Yohanes 9 - Biblia alo Ŋɔŋlɔ Kɔkɔe La Le Eʋegbe Me 1913

Yesu vɔ dɔ amea ɖe, si nye ŋkuagbãtɔ tso eƒe dzidzime ke la, le Sabat dzi.

¹ Eye esi wòle eme tsom yina la, ekpɔ amea ɖe, si nye ŋkuagbãtɔ tso eƒe dzidzi me ke.

² Eye eƒe nusrɔ̃lawo biae bena: Rabi, ameka wo nuvɔ̃, amesia loo, alo eƒe dzilawo bena, wodzii ŋkugbagbãe mahã?

³ Yesu do ŋu bena: Menye amesia alo eƒe dzilawoe wo nuvɔ̃ o, ke boŋ bena woaɖe Mawu ƒe dɔwɔwɔwo ɖe go afia le eyama me.

⁴ Ele nam bena, mawɔ amesi dɔm ɖa la ƒe dɔwɔwɔwo, zi alesi ŋkeke li; zã gbɔna dodo ge, le esi me amea ɖeke mate ŋu awɔ dɔ o.

⁵ Esi mele xexeame la, xexeame ƒe kekeli menye.

⁶ Esi wògblɔ esiawo la, eɖe ta ɖe anyigba, eye wotsɔ ta la henyã anyi, eye wòtsɔ anyi la hesisi ɖe eƒe ŋkuwo dzi,

⁷ eye wògblɔ nɛ bena: Yi, nale tsi le Siloa-ta la me (si gɔme enye wodɔe ɖa). Tete wòyi ɖale tsi la, eye wòva le nu kpɔm.

⁸ Eyata eƒe aƒelikawo kple amesiwo kpɔe tsã bena, nubiala wònye la, gblɔ bena: Ɖe menye amesia nɔ anyi henɔa nu biam la o mahã?

⁹ Bubuwo gblɔ bena: Eyae; ɖewo hã gblɔ bena: Ɖabi, ke boŋ ɖe wòɖii; eya ŋutɔ gblɔ bena: Nyee.

¹⁰ Eyaŋuti wogblɔ nɛ bena: Ekema aleke wo wò ŋkuwo ʋu mahã?

¹¹ Eɖo ŋu bena: Amesi woyɔna be Yesu la, eyae nyã anyi, eye wòtsɔe sisi ɖe nye ŋkuwo dzi, eye wògblɔ nam bena: Yi Siloa me nale tsi; ale meyi ɖale tsi, eye mekpɔ nu.

¹² Wogblɔ nɛ bena: Afika eyama le? Egblɔ bena: Nyemenyae o.

Farisitɔwo dzro nukudɔwɔwɔ la me.

¹³ Wokplɔ amesi ƒe ŋku gbã tsã la yi ɖe farisitɔwo gbɔ.

¹⁴ Ke gbesigbe Yesu nyã anyi heʋu eƒe ŋkuwo la, enye Sabat-ŋkeke.

¹⁵ Tete farisitɔwo hã gabiae, alesi wòwɔ hafi kpɔ nu. Eye wògblɔ na wo bena: Anyi wòtso heɖo nye ŋkuwo dzi, eye mele tsi, eye mele nu kpɔm.

¹⁶ Tete farisitɔwo dome ɖewo gblɔ bena: Amesia la menye Mawu gbɔ wòtso o, elabena medzra Sabat la ɖo o. Bubuwo gblɔ bena: Aleke nuvɔ̃wɔla ate ŋu awɔ dzesi siawo tɔgbe mahã? Eye mamã ɖo wo dome.

¹⁷ Azɔ wògagblɔ na ŋkuagbãtɔ la bena: Wò la, esi woʋu ŋkuwo na wò la, aleke gblɔm nèle le eŋuti mahã? Eye wògblɔ bena: Nyagblɔɖila wònye.

¹⁸ Ke Yudatɔwo mexɔe se le eŋuti bena, ŋkuagbãtɔ wònye tsã hele nu kpɔm o, vaseɖe esime woyɔ amesi gale nu kpɔm la, ƒe dzilawo vɛ.

¹⁹ Eye wòbia wo bena: Ɖe esia nye miaƒe vi, si miegblɔ bena, ŋkugbagbã wodzii mahã? Aleke wɔ wòle nu kpɔm azɔ mahã?

