Yohanes 4 - Biblia alo Ŋɔŋlɔ Kɔkɔe La Le Eʋegbe Me 1913

Yesu ƒe nuƒoƒo kple Samaria-nyɔnu la.

¹ Azɔ esi Yesu nyae bena, farisitɔwo se bena, Yesu le mawutsi dem ta na amewo, eye wòle nusrɔ̃lawo wɔm wu Yohanes la

² gake Yesu ŋutɔ mede mawutsi ta na amewo o, ke boŋ eƒe nusrɔ̃lawoe,

³ egblẽ Yudea ɖi, eye wògadzo heyina Galilea.

⁴ Ke ele nɛ be, wòato Samaria ayi.

⁵ Ale wòva Samariatɔwo ƒe dua ɖe, si woyɔna be Sixar me, si le ɖe anyigba, si Yakob na via Yosef la ŋuti;

⁶ eye Yakob ƒe vudo le afima. Eye esi mɔzɔzɔ te ɖeɖi Yesu ŋu la, ebɔbɔ na anyi nenema ke ɖe vudo la to, anɔ gaƒoƒo adelia me.

⁷ Eye Samaria-nyɔnua ɖe va tsi du ge. Yesu gblɔ nɛ bena: Na ɖem mano.

⁸ Elabena eƒe nusrɔ̃viwo yi ɖe dua me, be woaƒle nuɖuɖu.

⁹ Samaria-nyɔnu la gblɔ nɛ bena: Aleke wò, si nye Yudatɔ la, nèle tsi biam nye, si nye Samaria-nyɔnu, be yeano mahã? — Elabena Yudatɔwo kple Samaria-tɔwo menyina o —

¹⁰ Yesu ɖo ŋu gblɔ nɛ bena: Ɖe nènya Mawu ƒe nunana la kple amesi nye amesi gblɔ na wò bena: Na ɖem mano la, ne wò boŋ àbiae, eye wòana agbetsi wò.

¹¹ Nyɔnua gblɔ nɛ bena: Aƒetɔ, tsikunu mele asiwò o, eye vudoa me goglo; afika gɔ̃ nèkpɔ agbetsi la tsoe mahã?

¹² Alo ɖe nèwu mía fofo Yakob, amesi na vudo la mi, eye eya ŋuta kple viawo kpakple eƒe lãwo no eme tsi mahã?

¹³ Yesu ɖo ŋu gblɔ nɛ bena: Amesiame, si le tsi sia ƒe ɖe nom la, tsikɔ agawui;

¹⁴ ke amesi ke lano tsi, si nye manae ƒe ɖe la, tsikɔ megale eya wu ge akpɔ o vaseɖe mavɔmavɔ me; elabena tsi, si nye manae la, latrɔ azu tsivudo le eme, esi anɔ dzidzim ayi ɖe agbe mavɔ me.

¹⁵ Nyɔnua gblɔ nɛ bena: Aƒetɔ, na tsi siam, bena tsikɔ nagawum alo mava afisia tsi du ge o.

¹⁶ Egblɔ nɛ bena: Heyi ɖayɔ srɔ̃wò, eye nava afisia.

¹⁷ Nyɔnua xɔ dzi, eye wògblɔ nɛ bena: Srɔ̃ mele asinye o. Yesu gblɔ nɛ bena: Egblɔe nyuie bena: Srɔ̃ mele asinye o;

¹⁸ elabena ŋutsu atɔ̃ nɔ asiwò kpɔ, eye amesi le asiwò fifia la, menye srɔ̃wo wònye o; èto nyateƒe le esia me.

¹⁹ Nyɔnua gblɔ nɛ bena: Aƒetɔ, medze sii bena, nyagblɔɖila nènye.

²⁰ Mia fofowo doa gbe ɖa le to sia dzi, eye miawo miegblɔ bena, teƒe le Yerusalem, afisi wòle be, woaɖo gbe ɖa le.

²¹ Yesu gblɔ nɛ bena: Nyɔnu, xɔm se bena, gaƒoƒo gbɔna, esi menye to sia dzi alo Yerusalem miado gbe ɖa na Fofo la le o.

²² Miawo la miedoa gbe ɖa na nusi mienya o; miawo la miedoa gbe da na nusi mienya; elabena xoxo la tso Yudatɔwo gbɔ.

²³ Gake gaƒoƒo gbɔna, eye wòde azɔ, esi nyateƒegbedoɖalawo ado gbe ɖa na Fofo la le gbɔgbɔ kple nyateƒe me; elabena Fofo la dia gbeɖoɖala siawo tɔgbe.

²⁴ Mawue nye Gbɔgbɔ, eye amesiwo le gbe dom ɖa nɛ la, ele be, woado gbe ɖa le gbɔgbɔ kple nyateƒe me.

²⁵ Nyɔnua gblɔ nɛ bena: Menyae bena, Mesia, si woyɔna be Kristo la gbɔna; ne eyama va la, agblɔ nuwo katã afia mí.

²⁶ Yesu gblɔ nɛ bena: Nye, amesi le nu ƒom kpli wò la, nyee.

²⁷ Wole esia dzi eƒe nusrɔ̃lawo va, eye wòwɔ mo yaa na wo bena, ele nu ƒom kple nyɔnua ɖe, gake amea ɖeke megblɔ bena: Nuka dim nèle alo nuka nu ƒom nèle kplii mahã o.

