Psalmowo 73 - Biblia alo Ŋɔŋlɔ Kɔkɔe La Le Eʋegbe Me 1913

AGBALẼ ETƆ̃LIA. Mawuvɔ̃la kpɔa akɔfafa le xexeame ƒe dzɔgbenyuie me.

¹ Asaf ƒe ha. Nyateƒee, Mawu ƒe dɔme nyo ɖe Israel ŋu, de amesiwo ƒe dzi dza la ŋu.

² Ke nye la ekpɔtɔ ʋee nye afɔ da kloe, esusɔ vie nye afɔ ɖiɖi kloe.

³ Elabena meʋã ŋu adegbeƒola, esi mekpɔ be, enyona na ame vɔ̃ɖi la.

⁴ Womesea vevea ɖeke vaseɖe ku me o, eye woƒe ƒodo da ami.

⁵ Amegbetɔwo ƒe hiãkpekpe mele wo ŋu o, eye womeɖea fu na wo abe amegbetɔ bubuwo ene o.

⁶ Eyata dada enye woƒe kɔdzonu, eye wotsyɔ ŋutasesẽ abe avɔ ene.

⁷ Woƒe ŋku do le ami me hɔ̃, eye woƒe dzimesusuwo do lululu.

⁸ Wole alɔme ɖem le nu ƒom le nu vɔ̃ɖi wɔwɔ ŋuti, wole kɔkɔƒe le nu ƒom le tetedeanyi ŋuti do ɖa.

⁹ Wodoa woƒe nu de dziƒo, eye woƒe aɖe le tsatsam le anyigba dzi.

¹⁰ Eyata amewo kplɔa wo ɖo bibibi, eye wokplɔa tsi geɖe hlohlohlo.

¹¹ Eye wole gbɔgblɔm be: Ɖe Mawu nyae, eye ɖe nunya le dziƒoʋitɔ la sia?

¹² Kpɔ ɖa, alea ame vɔ̃ɖiwo le, eye wolia kɔ kesinɔnuwo ɖi daa fuɖeɖea ɖeke makpɔmakpɔe.

¹³ Nyateƒe, yakatsyɔe mene nye dzi ŋn dza, eye meklɔ nye asi ɖe fɔmaɖimaɖi me.

¹⁴ E, mekpea tu gbesiagbe, eye nye tohehe li ŋdi sia ŋdi.

¹⁵ Ɖe nye hã megblɔ be, maƒo nu abe woawo ke ene la, anye ne meto vo ɖe viwòwo ƒe dzidzime ŋu.

¹⁶ Mebu tame, be madze si esia, hiãkame wònye le ŋkunye me,

¹⁷ vaseɖe esime mege de Mawu ƒe kɔkɔeƒe la, eye melé ŋku ɖe woƒe nuwuwu ŋu.

¹⁸ Nyateƒee, ètsɔ wo ɖo ɖiɖiƒe, eye nèxlã wo ɖe anyi wozu anyiglãgo.

¹⁹ Ale ŋɔdzi na wotsrɔ̃ le aɖabaƒoƒo ɖeka me, wobu, eye wo nu yi!

²⁰ Aƒetɔ, ne ènyɔ la, àdo vlo woƒe nɔnɔme abe drɔ̃ekuku le nyɔnyɔ megbe ene.

²¹ Esi dzi kum, eye nye ayikuwo ɖum la,

²² mele abe bometsila ene, nunya mele tagbɔ nam o, eye meɖi lã le ŋkuwò me.

²³ Ke mele gbɔwò ɖaa, eye nèlé nye nuɖusi ɖe asi.

²⁴ Akplɔm le wò adaŋudede la nu, eye emegbe àxɔm ɖe gbɔwò kple bubu.

²⁵ Amekae le dziƒo nam? Nyemele naneke dim le anyigba dzi kpe ɖe ŋuwò o.

²⁶ Ne nye ŋutilã kple nye dzi nu yi hã, Mawue nye nye dzi ƒe sitsoƒe kple nye gome tegbee.

²⁷ Elabena amesiwo te ɖe aga le ŋuwò la, woegblẽ; àtsrɔ̃ amesiwo katã trɔ ʋu le yowòme la.

²⁸ Ke nye la, Mawu ƒe gbɔnyenɔnɔ enye nye dzidzɔ; meɖo ŋu ke Aƒetɔ Yehowa ŋu, ne maxlẽ eƒe dɔwɔwɔwo katã afia.