Yosua 14 - Biblia alo Ŋɔŋlɔ Kɔkɔe La Le Eʋegbe Me 1913

Wòmã anyigba la me vɔ.

¹ Esia nye anyigba, si nunɔla Eleazar kple Yosua, Nun vi, kpakple Israel-viwo ƒe toawo ƒe amegãwo ma na Israel-viwo le Kanaan-nyigba dzi.

² Eye wodzidze nu hafi mãe na to asieke kple afã la, abe alesi Yehowa ɖe se to Mose dzi ene.

³ Elabena Mose na anyigba to eve kple afã ɖe Yordan godo; ke mena anyigbaa ɖeke Lewi-viwo ɖe wo dome o.

⁴ Elabena Yosef-viwo Manase kple Efrayim le to eve; ke wometso gomea ɖeke na Lewi-viwo ɖe anyigba la dzi o, negbe duwo ko, be woana me, kple gbeɖuƒewo na woƒe lãwo kpakple nusiwo le wo si.

⁵ Alesi Yehowa ɖe se na Mose la, nenema Israel-viwo wɔ, eye wòmã anyigba la.

Kaleb ƒe domenyinu.

⁶ Tete Yuda-viwo va Yosua gbɔ le Gilgal, eye Kaleb, Yefune vi, si nye Kenizitɔ la, gblɔ nɛ bena: Enya nya, si Yehowa gblɔ na Mose, Mawu ƒe ame la, le mía kpli wo ŋuti le Kades-Barnea.

⁷ Mexɔ ƒe blane, esime Yehowa ƒe dɔla Mose dɔm tso Kades-Barnea, be mayi ɖatsa ŋku le anyigba dzi, eye meva gblɔ, alesi mekpɔ la nɛ.

⁸ Ke nɔvinye, siwo ɖe kplim la, ɖe dzi le dukɔ la ƒo; gake nye la medze Yehowa, nye Mawu la yome blibo.

⁹ Tete Mose ka atam gbemagbe gblɔ bena; Anyigba, si dzi neɖo afɔe la, anye mia kple viwòwo ƒe domenyinu tegbee, elabena edze Yehowa, nye Mawu la yome blibo.

¹⁰ Kpɔ ɖa, Yehowa na metsi agbe, abe alesi wòdo ŋugbe ene; esi Yehowa gblɔ nya sia na Mose la, ƒe blane vɔ atɔ̃ enye si va yi, esiwo me Israel zɔ gbedzi. Mexɔ ƒe blanyi vɔ atɔ̃ egbe siawo,

¹¹ gake ŋusẽ le ŋunye egbe siawo, abe alesi wònɔ ŋunye le gbesigbe Mose dɔm la ene; alesi ŋusẽ nɔ ŋunye ɣemaɣi, be mate ŋu awɔ aʋa, ado go, eye ava me la, nenema wogale ŋunye fifia hã.

¹² Eyata tsɔ tonyigba sia, si ŋu Yehowa ƒo nu le gbemagbe la nam; elabena wò ŋutɔ èsee gbemagbe bena, Enakitɔwo le afima, eye duawo lolo hesesẽ. Ɖewohĩ Yehowa anɔ kplim, be manyã wo, abe alesi Yehowa gblɔ ene.

¹³ Tete Yosua yrae, eye wòtsɔ Xebron na Kaleb, Yefune vi la, ne wòanye eƒe domenyinu.

¹⁴ Eyata Xebron zu Kaleb, Yefune vi, si nye Kenizitɔ la, ƒe domenyinu vaseɖe egbe, elabena edze Yehowa, Israel ƒe Mawu la yome blibo.

¹⁵ Woyɔ Xebron tsã bena Araba ƒe du, amesi nye ame gãtɔ le Enakitɔwo dome. Eye anyigba la kpɔ gbɔdzɔe tso aʋawɔwɔ me.