Psalmowo 66 - Biblia alo Ŋɔŋlɔ Kɔkɔe La Le Eʋegbe Me 1913

Akpedada na Mawu le dukɔ la takpɔkpɔ ŋuti.

¹ Ha na henɔ la. Mí anyigbawo katã, mitso aseye na Mawu!

² Midzi ha na eƒe ŋkɔ ƒe bubu, eye mido kɔkɔe eƒe kafukafu la!

³ Migblɔ na Mawu be: Ŋɔdzi le wò dɔwɔwɔ ŋu loo! Le wò ŋusẽ ƒe agbɔsɔsɔ ta wò futɔwo avivi nu me na wò.

⁴ Anyigbawo katã ade ta agu na wò, eye woadzi kafukafuha na wò, woadzi kafukafuha na wò ŋkɔ. Sela.

⁵ Miva, ne miakpɔ Mawu ƒe dɔwɔwɔ; eya, amesi wɔ nu dziŋɔwo ɖe amegbetɔviwo ŋu!

⁶ Etrɔ atsiaƒu wòzu ƒuƒuiƒe; afɔ wotsɔ tso tɔsisi lae; gama míekpɔ dzidzɔ ɖe eŋu le!

⁷ Ele fia ɖum le eƒe ŋusẽ me tegbee, eƒe ŋku le tsatsam le dukɔwo dzi. Tosẽlawo megafɔ wo ɖokui ɖe dzi o! Sela.

⁸ Mi dukɔwo, mikafu mía Mawu la, eye mina eƒe kafukafu naɖi woase!

⁹ Eya, amesi le míaƒe luʋɔ de agbe, eye meɖe ke le míaƒe afɔ te o.

¹⁰ Oo, Mawu, elabena èdo mí kpɔ, eye nèlòlo mí, abe alesi wolóloa klosalo ene.

¹¹ Etsɔ mí de ɖɔ me, eye nèdro agba ɖe ali dzi na mí.

¹² Ena amegbetɔwo nɔ míaƒe ta me; míedze dzo kple tɔ me, ke nèɖe mí do go heyi ablɔɖe mee.

¹³ Matsɔ numevɔsa ava aƒewò mee, ne maxe nye adzɔgbeɖefe,

¹⁴ siwo do tso nye nuyiwo me, eye nye nu gblɔ le nye hiã me la, na wò.

¹⁵ Matsɔ alẽ damiwo asa numevɔ na wò akpe ɖe agbowo ƒe dzudzɔ lilili ŋu, matsɔ nyiwo kple gbɔ̃tsuwo asa vɔ na wò. Sela.

¹⁶ Mi mawuvɔ̃lawo katã, miva, ne maxlẽ nusi wòwɔ na nye luʋɔ la, afia miase!

¹⁷ Eya metsɔ nye nu do ɣli na, eye kafukafu le nye aɖe te na.

¹⁸ Ɖe wònye ɖe meɖo nu vɔ̃ɖi ɖe nye dzi me la, anye ne Aƒetɔ la gbe toɖoɖom.

¹⁹ Ke Mawu see, eye wòɖo to nye gbedodoɖa ƒe gbe.

²⁰ Woakafu Mawu, amesi megbe nye gbedodoɖa o, eye mete eƒe amenuvevem o!