Psalmowo 83 - Biblia alo Ŋɔŋlɔ Kɔkɔe La Le Eʋegbe Me 1913

Kukuɖeɖe le kpekpeɖeŋu ta le Israel ƒe futɔwo ŋuti.

¹ Hadzidzi, Asaf ƒe ha.

² Mawu, ɖoɖoe megazi le ŋuwò o, Mawu, megazi kpi o, eye megaɖo ho to o!

³ Elabena kpɔ ɖa, wò futɔwo nyrã, eye wò ketɔwo kɔ ta dzi.

⁴ Wole tame ɖom le aye me de wò dukɔ ŋu, eye wole adaŋu dem ɖe wò amesiwo nèɣla la ŋu.

⁵ Wole gbɔgblɔm be: Miva, míatsrɔ wo, ne womaganye dukɔ o, eye ne womagaɖo ŋku Israel ƒe ŋkɔ dzi azɔ o!

⁶ Wode adaŋu nu ɖekɛ, ŋuwò wobla nu ɖo:

⁷ Edom ƒe agbadɔwo kple Ismaeltɔwo, Moabtɔwo kple Hagaritɔwo,

⁸ Gebal, Amon, Amalek, Filistitɔwo kple Tirotɔwo.

⁹ Asur hã ɖe wo dzi, woawoe nye Lot-viwo ƒe alɔ. Sela.

¹⁰ Wɔ wo abe Midiantɔwo kple Sisera ene, abe Yabin le Kison-tɔʋu la nu ene!

¹¹ Wotsrɔ̃ le Endor, eye wozu aɖu na anyigba.

¹² Wɔ woƒe amegãwo abe Oreb kple Zeeb ene, eye woƒe aʋafiawo katã ahe Zebax kple Zalmuna ene;

¹³ wo, amesiwo gblɔ be: Miaxɔ Mawu ƒe nɔƒewo na mía ɖokui!

¹⁴ Nye Mawu, wɔ wo abe yali ene, eye abe gbe ƒuƒu le ya nu ene!

¹⁵ Alesi dzo bia ave, eye dzo ƒe ade tɔa dzo towoe la,

¹⁶ nenema natsɔ wò ya ʋuduʋudu ati wo yomee, eye nado dzikatsoƒoe na wo kple wò ahom!

¹⁷ De ŋukpe mo na wo fũ, ne woadi wò ŋkɔ, Yehowa!

¹⁸ Ŋu akpe wo, eye ŋɔ adzi wo tegbee, woƒe mo atsi dã, eye woatsrɔ̃,

¹⁹ ne woadze sii be, ŋkɔwòe nye Yehowa, eye wò ɖeɖe koe ɖo kpo ɖe anyigba blibo la dzi!