Yeremia 27 - Biblia alo Ŋɔŋlɔ Kɔkɔe La Le Eʋegbe Me 1913

Yeremya bia tso fiawo kple Yudatɔwo si bena, woabɔbɔ wo ɖokui ɖe Babeltɔwo te, elabena esia nye Mawu ƒe lɔlɔ̃nu.

¹ Le Yuda-fia Zedekiya, Yosiya vi ƒe fiaɖuɖu ƒe gɔmedzedzea me la, Yehowa ƒe gbe sia va na Yeremya bena:

² Ale Yehowa gblɔ nam enye si: Gbe ka, eye nawɔ kɔkuti atsa ku wò kɔ.

³ Eye natsɔe de dɔla, siwo va Yuda-fia Zedekiya gbɔ le Yerusalem la si aɖo ɖe Edom-fia, Moab-fia, Amon-viwo ƒe fia, Tiro-fia kple Sidon-fia.

⁴ Eye nade gbe wo si aɖo ɖe woƒe aƒetɔwo bena: Yehowa Zebaot, Israel ƒe Mawu la be: Ale miagblɔ na miaƒe aƒetɔwo enye si:

⁵ Nyee tso nye ŋusẽ gã kple nye alo, si le dzi la, wo anyigba, amegbetɔwo kple lãwo, siwo le anyigba dzi, eye amesi dze ŋunye la, metsɔnɛ na.

⁶ Azɔ metsɔ anyigba siawo katã de asi na nye dɔla Babel-fia Nebukadnezar, eye gbemelãwo hãe metsɔ de asi nɛ, ne woasubɔe.

⁷ Eye dukɔ geɖewo asubɔ eya kple via kpakple eƒe tɔgbuiyɔvi, vaseɖe esime azã nade na eƒe anyigba, eye wòasubɔ dukɔ geɖewo kple fia gãwo.

⁸ Eye ne dukɔ kple fiaɖuƒea ɖe be, yemasubɔ Babel-fia Nebukadnezar o, eye yemade kɔ Babel-fia ƒe kɔkuti me o la, matsɔ yi, dɔwuame kple dɔvɔ̃ ahe to na dukɔ ma, vaseɖe esime mato eƒe asi dzi atsrɔ̃e keŋkeŋ, Yehowa ye gblɔe.

⁹ Ke miawo la migaɖo to miaƒe nyagblɔɖilawo, bokɔnɔwo, drɔ̃ekulawo, gbesalawo kple dzotɔwo, amesiwo le gbɔgblɔm na mi be, miasubɔ Babel-fia o la o.

¹⁰ Elabena alakpanya gblɔm wole ɖi na mi, be woaɖe mi ɖa le miaƒe anyigba dzi, ne manyã mi, eye miatsrɔ̃.

¹¹ Yehowa be: Ke dukɔ, si tsɔ eƒe kɔ de Babel-fia ƒe kɔkutĩ me, eye wòsubɔe la, mana wòano anyigba dzi aɖe dzi ɖi, ade agble ɖe edzi, eye wòana edzi.

¹² Meƒo nu kple Yuda-fia Zedekiya ɖe nya siawo nu pɛpɛpɛ gblɔ bena: Mitsɔ miaƒe kɔ de Babel-fia ƒe kɔkuti me, eye misubɔ eya kple eƒe dukɔ, ekema mianɔ agbe.

¹³ Nukaŋuti mia kple wò dukɔ miebe, yewoaku ɖe yi, dɔwuame kple dɔvɔ̃ si me, abe alesi Yehowa gblɔ ɖe dukɔ, si gbe be, yemasubɔ Babel-fia o la ŋu ene?

¹⁴ Eye migaɖo to nyagblɔɖila, siwo le gbɔgblɔm na mi be, migasubɔ Babel-fia o la ƒe nyawo o; elabena alakpanya gblɔm wole ɖi na mi.

¹⁵ Yehowa be: Menye nyee do wo o, alakpanya gblɔm wole ɖi le nye ŋkɔ me, ne manyã mi ɖa, eye mia kple nyagblɔɖila, siwo le nya gblɔm ɖi na mi la, miatsrɔ̃.

¹⁶ Eye ale megblɔ na nunɔlawo kple dukɔ blibo sia enye si: Yehowa be: Migaɖo to miaƒe nyagblɔɖila, siwo le nya gblɔm ɖi na mi be: Kpɔ ɖa, woahe Yehowa ƒe aƒe me nuwo agbɔe tso Babel kaba la ƒe nya o; elabena alakpanya gblɔm wole ɖi na mi.

¹⁷ Migaɖo to wo o, ke boŋ misubɔ Babel-fia, ekema mianɔ agbe. Nukaŋuti du sia nazu aƒedo ɖo?

¹⁸ Eye nenye nyagblɔɖilawo wonye, eye Yehowa ƒe gbe le wo si la, ekema woaƒo koko na Yehowa Zebaot, ne womagatsɔ nusiwo susɔ ɖe Yehowa ƒe me, ɖe Yuda-fia ƒe me kple ɖe Yerusalem la, ayi Babel o.

¹⁹ Elabena ale Yehowa Zebaot gblɔ ɖe sɔtiawo, gazɔ la, anyinɔawo kple nu bubuawo, siwo susɔ ɖe du sia me la ŋu;

²⁰ nusiwo Babel-fia Nebukadnezar metsɔ dzoe, esime wòɖe aboyo Yuda-fia Yexonya, Yoyakim vi, tso Yerusalem yi Babel hekpe ɖe Yuda kple Yerusalem ƒe bubumewo katã ŋu la o.

²¹ Elabena ale Yehowa Zebaot, Israel ƒe Mawu la, gblɔ ɖe nusiwo susɔ ɖe Yehowa ƒe me, ɖe Yuda-fia ƒe me kple ɖe Yerusalem la ŋu enye si:

²² Yehowa be: Woatsɔ wo ayi Babel, eye woatsi afima, vaseɖe gbesigbe mava kpɔ wo ɖa, eye makplɔ wo agbɔe va teƒe sia.