Yesaya 15 - Biblia alo Ŋɔŋlɔ Kɔkɔe La Le Eʋegbe Me 1913

Nyagblɔɖi le Moab ŋuti.

¹ Nya ɖe Moab ŋu. Vavãe, woaha Ar-Moab le zã, eye woatsrɔe! Vavãe, woaha Kir-Moab le zã, eye woatsrɔe!

² Dibon-nyɔnuvi yi nuxe ƒe avi fa ge, Moab le konyi fam le Neho kple Medeba ta me, wo katã wolũ ta kokoe, eye wolũ gewo katã.

³ Wosa akpanya ɖe ali le eƒe kpɔdomewo, amesiame le konyi fam le eƒe xɔtawo kple ablɔwo me, eye aɖatsi le dodom yoyoyo.

⁴ Xesbon kple Eleale le boboe dom, eye wose woƒe ɣli le Yahaz ke. Eyata Moab ƒe aʋawɔlawo ɖo ɣli, eye eƒe luʋɔ dzo kpekpekpe.

⁵ Nye dzi le nu xam ɖe Moab ŋu, eya, si ƒe amewo si de Zoar kple Eglat etɔ̃lia ke; elabena wole avi fam le Luxit-to dzi mɔ la dzi; elabena konyifaɣli le ɖiɖim le wo ŋu le Xoronayim-mɔta.

⁶ Elabena Nimrim ƒe tsiwo azu tagba, gbe aƒu, gbe fe aku, eye aŋgba manɔ anyi o.

⁷ Eyata woatso woƒe kesinɔnu, siwo woƒo ƒu, kple nusiwo wodzra ɖo la, ato amutitɔʋu la dzi ayi.

⁸ Elabena konyifaɣli kpe Moab ƒe liƒo ɖo, eƒe avifafa de Eglayim ke, eƒe avifafa de Beer-Elim ke!

⁹ Elabena ʋu yɔ Dimon ƒe towo me fũ; elabena magahe dzɔgbevɔ̃e ava Dimon dzi, eye makplɔ dzata ade Moab ƒe ame sisiwo kple amesiwo kpɔtɔ ɖe anyigba la dzi.