Psalmowo 97 - Biblia alo Ŋɔŋlɔ Kɔkɔe La Le Eʋegbe Me 1913

Zion kpɔ dzidzɔ be, Mawu nye ŋusẽ katã tɔ.

¹ Yehowa nye fia, anyigba netso aseye, ƒukpo geɖeawo nekpɔ dzidzɔ!

² Alilikpo kple tsizi ƒo xlãe, dzɔdzɔenyenye kple ʋɔnudɔdrɔ̃ nye eƒe fiazikpui ƒe anyinɔ.

³ Dzo le yiyim le eŋgɔ, eye wòfiã eƒe futɔwo godoo va kpe.

⁴ Eƒe dzikedzowo klẽ ɖe xexea me; anyigba kpɔe, eye wòlulu.

⁵ Towo lólo abe anyigba ene le Yehowa ŋku me, le anyigba blibo la ƒe Aƒetɔ ŋku me.

⁶ Dziƒowo de gbe ƒã eƒe dzɔdzɔenyenye, eye dukɔwo katã kpɔ eƒe ŋutikɔkɔe.

⁷ Ŋu nekpe aklama kpakpɛ subɔlawo katã, amesiwo tsɔa legbawo ƒoa adegbee, mawuwo katã mede ta agu nɛ!

⁸ Zion see, eye dzi dzɔe, Yuda-nyɔnuvi tso aseye le wò ʋɔnudɔdrɔ̃ ta, Yehowa.

⁹ Elabena wò Yehowa, ènye tatɔ le anyigba blibo la dzi, edo kpo ŋutɔ ɖe mawuwo katã dzi.

¹⁰ Mi amesiwo lɔ̃a Yehowa la, milè fu vɔ̃! Ekpɔa eƒe mawumemewo ƒe luʋɔ ta, eye wòɖea wo tsoa ame vɔ̃ɖiwo si me.

¹¹ Kekeli dona na ame dzɔdzɔewo kple dzidzɔ na amesiwo ƒe dzi toa mɔ ɖeka la.

¹² Mi ame dzɔdzɔewo, mikpɔ dzidzɔ de Yehowa ŋu, eye mikafu eƒe ŋkɔ kɔkɔe la!