Psalmowo 72 - Biblia alo Ŋɔŋlɔ Kɔkɔe La Le Eʋegbe Me 1913

Wò fiaɖuƒe nava.

¹ Salomo tɔ. Mawu, tsɔ wò ʋɔnudɔdrɔ̃ na fia la kple wò dzɔdzɔenyenye na flavi la!

² Adrɔ̃ ʋɔnu wò dukɔ ɖe eteƒe kple wò hiãtɔwo alesi dze.

³ Towo kple togbɛwo netsɔ dzɔdzɔenyenye he ŋutifafa vɛ na dukɔ la!

⁴ Atso afia na dukɔ la ƒe hiãtɔwo, axɔ na ame daheviwo, eye wòato ŋutasẽla nyanyanya.

⁵ Ekema woavɔ̃ wò, ŋkeke alesi ɣe kple ɣleti li, tso dzidzime yi dzidzime.

⁶ Aɖi ɖe anyi ahe tsidzadza ɖe gbe talãlàe dzi ene, abe tsi gãe ƒo anyigba ene.

⁷ Ekema ame dzɔdzɔe la amie le eƒe ŋkekewo me, eye ŋutifafa axɔ aƒe, vaseɖe esime dzinu maganɔ anyi o.

⁸ Aɖu fia tso atsiaƒu nu yi atsiaƒu nu, tso tɔsisi la nu ɖaseɖe anyigba ƒe mlɔenuwo ke.

⁹ Gbegbe nɔlawo adze klo ɖe eŋku me, eye eƒe futɔwo atu mo ke me.

¹⁰ Tarsis-fiawo kple ƒukpowo dzi fiawo atsa nunanawo vɛ, Saba-fiawo kple Seba-fiawo axe nudzɔdzɔ.

¹¹ Fiawo katã aɖe ta agu nɛ, eye dukɔwo katã asubɔe.

¹² Elabena aɖe ame dahe, si le ɣli dom, kple hiãtɔ, si xɔnametɔa ɖeke meli na o la.

¹³ Ave hiãtɔwo kple ame dahewo nu, eye woade ame dahewo ƒe luʋɔ.

¹⁴ Aɖe woƒe luʋɔ tso teteɖeanyi kple ŋutasesẽ me, eye woƒe ʋu axɔ asi le eŋku me.

¹⁵ Anɔ agbe, eye woana Seba-sikae, woado gbe ɖa ɖe eta ɖaa, eye woakafui ɣesiaɣi.

¹⁶ Bli aɖo kpekpekpe le anyigba dzi kple towo tame, eƒe agblemenuwo ado zi abe Libanon ene, eye woaƒo se le duwo me abe gbe le anyigba dzi ene.

¹⁷ Eƒe ŋkɔ anɔ anyi tegbetegbe; ŋkeke alesi ɣe li la, eƒe ŋkɔ amie, eye amewo atsɔe ayra wo nɔewoe; dukɔwo katã akafui.

¹⁸ Woakafu Yehowa Mawu, Israel ƒe Mawu la, amesi ɖeɖe ko wɔ nukunuwo!

¹⁹ Woakafu eƒe ŋkɔ kɔkɔe la tegbee! Eƒe bubu ayɔ anyigba blibo la dzi fũ! Nenɔ alea, ẽ, nenɔ alea!

²⁰ Dawid, Isai vi la, ƒe gbedodoɖa wu nu.