Yeremia 24 - Biblia alo Ŋɔŋlɔ Kɔkɔe La Le Eʋegbe Me 1913

Wotsɔ gboti nyui kple gboti manyomanyo wɔ kpɔdzidze na Yuda-dukɔ la.

¹ Esi Babel-fia Nebukaɖnezar ɖe aboyo Yuda-fia Yexonya, Yoyakim vi, kple Yuda-amegãwo, atikpalawo kple gbeɖewo tso Yerusalem yi Babel megbe la. Yehowa na mekpɔ gbotsetse kusi eve, si wotsɔ da ɖe Yehowa ƒe gbedoxɔ nu.

² Gbotsetse nyui, siwo le abe gbotsetse ŋgɔgbeawo ene la, le kusi ɖeka me, eye gbotsetse gbegblẽwo le kusi evelia me, esiwo gblẽ, ale be womelé ɖuɖu me o.

³ Eye Yehowa gblɔ nam be: Yeremya, nuka kpɔm nèle? Meɖo ŋu be. Gbotsetsewoe; gbotsetse nyuitɔwo nyo ŋutɔ, eye gbegblẽawo gblẽ vevie, ale be ɖuɖu mele wo ŋu o.

⁴ Tete Yehowa ƒe gbe va nam bena:

⁵ Ale Yehowa, Israel ƒe Mawu la, gblɔ esi: Mekpɔ nyuie ɖe Yuda ƒe aboyome, siwo menya tso teƒe sia ɖo ɖe Kaldea-nyigba dzi la ŋu, abe gbotsetse nyui siawo ene.

⁶ Matsɔ nye ŋku aɖo wo ŋu hena nyuiwɔwɔ, eye mana woatrɔ agba va anyigba sia dzi, matu wo, eye nyemagbã wo o, mado wo, eye nyemaho wo o.

⁷ Mana dzi wo, ne woatsɔ adze sim be, nyee nye Yehowa; woanye dukɔ nam, eye manye Mawu na wo, nenye be wotrɔ ɖe ŋunye tso woƒe dzi blibo me.

⁸ Alé Yehowa gblɔ esi: Alesi gbotsetse gbegblẽawo gblẽ, ale be ɖuɖu mele wo ŋu o la, nenema mawo Yuda-fia Zedekiya kple eƒe amegãwo, amesiwo kpɔtɔ ɖe Yerusalem, kple amesiwo susɔ ɖe anyigba la dzi, kpakple amesiwo le Egipte-nyigba dzi lae.

⁹ Matsɔ wo awɔ bibi kple dzɔgbevɔ̃e na anyigba dzi fiaɖuƒewo katã, woanye alɔmeɖenu, lodonu, ahamasinu kple ɖiŋudonu le teƒe, siwo katã manyã wo aɖo ɖo.

¹⁰ Maɖo yi, dɔwuame kple dɔvɔ̃ ɖe wo, vaseɖe esime woatsrɔ̃ avɔ le anyigba, si metsɔ na woawo kple wo fofowo la dzi.