Psalmowo 60 - Biblia alo Ŋɔŋlɔ Kɔkɔe La Le Eʋegbe Me 1913

Le aʋaŋɔtiwo me.

¹ Dawid ƒe ha ɖe futamee na henɔ la, ne woafia, eye woadzi ɖe „Dzogbenya ƒe ɖaseɖiɖi“ ƒe gbe nu;

² le esime wòwɔ aʋa kple Aramtɔwo le Mesopotamia kple Aramtɔwo le Zoba, eye Yoab trɔ hewu Edomtɔ akpe wuieve le dzeʋe la me.

³ Mawu, ègbe mí, èkaka mí hlẽ èdo dɔmedzoe; gatrɔ mí gbɔe!

⁴ Eʋuʋu anyigba, eye nèfee; gatre eƒe fefeƒeawo, elabena ele ʋaʋãm!

⁵ Ena nu sesẽ kpe wò dukɔ la, eye néna wein mí míeno mu.

⁶ Ena aflaga amesiwo vɔ̃a wò, ne woafɔ wo ɖokui de tsitre le nyateƒe la ta. Sela.

⁷ Ne woaxɔ na wò ame lɔlɔ̃wo, tsɔ wò nuɖusi ɖe mi, eye naɖo to mi!

⁸ Mawu ƒo nu le eƒe kɔkɔeƒe la be: Makpɔ dzidzɔ, mamã Sixem, eye madzidze Sukot-hali me la.

⁹ Gilead enya tɔnye, eye tɔnyee nye Manase; Efrayim enye nye taxenu, eye Yuda enye nye fiatikplɔ;

¹⁰ nye tsileze enye Moab, mada nye atokota ɖe Edom dzi, eye matso aseye ɖe Filistitɔwo ŋu!

¹¹ Amekae akplɔm ayi du sesẽ la mee, eye amekae akplɔm vaseɖe Edom?

¹² Mawu, ɖe menye wòe gbe mi oa, Mawu, eye mèho kple míaƒe aʋakɔwo oa?

¹³ Kpe ɖe mía ŋu ɖe míaƒe ketɔwo ŋuti, elabena amegbetɔ ƒe xɔname mele ɖeke me o.

¹⁴ Mawue míatsɔ awɔ kalẽe, eye eya anyã avuzi le míaƒe ketɔwo dzi.