1 Korintu'en 13 - Fulfulde Bible

Maŋngu yiide

¹ To mi anndi wolwugo ɗemɗe yimɓe e ɗe malaa'ika'en, ammaa to mi walaa yiide, nden kam mi laati bana njamndi iidoori malla koŋsiire hoolo.

² To mi woodi dokkal waɗugo annabaaku malla to mi faami sirriiji Allah fuu, to mi anndi koo ɗume fuu, to mi woodi nuɗɗinki haa mi waawi sottingo kooseeje boo, ammaa to mi walaa yiide, nden kam mi huunde meere.

³ Koo to mi senndani talaka'en jawdi am fuu, to mi jaɓi ɓanndu am wule boo, ammaa to mi walaa yiide, koo ko ɗum nafatammi.

⁴ Marɗo yiide munyanan woɗɓe, o woonanan ɓe. O haajataa, o jurataako, o mawnitittaako.

⁵ Marɗo yiide waɗataa cemtiniiɗum, o suklantaako ko nafata hoore maako tan, o tikkataa law, o siftortaa aybeeji ɗi goɗɗo waɗani mo.

⁶ O seyortaako sooynde adilaaku, ammaa o seyorto gooŋga.

⁷ Marɗo yiide munyanan koo ɗume fuu. Nuɗɗinki maako e tammunde maako e munyal maako tampataa nder koo ɗume fuu.

⁸ Yiide duumoto haa foroy. Bolle annabaaku njinnan, wolwugo bee ɗemɗe ɗe anndaaka timman, anndal boo majjan.

⁹ Ngam anndal men e annabaaku men mbaŋgintaa gooŋga fuu, sey goɗɗum maaka.

¹⁰ Ammaa geɓe man majjan to gooŋga fuu waŋgi.

¹¹ Yaake mi ɓiŋngelno, mi ɗonno wolwa bana ɓiŋngel, mi ɗonno numa bana ɓiŋngel, mi hiisti bana ɓiŋngel boo. Jonta nde mi mawni, mi acci gikku nderkaaku.

¹² Haa ngonɗen jonta ɗo, en ngi'ataa kuuje laaɓɗum, en ɗon ngi'a ɗe bana nder daarorgal. Ammaa saa'i waran haa en ngi'a Jawmiraawo gite bee gite. Jonta mi anndi mo dow dow, ammaa saa'i man mi anndan mo laaɓɗum tal bana no kaŋko boo o anndiri yam.

¹³ Jonta kam, ndaa kuuje tati ɗon: nuɗɗinki e tammunde e yiide. Ammaa ko ɓuri mawnugo ɗum yiide.