Yosua 12 - Biblia alo Ŋɔŋlɔ Kɔkɔe La Le Eʋegbe Me 1913

Fia blaetɔ̃ vɔ ɖeke, siwo dzi Israel-viwo ɖu la, ƒe ŋkɔwo.

¹ Esiawo nye anyigba dzi fia, siwo dzi Israel-viwo ɖu, amesiwo ƒe anyigba woxɔ le Yordan godo le ɣedzeƒe gome, tso Arnon-tɔʋu la nu vaseɖe Xermon-to la gbɔ kple gbadzaƒe blibo, si le ɣedzeƒe:

² Sixon, Amoritɔwo ƒe fia, si nɔ Xesbon, amesi ƒe dziɖuƒe tso Aroer gbɔ, le Arnon-tɔʋu la nu tso tɔʋu la ƒe go ɖeka hetsɔ Gilead ƒe afã ɖe eme vaseɖe Yabok-tɔʋu, si nye Amon-viwo ƒe liƒo la nu,

³ tso gbadzaƒe heyi Kinerot-ƒu la nu le ɣedzeƒe heva tagbaƒu, si nye Dzeƒu la nu, le ɣedzeƒe heɖo ta Bet-Yesimot, vaseɖe Pisga ƒe aga nu le dziehe.

⁴ Hekpe ɖe Og, Basan-fia, amesi nye ame dzɔtsu mlɔea, si nɔ Astarot kple Edrei ƒe anyigba ŋu,

⁵ amesi ƒe dziɖuƒe nye Xermon-to, Salxa kple Basan blibo la, vaseɖe Gesuritɔwo kple Maaxati-tɔwo ƒe liƒo ŋu kple Gilead afã heva ke ɖe Sixon, Xesbon-fia, ƒe anyigba ŋu.

⁶ Yehowa ƒe dɔla Mose kple Israel-viwo ɖu wo dzi, eye Yehowa ƒe dɔla Mose tsɔe na Ruben-viwo, Gad-viwo kple Manase ƒe to afã wònye wo tɔ.

⁷ Esiawo nye anyigba dzi fia, siwo dzi Yosua kple Israel-viwo ɖu, le Yordan ƒe go si dzi le ɣeto ɖoƒe gome, tso Baal-Gad le Libanon ƒe bali me vaseɖe to tamekokoe, siwo ɖo ta Seir la gbã; eye Yosua tsoe na Israel-toawo wo tɔ wo tɔe, ne wòanye wo tɔ,

⁸ amesiwo le towo dzi, gbadzaƒe, tagba, towo ŋu kple gbegbe kpakple dziehe, siwo nye Xititɔwo, Amoritɔwo, Kanaanitɔwo, Perizitɔwo, Xiwitɔwo kple Yebusitɔwo:

⁹ Yerixo-fia ɖeka, Ai, si le Betel gbɔ la me fia ɖeka,

¹⁰ Yerusalem-fia ɖeka, Xebron-fia ɖeka,

¹¹ Yarmut-fia ɖeka, Laxis-fia ɖeka,

¹² Eglon-fia ɖeka, Gezer-fia ɖeka,

¹³ Debir-fia ɖeka, Geder-fia ɖeka,

¹⁴ Xorma-fia ɖeka, Arad-fia ɖeka,

¹⁵ Libna-fia ɖeka, Adulam-fia ɖeka,

¹⁶ Makeda-fia ɖeka, Betel-fia ɖeka,

¹⁷ Tapua-fia ɖeka, Xefer-fia ɖeka,

¹⁸ Afek-fia ɖeka, Saron-fia ɖeka,

¹⁹ Madon-fia ɖeka, Xazor-fia ɖeka,

²⁰ Simron-Meron-fia ɖeka, Axsaf-fia ɖeka,

²¹ Tanax-fia ɖeka, Megido-fia ɖeka,

²² Kedes-fia ɖeka, Yokneam, si le Karmel ŋu la me fia ɖeka,

²³ Dor-fia, si le Nafot-Dor la ɖeka, Gilgal-dukɔ vovovowo ƒe fia ɖeka,

²⁴ kple Tirza-fia. Fiawo katã le blaetɔ̃ vɔ ɖekɛ.