Psalmowo 74 - Biblia alo Ŋɔŋlɔ Kɔkɔe La Le Eʋegbe Me 1913

Nuxaxa le kɔkɔeƒe la gbegbe ŋuti.

¹ Asaf ƒe nufiameha. Mawu, nukaŋuti nègbe mí ɖikaa, eye wò dɔmedzoe le adzudzɔ tum ɖe wò lãnyiƒe ƒe lãhɔwo ŋu?

² Ɖo ŋku wò ameha, si nèxɔ ƒle le blema, eye nèɖe, be natsɔ awɔ domenyinu na ɖokuiwò, kple Zion-to, si dzi nèle la dzi!

³ De wò afɔ yi gli gbagbã ɖikaɖikawo gbɔ! Futɔ la gblẽ nuwo katã le kɔkɔeƒe la.

⁴ Wò ketɔwo le xɔxlɔ̃m le wò takpeƒewo titina, eye woɖo woƒe dzesiwo, ne woanye dzesiwo.

⁵ Ele abe amea ɖe, si kɔ fia dzi le ave dodo me,

⁶ eye wòtsɔ fia kple zu gbã eƒe ati, siwo katã ŋu wowɔ aɖaŋu do la ene.

⁷ Wotɔ dzo wò kɔkɔeƒe la, wogblẽ kɔ ɖo na wò ŋkɔ ƒe nɔƒe la vaseɖe anyigba ke,

⁸ hele gbɔgblɔm le woƒe dzi me be: Mina míate wo katã ɖe anyi! Wotɔ dzo takpeƒe kɔkɔewo katã.

⁹ Míele míaƒe dzesiwo kpɔm o; nyagblɔɖilaa ɖeke megali o, eye amea ɖeke mele mía dome anya ɣesiɣi wòava ase ɖo o.

¹⁰ Mawu, ɣekaɣi ketɔ la anɔ vlo dom, eye futɔ la anɔ alɔme ɖem le wò ŋkɔ ŋu ɖikaa ase do?

¹¹ Nukaŋuti nèhe wò asi kple wò nuɖusi de megbe? Doe ɖa tso wò akɔnu nagblẽ nu!

¹² Ke Mawue nye fianye tso blema ke, amesi wɔ xɔnamedɔwo le anyigba dzi.

¹³ Etsɔ wò ŋusẽ mã atsiaƒu me ɖe eve, eye nègbã bosowo ƒe ta le tɔwo dzi.

¹⁴ Egbã lo ƒe ta, eye nètsɔe wɔ nuɖuɖu na gbegbenɔlawo ƒe amehawo.

¹⁵ Wòe na tsidzɔƒewo kple lɔʋuwo si, eye nèna tɔsisi gãwo mie.

¹⁶ Tɔwòe nye ŋkeke, eye tɔwòe nye zã, wòe ɖo kekeli kple ɣe.

¹⁷ Wòe de anyigba ƒe liƒowo katã, eye wòe wɔ dzomeŋɔli kple vuvɔŋɔli.

¹⁸ Yehowa, do ŋui be, wòe futɔ la do vloe, eye wò ŋkɔ ŋu dukɔ bometsila la ɖe alɔme le!

¹⁹ Megatsɔ wò akpakpa ƒe luʋɔ de asi na gbemelãwo o, eye megaŋlɔ wò hiãtɔwo ƒe agbe be ɖikaa o!

²⁰ Ɖo ŋku nubabla la dzi! Elabena ŋutasesẽ ƒe nɔƒewo yɔ anyigba ƒe ɣaɣlɛƒewo fũ.

²¹ Megana amesi wote de anyi la, natrɔ kple ŋukpe o! Hiãtɔwo kple ame dahewo akafu wò ŋkɔ.

²² Mawu, tso, nawɔ wò aʋa! Ɖo ŋu alɔme, si bometsilawo le ɖeɖem le ŋuwò atraɖi la!

²³ Megaŋlɔ wò futɔwo ƒe ɣli kple wò ketɔwo ƒe howɔwɔ, si le dzi dem ɖaa la be o!