wolde Allah iwi? Malla haa mooɗon tan nde yotti?

³⁷ To goɗɗo numi o annabiijo malla o keɓɗo wahayuuji Ruuhu, nden kam sey o anndita ko mi winndani on ɗum umroore Jawmiraawo.

³⁸ Ammaa to o annditaay ɗum, Allah boo anndaa mo.

³⁹ Ngam maajum deerɗiraaɓe am, ngele waɗugo annabaaku. Ammaa taa kaɗe boo wolwugo bee ɗemɗe ɗe anndaaka.

⁴⁰ Sey koo ɗume waɗe bee laawol man, bana no haandi.