Psalmowo 49 - Biblia alo Ŋɔŋlɔ Kɔkɔe La Le Eʋegbe Me 1913

Mawumavɔ̃lawo ƒe dzɔgbenyuie nuwuwu enye ku.

¹ Korax-viwo ƒe ha na henɔ la.

² Mi dukɔwo katã, mise esia, mi xexeametɔwo katã, miƒu to anyi,

³ mi hahooawo kple amegãviwo, mi kesinɔtɔwo kple ame dahewo siaa!

⁴ Nye nu agblɔ nunya, eye gɔmesese enye nye dzimesusuwo.

⁵ Maƒu to anyi ɖe abebubu ŋu, eye mato nye adzo ɖe saŋkuƒoƒo ŋu.

⁶ Nukaŋuti mavɔ̃ le dzɔgbevɔ̃eɣiwo me, ne nye adikãtɔwo ƒe vodada ɖe to ɖem?

⁷ Amesiwo le dzi ɖom ɖe woƒe nuwo ŋu, eye wotsɔ woƒe kesinɔnu gbogboawo le adegbe ƒomi.

⁸ Amea ɖeke mate ŋu axɔ nɔvia akpɔ o, eye mate ŋu axe etafe na Mawu,

⁹ — elabena woƒe agbe ƒeƒle xɔ asi ŋutɔ, eye aɖo kpoe tegbee, —

¹⁰ be wòanɔ agbe ayi dzi, eye makpɔ yɔdo o.

¹¹ Kpao, ke boŋ akpɔe be, nunyalawo kuna, bometsilawo kple abunetɔwo nu yina, eye wogblẽa woƒe nuwo ɖi na ame bubuwo.

¹² Wole tame enye be, yewoƒe xɔwo anɔ anyi tegbetegbe, yewoƒe nɔƒewo anɔ anyi na dzidzimewo katã, eye woyɔa woƒe ŋkɔwo ɖe anyigbawo ŋu.

¹³ Ke amegbetɔ, si le agbe le atsyɔ̃ɖoɖo me la, mali ke o; esɔ kple lã, eye nuƒoƒo abu ɖee.

¹⁴ Esia nye amesiwo ɖoa ŋu ɖe wo ɖokui ŋu la, ƒe zɔzɔme, eye woƒe nya dzea wo yometɔwo ŋu. Sela.

¹⁵ Woyi tsiẽƒe abe alẽwo ene, eye ku nye wo kplɔla; ame dzɔdzɔewo nyã avuzi le wo dzi le ŋdi, eye woƒe nɔnɔme nyunyɔ, elabena tsiẽƒe zu woƒe nɔƒe.

¹⁶ Ke Mawu ade nye luʋɔ atso tsiẽƒe si me, elabena axɔm de eɖokui gbɔ. Sela.

¹⁷ Ne amea ɖe zu kesinɔtɔ, eye eƒe aƒe ƒe bubu dzi ɖe dzi la, megava o!

¹⁸ Elabena ne eku la, matsɔ nusiawo katã dometɔa ɖeke aɖo asi o, eye eƒe bubu makplɔe ɖo o.

¹⁹ Nenye be, eyra eɖokui le eƒe agbenɔɣi, eye wokafui be, ewɔ nyuie na eɖokui hã la,

²⁰ ayi fofoawo ƒe ƒome, si megakpɔ kekeli kpɔ o la gbɔ.

²¹ Amegbetɔ, si le agbe le atsyɔ̃ɖoɖo me, eye tagbɔ mele esi o la, esɔ kple lã, eye nuƒoƒo abu ɖee!