Yosua 19 - Biblia alo Ŋɔŋlɔ Kɔkɔe La Le Eʋegbe Me 1913

To ade susɔeawo ƒe domenyinu.

¹ Dzidze evelia dze Simeon-viwo ƒe to la dzi le woƒe ƒomeawo nu, eye woxɔ woƒe anyigba ɖe Yuda-viwo ƒe anyigba dzi.

² Du, siwo nye wo to le woƒe anyigba dzi, wonye: Beer-Seba, Seba, Molada.

³ Xazar-Sual, Bala, Ezem.

⁴ Eltolad, Betul, Xorma,

⁵ Ziklag, Bet-Markabot, Xazar-Susa,

⁶ Bet-Lebaot kple Saruxen. Wole du wuietɔ̃ kple woƒe kɔƒewo.

⁷ Ayin, Rimon, Eter kple Asan. Wole du ene kple woƒe kɔƒewo,

⁸ hekpe ɖe kɔƒe, siwo katã le du, siawo gbɔ vaseɖe Baalat-Beer la ŋuti, eya nye Ramat le dziehe. Esia nye Simeon-viwo ƒe to la ƒe anyigba le woƒe ƒomeawo nu.

⁹ Yuda-viwo ƒe gome ŋu woɖe anyigba le na Simeon-viwo, elabena Yuda-viwo tɔ lolo na wo akpa, eyata Simeon-viwo xɔ woƒe anyigba ɖe wo dome.

¹⁰ Dzidze etɔ̃lia dze Zebulon-viwo dzi le woƒe ƒomeawo nu, eye woƒe anyigba ƒe liƒo de Sarid.

¹¹ Woƒe liƒo zɔ ɣetoɖoƒe gome va to Marala heto Bedabaset ŋu, eye wòva ke ɖe tɔʋu la nu le Yokneam kasa.

¹² Eye liƒo la trɔ tso Sarid ɖo ta ɣedzeƒe gome va to Kislot-Tabor ƒe liƒo ŋu, eye wòto Daberat ŋu va ke ɖe Yafia,

¹³ eye wòtso afisia ɖo ta ɣedzeƒe gome va to Gat-Xefer kple Et-Kazin hemlo to Rimon va ke ɖe Nea;

¹⁴ eye liƒo la gɔdɔ̃ zɔ Xanaton ƒe anyiehe gome heva to Yiftax-El-bali la me.

¹⁵ Katat, Nahalal, Simron, Yidala kple Betlexem. Wole du wuieve hekpe ɖe woƒe kɔƒewo ŋu.

¹⁶ Esia nye Zebulon-viwo ƒe anyigba, woƒe duwo kple kɔƒewo le woƒe ƒomeawo nu.

¹⁷ Dzidze enelia dze Isaxar-viwo dzi le woƒe ƒomeawo nu.

¹⁸ Eye woƒe anyigba to Yezreel, Kesulot, Sunem,

¹⁹ Xafarayim, Sion, Anaxarat,

²⁰ Harabit, Kision, Abez,

²¹ Remel, En-Ganim, En-Xada kple Bet-Pazez.

²² Eye liƒo la va ke ɖe Tabor, Saxazima kple Bet-Semes ŋu heva wu nu ɖe Yordan nu. Wole du wuiade hekpe ɖe woƒe kɔƒewo ŋu.

²³ Esia nye Isaxar-viwo ƒe to la ƒe anyigba, woƒe duwo kple kɔƒewo le woƒe ƒomeawo nu.

²⁴ Dzidze atɔ̃lia dze Aser-viwo ƒe to la dzi le woƒe ƒomeawo nu.

²⁵ Eye woƒe anyigba to Xelkat, Xali, Beten, Axsaf,

²⁶ Alamelex, Amad kple Misal va zɔ Karmel kple Sixor-Libnat ŋu le ƒu gome;

²⁷ eye wònyè kpo to ɣedzeƒe gome va ke ɖe Bet-Dagon, eye wòmlo to Zebulon, Yiftax-El-bali la ƒe anyiehe, Bet-Haemek kple Negiel, eye wòzɔ Kabul ƒe mia me gome

²⁸ va to Ebron, Rexob, Xamon kple Kana vaseɖe Zidon, ɖu gã la gbɔ.

