Psalmowo 61 - Biblia alo Ŋɔŋlɔ Kɔkɔe La Le Eʋegbe Me 1913

Fia, si wole fu ɖem na ƒe gbedodoɖa.

¹ Dawid tɔ na kasaŋkuwo ƒe henɔ.

² Mawu, se nye ɣli, eye nalé to ɖe nye gbedodoɖa ŋu!

³ Anyigba ƒe mlɔenu ke mele yɔwòm tsoe, esime nu te nye dzi ŋu; tsɔm ɖo agakpe, si kɔ nam akpa la dzi!

⁴ Elabena ènye sitsoƒe nam kple xɔ tsrala sesẽ le futɔ la ŋku me.

⁵ Medi be, mana wò agbadɔ me tegbee, eye mabe ɖe wò aʋala te. Sela.

⁶ Elabena wò Mawu èɖo to nye adzɔgbeɖeɖewo, eye nẽtsɔ domenyinu na amesiwo vɔ̃ wò ŋkɔ la.

⁷ Tsɔ ŋkekewo kpe fia la ƒe ŋkekewo, eye eƒe ƒewo netso dzidzime yi dzidzime!

⁸ Neɖu fia le Mawu ŋku me tegbee; ɖo amenuveve kple nyateƒe, ne woakpɔ eta!

⁹ Ekema madzi kafukafuha na wò ŋkɔ tegbee, eye maxe nye adzɔgbeɖefe gbesiagbe.