Psalmowo 67 - Biblia alo Ŋɔŋlɔ Kɔkɔe La Le Eʋegbe Me 1913

Mawu kafukafu le dukɔwo katã yayra ŋuti.

¹ Ha na kasaŋkuwo ƒe henɔ.

² Mawu, ve mía nu, eye nayra mí, na wò mo naklẽ na mí, Sela,

³ ne woadze si wò mɔ le anyigba dzi kple wò xɔname le dukɔwo katã dome!

⁴ Mawu, dukɔwo akafu wò, wòe dukɔwo katã woakafu.

⁵ Anyigbadzitɔwo akpɔ dzidzɔ, eye woatso aseye, elabena wòe drɔ̃a ʋɔnu dukɔwo ɖe eteƒe, eye wòe kplɔa anyigbadzitɔwo. Sela.

⁶ Mawu, dukɔwo akafu wò, wòe dukɔwo katã akafu.

⁷ Anyigba mie eƒe nukuwo. Mawu, mía Mawu la, ayra mí.

⁸ Mawu ayra mí, eye anyigba ƒe mlɔenutɔwo katã avɔ̃e.