Psalmowo 47 - Biblia alo Ŋɔŋlɔ Kɔkɔe La Le Eʋegbe Me 1913

Mawu enye fia.

¹ Korax viwo ƒe ha na henɔ la.

² Mi dukɔwo katã, miƒu akpe, eye mitsɔ aƒadodo tso aseye ɖe Mawu ŋu!

³ Elabena ŋɔdzi le Yehowa dziƒoʋitɔ la ŋu, fia gã wonye ɖe anyigba blibo la dzi.

⁴ Etsɔ dukɔwo ɖe mía te kple sesẽ, eye wòɖe anyigbadzitɔwo míaƒe afɔ te.

⁵ Etia míaƒe domenyinu na mí, si nye Yakob, amesi wòlɔ̃na la, ƒe adegbeƒonu. Sela.

⁶ Mawu yi dzi kple aseyetsotso, Yehowa kple kpẽ ƒe ɖiɖi.

⁷ Midzi kafukafuha na Mawu, midzi kafukafuha hee! Midzi kafukafuha na mía fia la, midzi kafukafuha!

⁸ Elabena Mawue nye fia ɖe anyigba blibo la dzi, midzi nufiameha!

⁹ Mawu ɖu fia ɖe dukɔwo dzi, Mawu bɔbɔ nɔ eƒe fiazikpui kɔkɔe la dzi.

¹⁰ Dukɔwo ƒe ame ŋkutawo ƒo ƒu, wonye Abraham ƒe Mawu la ƒe dukɔ; elabena Mawu tɔ enye anyigba ƒe akpoxɔnuwo. Eɖo kpo ŋutɔ.