²⁰ Eƒe dzilawo ɖo ŋu gblɔ bena: Míenyae bena, amesia mía vi wònye, eye ŋkugbagbã wodzii;

²¹ ke alesi wɔ wòle nu kpɔm azɔ la, míenyae o, alo amesi nu ŋkuwo ne la, míenyae o; mibia eya ŋutɔ, etsi, aƒo nu le eɖokui ŋuti.

²² Esiawo eƒe dzilawo gblɔ, elabena wovi Yudatɔwo; elabena Yudatɔwo ɖo ɖe anyi xoxoxo bena, ne amea ɖe katse ʋu eyama me bena, Kristo wònye la, ekema yewoaɖee le yewoƒe ha me.

²³ Le esia ta eƒe dzilawo gblɔ bena; Etsi, mibia eya ŋutɔ.

²⁴ Ale wogayɔ amesi ƒe ŋkuwo gbã tsã la zi evelia, eye wogblɔ nɛ bena: Tsɔ kafukafu na Mawu, miawo míenyae bena, amesia la nuvɔ̃wɔla wònye.

²⁵ Tete eyama xɔ dzi bena: Nenye nuvɔ̃wɔla wònye la, nyemenyɛ o, nu ɖeka ko menya bena, ŋkuagbãtɔ menye tsã, azɔ mele nu kpɔm.

²⁶ Eye wògagblɔ ne bena: Nuka wòwɔ na wòa? Aleke wòdu ŋku na wò mahã?

²⁷ Eɖo ŋu na wo bena: Megblɔe na mi xoxo, eye miesee o; nukaŋuti miele didim bena, miagasee mahã? Ɖe miawo hã miele didim bena, míazu eƒe nusrɔ̃lawo mahã?

²⁸ Eye wodzui gblɔ bena: Wòe nye eyama ƒe nusrɔ̃la, ke miawo la Mose ƒe nusrɔ̃lawo mienye.

²⁹ Mienya bena, Mawu ƒo nu kple Mose; ke amesia la mienyã afisi wòtso o.

³⁰ Ame la xɔ dzi gblɔ na wo bena: Esia mee wòwɔ nuku le bena, mienya afisi wòtso o, eye wòʋu nye ŋkuwo.

³¹ Mienya bena, Mawu meɖoa to nuvɔ̃wɔlawo o, ke boŋ ne amea ɖe vɔ̃a Mawu, eye wòwɔa eƒe lɔlɔ̃nu la, eyae woɖoa toe.

³² Tso xexemedzɔgbe taa la womese kpɔ bena, amea ɖe ʋu ŋkuwo na amesi wodzi ŋkugbagbã o.

³³ Ɖe amesia metso Mawu gbɔ o la, ne mate ŋu awɔ naneke o.

³⁴ Woxɔ dzi gblɔ nɛ bena: Nuvɔ̃ me pete wodzi wò ɖo, eye wòa nèle nu fiãm mi mahã? Eye wonyae do goe.

Yesu wu gbedada na ŋkuagbãtɔ la nu.

³⁵ Yesu se bena, wonyae ɖo goe, eye esi wokpɔe la, egblɔ bena: Ele Mawuvi la dzi xɔm le sesem mahã?

³⁶ Eɖo ŋu nɛ gblɔ bena: Aƒetɔ, amekae nye esi, bena maxɔ edzi ase mahã?

³⁷ Yesu gblɔ nɛ bena: Amesi nèkpɔ kple amesi le nu ƒom kpli wò la, eyae.

³⁸ Ke egblɔ bena: Aƒetɔ, mexɔe se; eye wòdze klo ɖe ta agu nɛ

³⁹ Eye Yesu gblɔ bena: Nye la ʋɔnudɔdrɔ̃ ta meva xexe sia me ɖo, bena amesiwo mele nu kpɔm o la, ne woakpɔ nu, eye amesiwo le nu kpɔm la, ne woazu ŋkuagbãtɔwo?

⁴⁰ Eye farisitɔ, siwo le eŋuti la see, eye wogblɔ nɛ bena: Ɖe miawo hã míenye ŋkuagbãtɔwo mahã?

⁴¹ Yesu gblɔ na wo bena: Ɖe míenye ŋkuagbãtɔwo la, ne nuvɔ̃ mele mia ŋu o; ke azɔ la miele gbɔgblɔm bena: Miele nu kpɔm; eyata miaƒe nuvɔ̃ la tsi anyi.