Psalmowo 48 - Biblia alo Ŋɔŋlɔ Kɔkɔe La Le Eʋegbe Me 1913

Fia gã la ƒe du.

¹ Korax-viwo ƒe ha.

² Yehowa lolo, eye wòdze kafukafu le mía Mawu ƒe du la me kple eƒe to kɔkɔe la dzi.

³ Zion-to, si nye fia gã la ƒe nu, kɔ eɖokui ɖe dzi nyuie le anyiehe kekeake, eye wònye dzidzɔdonu na anyigba blibo la.

⁴ Mawu fia eɖokui le eƒe fiasãwo me abe sitsoƒe ene.

⁵ Elabena kpɔ ɖa, fiawo ƒo ƒu, eye wa katã wova ɖe eŋuti.

⁶ Esi wokpɔe la, woƒe nu ku, dzidzi ƒo wo, eye wosi.

⁷ Wodzo nyanyanya le afima, eye ŋɔdzi lé wo abe nyɔnu, si le ku lém ene.

⁸ Etsɔ ɣedzeƒeya gbã Tarsis-ʋuwo.

⁹ Míekpɔe le Yehowa Zebaot ƒe ɖu kple mía Mawu ƒe du la me, abe alesi míesee ene. Mawu ali kee tegbee. Sela.

¹⁰ Mawu, míele ŋku dom wò amenuveve dzi le wò gbedoxɔ titina.

¹¹ Mawu, wò kafukafu de anyigba ƒe mlɔenu abe wò ŋkɔ ke ene. Wò nuɖusi yɔ fũ kple dzɔdzɔenyenye.

¹² Zion-to nekpɔ dzidzɔ, eye Yuda-nyɔnuviwo netso aseye le wò ʋɔnudɔdrɔ̃ ta!

¹³ Mizɔ Zion ŋu godoo, miƒo xlãe va kpe, eye mixlẽ eƒe xɔ tsralawo!

¹⁴ Milé ŋku de eƒe agbogbowo ŋu, eye mito eƒe fiasãwo me, ne miaxlẽe afia megbeviwo!

¹⁵ Elabena Mawu siae nye mía Mawu ɖaa tegbee, eye akplɔ mí vaseɖe ku me.