Psalmowo 90 - Biblia alo Ŋɔŋlɔ Kɔkɔe La Le Eʋegbe Me 1913

AGBALẼ ENELIA. Mawu mavɔtɔ la enye amegbetɔwo ƒe sitsoƒe.

¹ Mose, Mawu ƒe ame, ƒe gbedodoɖa. Aƒetɔ, sitsoƒe nènye na mí tso dzidzime yi dzidzime.

² Hafi towo nava do, eye anyigba kple xexeme nadzɔ la, wòe nye Mawu tso mavɔ me yi mavɔ me.

³ Wòe nana amegbetɔwo gatrɔna zua kewɔ, eye nègblɔna bena: Mitrɔ gbɔ, mi amegbetɔviwo!

⁴ Elabena ƒe akpe le ŋkuwò me ahe etsɔ ŋkeke, si nu va yi, kple ŋudzɔɣi le zã me ene.

⁵ Ekplɔ wo yii, alɔ̃dɔdɔ ko wonye; ŋdi la wodze abe gbe ene.

⁶ Ŋdi la eƒo se, eye wòdze, fiẽ la woyae, eye wòƒu.

⁷ Elabena wò dɔmedzoe na mía nu yi, eye wò dziku ɖe mi ɖa kple ŋɔdzi.

⁸ Etsɔ míaƒe vodadawo ɖo wò ŋku me, kple míaƒe nu ɣaɣlawo ɖo wò mo ƒe kekeli nu.

⁹ Elabena miaƒe ŋkekewo katã nu yi le wò dziku la nu, míaƒe ƒewo vɔ ɖe mi abe ame ƒe ŋeŋe ene.

¹⁰ Míaƒe agbenɔƒewo nye ƒe blaadre, ne ede ƒã la, ƒe blanyi, eye fuɖename kple hlã nye wo aɖegbeƒonu; elabena wova yi kabakaba, eye míedze.

¹¹ Amekae dze si wò dɔmedzoe ƒe ŋusẽ kple wò dziku de alesi woavɔ̃ wò nui?

¹² Fia alesi míaxlẽ míaƒe ŋkekewoe la mí, ne dzi nyanu nado mía si!

¹³ Yehowa, trɔ kɔ dzro! Vaseɖe ɣekaɣie? Eye na wò dɔme natrɔ de wò dɔlawo ŋu!

¹⁴ Tsɔ wò amenuveve ɖi ƒo na mí le ŋdi, ekema míatso aseye, eye míakpɔ dzidzɔ le míaƒe ŋkekewo katã me!

¹⁵ Do dzidzɔ na mí ɖe ɣeyiɣi, si nète mí ɖe anyi, kple ƒe, siwo me dzɔgbevɔ̃e ɖi kpe mí la nu!

¹⁶ Na wo dɔwɔwɔ nadze na wò dɔlawo, eye wò atsyɔ̃ nanɔ viwòwo ŋu!

¹⁷ Ale Aƒetɔ, mía Mawu, ƒe ɖɔmenyo nanɔ mía dzi, eye wòana míaƒe asinudɔwo nali ke zã na mi, ẽ, míaƒe asinudɔwo wòana woayi dzi nyuie!