Yesaya 3 - Biblia alo Ŋɔŋlɔ Kɔkɔe La Le Eʋegbe Me 1913

Ʋɔnudɔdrɔ̃ ava dukɔ la dzi le eƒe nuvɔ̃, vevitɔ nyɔnuwo ƒe yakanuwɔwɔ ta.

¹ Elabena kpɔ ɖa, Aƒetɔ, Yehowa Zebaot, aɖe atizɔti kple ziɔɖeŋu ɖa le Yerusalem kple Yuda, abolo ƒe xɔnamewo katã kple tsi ƒe xɔnamewo katã,

² kalẽtɔwo kple aʋawɔlawo, ʋɔnudrɔ̃lawo kple nyagblɔɖilawo, afakalawo kple ame tsitsiwo,

³ ame blaatɔ̃wo ƒe amegãwo, ame ŋkutawo, adaŋudelavvo, aɖaŋuawo ƒe amegãwo kple dzotɔwo.

⁴ Matso ɖeviwo aɖo woƒe amegãwoe, eye ɖevinuwɔlawo aɖu fia ɖe wo dzi;

⁵ amewo asẽ ŋuta le wo nɔewo ŋu, eye amesiame le ehavi ŋu, ɖeviwo adze agbo ɖe amegã ɖeɖiwo ŋu, eye yakamewo ɖe bubumewo ŋu.

⁶ Ne amea ɖe alé nɔvia le fofoa ƒe me bena: „Avɔ le asiwò, eyata nanye míaƒe amegã, eye aƒe gbagbã sia nanɔ asiwò me“ la,

⁷ axɔ edzi agblɔ gbemagbe bena: „Nyemele abiwɔlaa ɖeke nye ge o, elabena abolo kple avɔa ɖeke mele aƒenye me o; migatsɔm ɖo dukɔ ƒe amegãe o!“

⁸ Elabena Yerusalem amũ, eye Yuda adze anyi, le esi woƒe aɖewo kple woƒe nuwɔwɔwo tso ɖe Yehowa ŋu, ne woaɖo dziku na eƒe kɔkɔenyenye ƒe ŋkuwo ta.

⁹ Woƒe moɖoɖo le ɖase ɖim le wo ŋu, eye woɖe woƒe nuvɔ̃wo fia faa abe Sodom ene, womeɣlae o; baba na wo, elabena woawo ŋutɔ ɖokui ŋu wole vɔ̃ wɔm ɖo.

¹⁰ Woayra ame dzɔdzɔewo, wo tɔ me nyo na wo, elabena woaɖu woƒe nuwɔwɔwo ƒe kutsetse.

¹¹ Baba na ame vɔ̃ɖi, etɔ me vɔ̃e nɛ, elabena nusi eƒe asi wɔ la, eya woatsɔ awɔe.

¹² Nye dukɔ ƒe ŋutasẽlawo nye ɖeviwo, eye nyɔnuwo ɖu fia ɖe wo dzi. Nye dukɔ, kplɔwòlawo nye ameflula wo, eye wobaɖa wò toƒe ƒe mɔwo.

¹³ Yehowa tso, be yeahe nya, etsi tre ɖi va, be yeadrɔ̃ ʋɔnu dukɔwo.

¹⁴ Yehowa kple eƒe dukɔ ƒe ame tsitsiwo kpakple eƒe amegãwo ɖi ʋɔnu be: Miawo miegblẽ nye weingble, eye mieha ame dahewo ƒe nuwo ɖe miaƒe xɔwo me.

¹⁵ Aƒetɔ, Yehowa Zebaot ƒe gbe enye si be: Nukaŋuti mienyã avuzi le nye dukɔ dzi, eye mieto hiãtɔwo ƒe mo nyanyanya?

¹⁶ Yehowa be: Esi Zion-nyɔnuviwo dana, eye wolia kɔ ganɛ nɔa yiyim, woɖoa mo ŋanɛ, wonɔa ble nyẽm xatsɛxatsɛ nɔa yiyim, eye woƒe afɔgawo nɔa ɖiɖim gleŋgleŋ la,

¹⁷ eyata Aƒetɔ la abebe ta na Zion-nyɔnuviwo, eye Yehowa aɖe ama wo.

¹⁸ Gbemagbe Aƒetɔ la aɖe afɔgɛwo ƒe atsyɔ̃ɖoɖo ɖa, ŋgoblanuwo, gaviwo,

¹⁹ togɛwo, abɔkpowo kple moxevɔwo,

²⁰ takuwo, afɔwo dome kɔsɔkɔsɔwo, alidziblanuwo, anuwɔtregoewo kple kadodowo,

²¹ asigɛwo kple ŋɔtigɛwo,

²² atsyɔ̃vɔwo, awu ʋlayawo, taɖedziwo kple akplowo,

²³ ahuhɔ̃ewo, awutewuiwo, tabablawo kple moxevɔ gãwo.

²⁴ Ʋeʋẽ kũ axɔ ɖe ʋeʋẽ lilili teƒe, ka axɔ ɖe alidziblanu teƒe, tabebe axɔ ɖe ɖaƒoƒo teƒe, akpanyatata axɔ ɖe awu ʋlaya nyui teƒe, eye dzobi axɔ ɖe nyonyo teƒe.

²⁵ Wò ŋutsuwo atsi yi nu, eye wò kalẽtɔwo atsi aʋa me.

²⁶ Woƒe agbowo axa nu, woata konyi, eye woaɖi ƒuƒlu abɔbɔ nɔ anyigba.