Psalmowo 71 - Biblia alo Ŋɔŋlɔ Kɔkɔe La Le Eʋegbe Me 1913

Mawu ƒe amenuveve biabia le amegãkuku me.

¹ Yehowa, wòe mesi tso, megana ŋu nakpem akpɔ gbeɖe o!

² Tsɔ wò dzɔdzɔenyenye ɖem, eye na mado le eme; ƒu to anyi ɖe ŋunye, eye naxɔ nam!

³ Na woanye agakpeto nam, afisi masi ayi ɖaa; wò, amesi ɖo be, yeaxɔ nam; elabena nye agakpe kple nyee mɔ sesẽ nènye.

⁴ Nye Mawu, ɖem tso ame vɔ̃ɖi la si me, eye naɖem tso ame vlo la kple ŋutasẽla ƒe fego me!

⁵ Elabena wòe nye nye mɔkpɔkpɔ, Aƒetɔ Yehowa, nye nusi ŋu meɖoa ŋu ɖo tso nye ɖevime ke!

⁶ Ŋuwò meziɔ ɖo tso danye ƒe dɔ me ke, eye danye ƒe dɔ me nèɖem tsoe, nye kafukafu enye tɔwò ɖaa.

⁷ Nuku menye na ame geɖewo, ke wòe nye nye sitsoƒe sesẽ.

⁸ Nye nu me yɔ fũ kple wò kafukafu, nye ŋkekewo kple wò dodoɖedzi.

⁹ Megagbem le amegãkuɣi o, eye ne nye ŋusẽ nu yi la, megagblẽm ɖi o!

¹⁰ Elabena nye futɔwo le nu ƒom le ŋunye, eye amesiwo de xa ɖe nye agbe ŋu la, le adaŋu dem kple wo nɔewo

¹¹ le gbɔgblɔm be: Mawu gblẽe ɖi, miti eyome, eye milée, elabena xɔnametɔa ɖeke meli o!

¹² Mawu, meganɔ adzɔge tso gbɔnye o, nye Mawu, netsɔ naxɔ nam!

¹³ Ŋu nekpe amesiwo lé fu nye luʋɔ la, eye wo nu neyi; vlododo kple ŋukpe nenyẽ tsyɔ amesiwo le nye dzɔgbevɔ̃e dim la!

¹⁴ Ke nyea manɔ mɔkpɔkpɔ dzi daa, eye madzi wò kafukafu ɖe dzi.

¹⁵ Nye nu axlẽ wò dzɔdzɔenyenye afia, kple wò xɔname hã ɣesiaɣi; elabena womele xexlẽ me nam o.

¹⁶ Mado kple Aƒetɔ Yehowa ƒe nutsuwɔwɔwo, eye eƒe dzɔdzɔenyenye ɖeɖeko mekafu.

¹⁷ Mawu, èfia num tso nye ɖevime ke, eye meɖe gbe ƒã wò nukunuwo vaseɖe fifi.

¹⁸ Eyata, Mawu, megagblẽm ɖi o vaseɖe nye amegãkuku kple nye wɔƒoƒo me, vaseɖe esime meɖe gbe ƒã wò alɔ na dzidzimeviwo kple wò ŋusẽ na megbeviwo katã!

¹⁹ Mawu, wò dzɔdzɔenyenye kɔ de dziƒo ke; wò amesi wɔ nu gãwo, Mawu, amekae ɖe nuwò ma?

²⁰ Wò amesi na míekpɔ hiã kple dzɔgbevɔ̃e geɖe la, wò kee agbɔ agbe mí, eye nahe mí tso anyigbatu me ke ava dzii.

²¹ Adzi nye gãnyenye ɖe dzi, eye agafa akɔ nam.

²² Ekema nye hã matsɔ saŋku akafu wò le wò nyateƒe la ta, nye Mawu; maƒo gakasaŋku na wò, wò Israel ƒe kɔkɔetɔ.

²³ Nye nuyiwo kple nye luʋɔ, si nèɖe la, atso aseye, ne mele saŋku ƒom na wò.

²⁴ Nye aɖe hã aƒo nu le wò dzɔdzɔenyenye ŋu daa; elabena ŋukpe le amesiwo di nye dzɔgbevɔ̃e la, eye woƒe mo tsi dã.