²⁹ Eye liƒo la tro to Rama kple du sesẽ Tirus gbɔ, eye wònyè kpo to Xosa heva wu nu ɖe ƒu nu tso Axsib-nuto me

³⁰ vaseɖe Uma, Afek kple Rexob. Wole du blave vɔ eve hekpe ɖe woƒe kɔƒewo ŋu.

³¹ Esia nye Aser-viwo ƒe to la ƒe anyigba, woƒe duwo kple kɔƒewo le woƒe ƒomeawo nu.

³² Dzidze adelia dze Naftali-viwo dzi le woƒe ƒomeawo nu.

³³ Eye woƒe liƒo tso Xelef kple logotiwo gbɔ le Zaananim, Adami-Hanekeb kple Yabneel vaseɖe Lakum, eye wòva wu nu ɖe Yordan nu.

³⁴ Eye liƒo la nyẽ kpo ɖe ɣetoɖoƒe gome va to Aznot-Tabor, eye wòmlo zɔ Xukok ŋu va to Zebulon ŋu le dziehe, eto Aser ŋu le ɣetoɖoƒe, eye wòto Yuda ŋu le Yordan nu le ɣedzeƒe.

³⁵ Du sesẽwo nye: Zidim, Zer, Xamat, Rakat, Kineret,

³⁶ Adama, Rama, Xazor,

³⁷ Kedes, Edrei, En-Xazor,

³⁸ Yireon, Migdal-El, Xorem, Bet-Anat kple Bet-Semes. Wole du wuiasieke hekpe ɖe woƒe kɔƒewo ŋu.

³⁹ Esia nye Naftali-viwo ƒe anyigba, woƒe duwo kple kɔƒewo le woƒe ƒomeawo nu.

⁴⁰ Dzidze adrelia dze Dan-viwo ƒe to la dzi le woƒe ƒomeawo nu.

⁴¹ Eye du, siwo le woƒe anyigba dzi, wonye: Zora, Estaol, Ir-Semes,

⁴² Saalabin, Ayalon, Yitla,

⁴³ Elon, Timnat, Ekron,

⁴⁴ Elteke, Gibeton, Baalat,

⁴⁵ Yehud, Bene-Berak, Gal-Rimon,

⁴⁶ Me-Hayarkon kple Harakon kple eƒe anyigba, si le Yafo kasa.

⁴⁷ Ke Dan-viwo ƒe anyigba xaxa na wo akpa, eyata Dan-viwo yi ɖawɔ aʋa kple Lesem; woɖu wo dzi, wu wo kple yi, eye woxɔe hetso aƒe ɖe eme, eye wona ŋkɔ Lesem bena Dan, le wo fofo Dan ƒe ŋkɔ nu.

⁴⁸ Esia nye Dan-viwo ƒe to la ƒe anyigba, woƒe duwo kple kɔƒewo le woƒe ƒomeawo nu.

Yosua ƒe domenyinu.

⁴⁹ Esi wode liƒo anyigba la me hemãe vɔ keŋ la, Israel-viwo na anyigba Yosua, Nun vi, ɖe wo dome;

⁵⁰ wotsɔ ɖu Timnat-Serax, si wòbia la, nɛ ɖe Efrayim-to dzi, abe alesi Yehowa gblɔ ene, eye wògbugbɔ du la tso henɔ eme.

⁵¹ Esia nye anyigba, siwo nunɔla Eleazar kple Yosua, Nun vi, kpakple Israel-viwo ƒe ƒomewo ƒe amegãwo dzidze nu ma le Silo le Yehowa ŋku me, le Mawu ƒe agbadɔ la nu. Ale wowu anyigba la mamã nu.