Rut ƒe agbalẽ 2 - Biblia alo Ŋɔŋlɔ Kɔkɔe La Le Eʋegbe Me 1913

Rut fɔ bli le Boas ƒe agble me, eye Boas ve enu.

¹ Eye Naomi srɔ̃ ƒe ƒometɔa ɖe tso Elimelex ƒe ƒome la me, amesi ŋkɔ nye Boas, eye alɔme le esi ŋutɔ

² Eye Rut, Moab-nyɔnu la, gblɔ na Naomi bena: Mayi agble me aɖafɔ lu dzɔdzɔewo le amesi ave nunye la yome. Eye wògblɔ ne bena: Heyi, vinye!

³ Tete wòyi ɖafɔe le agble me le nuxalawo yome; eye nanetɔe agble la nye Boas, si tso Elimelex-ƒomea me la tɔ.

⁴ Eye kpɔ ɖa, Boas tso Betlexem va, eye wògblɔ na nuŋelawo bena: Yehowa anɔ anyi kpli mi! Woɖo ŋu ne bena: Yehowa ayra wò!

⁵ Tete Boas bia eƒe dɔla, si le nuxalawo dzi kpɔm bena: Ameka ƒe nyɔnuvie nye ekem?

⁶ Dɔla, si nye nuxalawo dzikpɔla, ɖo ŋu bena: Moab-nyɔnu, si kple Naomi wotso Moab-nyigba dzi vae.

⁷ Egblɔ nam bena: Na mafɔ nusiwo dzɔ ɖe nubablawo domee le nuxalawo yome la, aƒo ƒu na ɖokuinye. Ŋdi ke wòva hetsi anyi vaseɖe fifia, eye azɔ ko wòle gbɔgblɔm ɖe eme vie.

⁸ Tete Boas gblɔ na Rut bena: Vinye, see! Megayi ɖafɔe le agble bubua ɖeke me o, eye megadzo le afisia hã o; ke boŋ lé ɖokuiwò ɖe nye dɔlanyɔnuwo ŋu!

⁹ Afisiafi, si wole nu xam le agblea me le nèkpɔ la, ɖze wo yome, elabena mede se na dɔlawo bena, womegaɖe fu na wò o; eye ne tsikɔ le wuwòm la, yi ɖe zeawo gbɔ nano tsi, si dɔlawo du ɖi!

¹⁰ Tete wòɖe ta agu hegblɔ nɛ bena: Aleke nève nunye, eye nèbu nye amesi nye amedzro la ale gbegbe?

¹¹ Boas ɖo ŋu gblɔ nɛ bena: Wogblɔ nusiwo katã nèwɔ na lɔ̃xowò, le srɔ̃wò ƒe ku megbe kple alesi nègblẽ fofowò kple dawò kpakple mia de ɖi heʋu va ɖukɔi, si mènya tsã o gbɔ la nam

¹² Yehowa naɖo wò nuwɔwɔ teƒe na wò, eye fetu dedie le Yehowa, Israel ƒe Mawu, si ƒe aʋala te nèva sisi ge tso la, gbɔ na wò!

¹³ Tete wògblɔ bena: Nye aƒetɔ, ne ènya ve nunye ko, elabena èfa akɔ nam, eye nèƒo nu kple wò, dɔlanyɔnu xɔlɔ̃tɔe, evɔ wònye nyemeɖe wò dɔlanyɔnuwo dometɔa ɖeke nu o hafi!

¹⁴ Eye Boas gblɔ nɛ bena: Nuɖuɣi ɖo, eyata te va natsɔ abolo asisi ataditsi aɖu! Tete wòbɔbo nɔ nuxalawo kasa, eye wòtsɔ bliti memee nɛ, eye, wòɖui ɖi ƒo ɖe kpɔtɔ.

¹⁵ Emegbe wòtsi tre gayi efɔ ge. Tete Boas de se na eƒe dɔlawo bena: Mina wòafɔe le bablawo hã domee, eye migaka mo nɛ o;

¹⁶ milũ ɖewo le bablawo ŋu da ɖe anyi nɛ, be wòafɔ, eye migahe nya ɖe eŋu o!

¹⁷ Ale wòfɔe le agble la me vaseɖe ɣetrɔ, eye wòƒo nusiwo wòfɔ la, anɔ lu efa ɖeka.

¹⁸ Eye wòtsɔe va du la me, eye lɔ̃xoa kpɔ nusi wòfɔ. Tete wòɖe nusi wòɖu ɖi ƒo kpɔtɔ la, ɖe go hetsɔ nɛ.

¹⁹ Eye lɔ̃xoa biae bena: Afika nèyi ɖafɔe le egbea? Eye afika nèwɔ do le? Woayra amesi bu wò ale! Tete wòto amesi gbɔ wòwɔ dɔ le la, na lɔ̃xoa gblɔ bena: Ŋutsu, si gbɔ mewɔ dɔ le la, ŋkɔ nye Boas.

²⁰ Tete Naomi gblɔ na lɔ̃xoa bena: Yehowa, si mete eƒe amenuveve agbagbeawo kple kukuawo o la, ayrae! Eye Naomi gblɔ nɛ bena: Ŋutsu la míaƒe ƒometɔe, eye mía srɔ̃ɖia wònye.

²¹ Rut, Moab-nyɔnu la, ɖo ŋu bena: Egblɔ nam hã bena, malé ɖokuinye ɖe yeƒe dɔlawo ŋu, vaseɖe esime yeƒe nuŋeŋe blibo la nawu enu.

²² Tete Naomi gblɔ na lɔ̃xoa Rut bena: Enyo, vinye, be nèle dedem kple eƒe dɔlanyɔnuwo, ne amea ɖeke magawɔ naneke wò le agble bubu me o!

²³ Ale wòlé eɖokui ɖe Boas ƒe dɔlanyɔnuwo ŋu hele efɔfɔ dzi, vaseɖe esime lu kple ƒo ŋeŋe la wu enu, eye wònɔ lɔ̃xoa gbɔ.