Yeremia 47 - Biblia alo Ŋɔŋlɔ Kɔkɔe La Le Eʋegbe Me 1913

Nyagblɔɖi le Filistitɔwo, Tiro kple Sidon ŋuti.

¹ Yehowa ƒe gbe, si va na nyagblɔɖila Yeremya ɖe Filistitɔwo ŋu, hafi Farao nava si Gaza, enye si;

² Ale Yehowa gblɔ esi: Kpɔ ɖa, tsi tso anyiehe gbɔna, eye wòazu tɔɖɔɖɔ aɖe anyigba kple edzi nuwo, duwo kple wò me nɔlawo; amegbetɔwo ado ɣli, eye anyigbadzitɔwo afa avi

³ le sɔtsuwo ƒe afɔtutu anyi kpitikpiti, le tasiaɖamwo ƒe zinyenyẽ kple tasiaɖamfɔwo ƒe hoowɔwɔ ta; fofowo matrɔ ɖe wo viwo ŋu o, elabena woƒe asi ado agblɔ

⁴ le ŋkeke, si gbɔna la ta, be woagblẽ Filistitowo katã, eye woatsrɔ̃ Tiro kple Sidon ƒe xɔnametɔ susɔeawo; elabena Yehowa le Filistitɔ, siwo kpɔtɔ ɖe Kaftor-ƒukpo dzi la gblẽ ge.

⁵ Gaza atsi ƒuƒlu, eye woatsrɔ̃ Askalon; ame dzɔtsuwo ƒe susɔeawo, ɣekaɣi miasi blini na mia ɖokui ase ɖo?

⁶ Ao, Yehowa ƒe yi, ɣekaɣi hafi nagbɔ ɖe eme? Trɔ va ɖo wò aku, wò akɔ nefa, eye nanɔ anyi kpoo!

⁷ Nukaŋuti nagbɔ ɖe eme, esi wònye Yehowa ye de se na wò ɖe Askalon ŋu, eye wòda wò ɖe ƒutawo ŋu ɖe?