²⁸ Tete nyɔnu la gblẽ eƒe tsize ɖi, eye wòdzo yi ɖe dua me, eye wògblɔ na ameawo bena:

²⁹ Miva kpɔ amea ɖe, si gblɔ nusiwo katã mewo kpɔ la nam; ɖe menye esia nye Kristo la oa?

³⁰ Tete wodo go le dua me, eye wova egbɔ.

³¹ Le esia me la nusrɔ̃lawo ɖe kuku nɛ gblɔ bena: Rabi, va ɖu nu.

³² Ke egblɔ na wo bena: Nye la nuɖuɖu le asinye, be maɖu, si miawo mienya o.

³³ Eyaŋuti nusrɔ̃lawo gblɔ na wo nɔewo bena: Ɖe amea ɖe na nanee woɖu mahã?

³⁴ Yesu gblɔ na wo bena: Nye nuɖuɖu enye bena, mawɔ amesi dom ɖa la ƒe lɔlɔ̃anu, eye mawu eƒe dɔwɔwɔ la nu.

³⁵ Menye miawoe gblɔ bena: Ɣleti ene koe susɔ, eye nuŋeɣi la laɖo o mahã? Kpɔ ɖa, mele egblɔm na mi bena: Miwu miaƒe ŋkuwo dzi, eye miakpɔ agblewo dzi ɖa bena, woƒu xoxo, eye wonyo na ŋeŋe.

³⁶ Amesi ŋea nu la, kpɔa fetu, eye wòƒoa kutsetse nu ƒu ɖe agbe mavɔ me, bena amesi ƒã nu kple amesi ŋe nu la, siaa nakpɔ dzidzɔ.

³⁷ Elabena le eya me nya, si wogblɔ ɖi be: Bu dona, bu ŋena la, enye nyateƒe.

³⁸ Nye la medo mí, be míaŋe nusi ŋuti miedze agbagba le o; ame bubuwo dze agbagba, eye miawo miege ɖe woƒe dɔwɔwɔ la me.

³⁹ Eye tso du ma me Samariatɔwo dome ame geɖe xɔ edzi se le nyɔnu, si ɖi ɖase bena: Egblɔ nusiwo katã mewɔ kpɔ la fiãm la, ƒe nya ŋuti.

⁴⁰ Azɔ esi Samariatɔwo va egbɔ la, woɖe kuku nɛ bena, wòanɔ yewo, gbɔ, eye wònɔ afima ŋkeke eve.

⁴¹ Eye ame geɖe wu xɔ edzi se le eya ŋutɔ ƒe nya ŋuti,

⁴² eye wogblɔ na nyɔnua bena: Azɔ menye le wò nuƒoƒo ŋuti miexɔe se ɖo o; elabena mía ŋutɔwo miese, eye mienya bena, ame siae nye xexeame xɔla vavã.

Yesu da gbe le Kapernaum aʋafia la ƒe viŋutsu ŋu.

⁴³ Eye le ŋkeke eve megbe la edzo le afima yi ɖe Galilea.

⁴⁴ Elabena Yesu ŋutɔ ɖi ɖase bena, nyagblɔɖila mekpɔa bubu le eya ŋutɔ de o.

⁴⁵ Azɔ esi wòva Galilea la, Galileatɔwo xɔe, esime wokpɔ nusiwo katã wòwɔ le Yerusalem le ŋkekenyuie la ɖu ƒe; elabena woawo hã de ŋkekenyuie la ɖuƒe.

⁴⁶ Ale wògava Kana le Galilea, afisi wòtrɔ tsi wòzu wein le. Ke fiaŋutimea ɖe li, amesi ƒe vi le dɔ lém le Kapernaum.

⁴⁷ Esi wose bena, Yesu tso Yudea va Galilea la, eyi egbɔ, eye wòɖe kuku bena, neva, eye woada gbe le ye vi ŋu; elabena eɖo kudo nu.

⁴⁸ Tete Yesu gblɔ nɛ bena: Ne menye dzesiwo kple nukunuwo miekpɔ o la, miexɔnɛ sena o.

⁴⁹ Fiaŋutime la gblɔ nɛ bena: Aƒetɔ, va, hafi vinye la naku!

⁵⁰ Yesu gblɔ nɛ bena: Heyi, viwò le agbe. Eye ame la xɔ nya, si Yesu gblɔ nɛ la dzi se, eye wòyi.

⁵¹ Ke esi wòyina la, eƒe dɔlawo va kpee, eye woka eta nɛ bena: Viwò la tsi agbe.

⁵² Tete wòbia gaƒoƒo, si dzi wòka ɖe eme nɛ la wo tsitotsito. Eye wogblɔ nɛ bena: Etsɔ le gaƒoƒo adrelia dzi ŋudza la dzo le edzi.

⁵³ Tete fofoa dze sii bena, enye gaƒoƒo ma, si dzi Yesu gblɔ ne bena: Viwò la le agbe, eye eya ŋutɔ xɔe se kple eƒeme blibo katã.

⁵⁴ Esia nye dzesi evelia, si Yesu wɔ, esi wòtso Yudea va Galilea.