Psalmowo 68 - Biblia alo Ŋɔŋlɔ Kɔkɔe La Le Eʋegbe Me 1913

Dziɖuɖuha.

¹ Ha na henɔ la, Dawid tɔ.

² Mawu tso, eƒe futɔwo ka hlẽ, eye eƒe ketɔwo si le eŋku me.

³ Abe alesi wogbɔa dzudzɔ ɖae ene la, nenema nanyã woe; alesi anyigba lólona le dzo nui la, nenema ame vɔ̃ɖiwo nu ayi le Mawu ŋku mee.

⁴ Ke ame dzɔdzɔewo le dzidzɔ kpɔm, wole aseye tsom le Mawu ŋku me, eye wogli kple dzidzɔ.

⁵ Midzi ha na Mawu, midzi kafukafuha na eƒe ŋkɔ! Mita mɔ na amesi tso gbedzi gbɔna; Yehowae nye eŋkɔ, eye mitso aseye le eŋku me!

⁶ Tsyuẽviwo fofo kple ʋɔnudrɔ̃la na ahosiwo nye Mawu le eƒe nɔƒe kɔkɔe la.

⁷ Mawu, amesi kplɔa ame tsigbewo va aƒee, eye wòkplɔa gatɔwo yia dzɔgbenyuie mee; ke tosẽlawo atsi kuɖinyigba dzi.

⁸ Mawu, esi nèho dze wò dukɔ ŋgɔ, eye nètsa le gbegbe la, Sela,

⁹ anyigba ʋuʋu, Sinai sia hã, le Mawu ŋku me, eye dziŋgɔ ge la le Mawu, Israel ƒe Mawu la, ŋku me.

¹⁰ Mawu, èna tsi geɖe wu de wò domenyinu la dzi, èdo ŋusẽe, esime ɖeɖi te eŋu belibeli.

¹¹ Wò amehawo nɔ edzi afima, Mawu, wò dɔmenyo nètsɔ wɔe na hiãtɔwo.

¹² Aƒetɔ la ƒo nu, eye wòna nyɔnu du nyui xɔlawo de ha kpaŋ.

¹³ Aʋakɔwo ƒe fiawo si, wosi, eye aƒeanɔ mã aboyonu.

¹⁴ Ne míeƒu asaɖa anyi ɖe lãkpɔwo domee la, enɔna abe ahɔ̃ne ƒe aʋala, si ŋu wofa klosalo ɖo, kple eƒe fu, si ŋu sika le hẽ la ene.

¹⁵ Esi ŋusẽkatãtɔ la kaka fiawo me le afima la, sno dza ɖe Zalmon dzi.

¹⁶ Mawu ƒe to enye Basan-towo, to tame tsutsuẽwo nye Basan-towo.

¹⁷ Mi to tame tsutsuẽwo, nukaŋuti miele to, si Mawu di be, yeatsɔ awɔ ye nɔƒee la, kpɔm ɖe ƒomevii? E, Yehowa anɔ afima tegbee!

¹⁸ Mawu ƒe tasiaɖamwo le akpe nane teƒe akpe. Aƒetɔ la le wo dome. Sinai ye le kɔkɔeƒe la.

¹⁹ Edzo yi dzi me ʋi, èɖe amewo aboyoe, eye nèxɔ nunana le amegbetɔwo dome. Tosẽlawo hã anɔ Mawu Yehowa gbɔ.

²⁰ Woakafu Aƒetɔ la gbeawotsyogbe! Eya, míaƒe xɔname ƒe Mawu la, le mía tsam. Sela.

²¹ Mawu enye míaƒe xɔname ƒe Mawu, eye Yehowa, Aƒetɔ la, nya mɔnu le bu ŋu.

²² Vavãe, Mawu agbã la na eƒe tutɔwo kple dzodome na amesiwo le yiyim le woƒe fɔɖiɖi me.

²³ Aƒetɔ la gblɔ be: Makplɔ wo atso Basan, eye makplɔ wo atso atsiaƒu gɔme,

²⁴ ne woaklɔ woƒe afɔ ɖe ʋu me, eye woƒe avũwo ƒe aɖewo nakpɔ wo tɔ gome te woƒe futɔwo ŋu.

²⁵ Mawu, wole wò azɔlime kpɔm, nye Mawu, nye fia, wole wò azɔlime kpɔm la kɔkɔeƒe la.

²⁶ Hadzilawo do ŋgɔ, saŋkuƒolawo xe megbe, eye ɖetugbi gakogoeƒolawo tsɔ wo ɖe dome.

²⁷ Mikafu Mawu. Aƒetɔ la, le takpekpewo me, mi Israel ƒe agunuviwo!

²⁸ Benyamin, si nye dɔmlɔea, nye woƒe dziɖula, Yuda-amegãwo kple woƒe ame gbogboawo, Zebulon-amegãwo kple Naftali-amegãwo.

²⁹ Mawu, ɖo wò ŋusẽ te! Oo, Mawu, li ke nusi nèwɔ na mí la!

³⁰ Le wò gbedoxɔ, si kɔ gbɔ Yerusalem ta, ŋuti fiawo atsɔ nunana va na wò.

³¹ Blu ɖe aƒla me la kple nyitsuwo ƒe ha, siwo le dukɔwo ƒe nyiviwo dome la ta; woawo, amesiwo na wonyã avuzi le wo dzi le klosalo ta. Kaka dukɔ, siwo lɔ̃a aʋawɔwɔ la hlẽ!

³² Amegãwo atso Egipte ava, eye Kus aɖe abla aɖo asi ɖe dzi na Mawu.

³³ Mi anyigba dzi fiaɖuƒewo, midzi ha na Mawu, midzi katukafuha na Aƒetɔ la! Sela.

³⁴ Eya, amesi le yiyim le blemadziƒowo ƒe dziƒowo; kpɔ ɖa, ana eƒe gbe, si nye gbe sesẽ la, naɖi woase,

³⁵ Mitsɔ ŋusẽ na Mawu, eƒe ŋutikɔkɔe le Israel dzi, eye eƒe ŋusẽ le alilikpowo me.

³⁶ Ŋɔdzi le Mawu ŋu le eƒe kɔkɔeƒe la; Israel ƒe Mawu la nena ŋusẽ kple kamesesẽ eƒe dukɔ la! Woakafu Mawu!